Quba rayonu Böyük Qafqaz dağ silsiləsinin cənub-şərq hissəsi boyu üçbucaq şəklində yerləşir,
relyefin dəyişkənliyi və canlılar aləminin zəngin müxtəlifliyi ilə səciyyələnir. Ərazinin göbələklər
aləmi ötən əsrin əvvəllərindən başlayaraq təsadüfi və planlı şəkildə müxtəlif tədqiqatçılar tərəfindən
araşdırılmış və əhəmiyyətli sayda növ və növ daxili müxtəliflik müəyyən edilmişdir [1, 2, 3]. Aşkar
edilmiş göbələklər ağac, kol və ot bitkiləri üzərində yayılmışlar, əsasən yabanı və qismən mədəni bitki
növlərindən ibarət geniş sahib sırasına malikdirlər.
Təqdim edilən işin məqsədi yeni toplanılmış və təyin edilmiş basidili mikromisetlər barədə
məlumat vermək, eləcə də herbaridə saxlanılan nümunələri son dəyişiklikləri nəzərə almaqla
taksonomik baxımdan sistemləşdirməkdən ibarətdir.
