Referat ham kurs jumisinin ozgeshelikleri

4-tema.Ilimiy stil hám onıǹ ózgeshelikleri. Vizual informaciya, ilimiy informaciya tusinigi. Referat ham kurs jumisinin ozgeshelikleri
Jobası:
1.Ilimiy stil hám onıǹ ózgeshelikleri
2.Stiller, vizual ham ilimiy informaciyalar
3. Referat teksti, onıǹ dúzilisi
4. Kurs jumısı haqqında maǵlıwmat
5. Referat hám kurs jumısınıǹ tiykarǵı ózgeshelikleri
Ilimiy stil hám onıǹ ózgeshelikleri

1.Ilimiy stil hám onıǹ ózgeshelikleri
Til birlikleri hám materialınan pikirdi ańlatıw maqsetinde paydalanıw procesi stil esaplanadi. Turmıstıń túrli tarawları, túrlishe sóylew jaǵdaylarında tildegi leksik, frazeologik, fonetikalıq hám grammatikalıq qurallardı tańlaw hám olardan paydalanıw stilları da hár túrlı boladı. Soǵan kóre, stildiń tómendegi túrleri óz ara parıq etedi: sóylesiw stili, rásmiy stil, ilimiy stil, publicistikalıq stil hám kórkem ádebiyat stili.
Ilim hám texnikalıq miynetlerdiń ádebiy til tiykarında jazılıw stili ilimiy stil dep ataladı. Ilimiy stil ádebiy tildegi kitabıy stillerdiń qatarına jatadı. Ondaǵı bayanlaw monolog túrinde, logikalıq jaqtan dálillengen, oylanıp dúzilgen gáplerden quralıp, bul stil ádebiy til ólshemlerıne sáykes bolǵan til qurallarınan paydalanadı. Ilimiy stil, álbette, ilimniń rawajlanıwı, onıń jańa tarawlarınıń payda bolıwı menen baylanıslı. Bul stildiń tiykarǵı maqseti - logikalıq informaciyanı xabarlaw, onıń haqıyqıy ekenligin dálillew bolıp esaplanadı. Sonlıqtan da onıń leksikasında hám grammatıkasında ózine tán bolǵan ózgeshelikleri boladı.
Ilimiy stil tábiyat jáne jámiyetlik turmıstaǵı barlıq zat hám de hádiyseler haqqında anıq, tiykarlanǵan, izbe-iz sıpatlama beriwde qollanıladı. Ol jaǵdayda zat -hádiyse mánisin tariyplew, analiz etiw, sebebin anıqlap, dáliller menen tastıyıqlaw hám tıyanaqlı nátiyjelerdi bayanlaw zárúrli esaplanadı. Arnawlı atamalar bul stildiń leksikasın quraydı, ol jaǵdayda kórkem ádebiyatqa baylanıslı normaǵa qatań ámel etilgen halda belgisiz feyiller hám qospa gápler keń isletiledi. Ilimiy stil bilimniń túrli tarawlarına qaray, sonday-aq, kimge baǵdarlanǵanlıǵına qarap óz ara parıq etedi. Mısalı, ilim tarawları arnawlı bir shártli belgiler, formulalar, bayanlaw materialı menen ajralıp turadı. Ilimiy stildeǵi kitaplar ilimge tiyisli maǵlıwmatlar beriw menen qánigelerge ǵana arnalǵan bolıwı yamasa bunday ilimiy maǵlıwmatlar keń jámiyetshilikke qaratılǵan bolıwı múmkin. Keń jámiyetshilikke túsinikli bolǵan, bayanlawda emocionallıq, obrazlılıq bolǵan stil ilimiy- publicistikalıq stil esaplanadı. Kópshilikke arnalǵan lekciyalar, qollanba hám sabaqlıqlar sol stildiń kórinisleri bolıp tabıladı.
Ilimiy- publicistikalıq stilde arnawlı atamalar kem isletiledi (isletilgen bolsa anıqlaması beriledi), pikirler anıq túsindiriledi, bayanlawda obrazlılıqtı támiyinleytuǵın kórkem súwret qurallarınan paydalanıladı.