The economy of enterprise

Korxonalarda investitsiyalashning asosiy manbalari va yo’nalishlari

Deyarli barcha faoliyat ko’rsatuvchi korxonalar davlatga tegishli bo’lgan sobiq ma’muriy-buyruqbozlik tizimi sharoitlarida investitsiyalarning asosiy manbai davlat (byudjet) mablag’laridan tashkil topar edi. Garchi o’sha sharoitlarda ham jamg’arma fondlar - asosiy investitsion manbalar korxonalar foydasi (daromadi) hisobiga amalga oshirilgan bo’lsada, korxonalarning mablag’larni qaerdan olish va qaerga joylashtirish to’g’risida “boshi” og’rimas edi. Qo’shimcha manba sifatida korxonalarning amortizatsiya fondi xizmat qilardi.

Mazkur tushunchalar (jamg’arma fondi, amortizatsiya fondi, foyda) hozirgi kunda ham o’z ahamiyatini yo’qotmagan bo’lib, investitsiyalarning asosiy manbai hisoblanadi. Masalan, davlat korxonalari uchun asosiy investitsiya manbai quyidagilar: foyda, amortizatsiya fondi va byudjet mablag’lari, qo’shma korxonalar uchun - foyda, amortizatsiya fondi va kredit resurslari.
Rejalashtirish va boshqaruv tizimida shuningdek, investitsiya manbalarini aniqlashning ichki va tashqi turlaridan ham foydalaniladi.

Investitsiyalarning ichki manabalari quyidagilar:

• 
  ishlab turgan asosiy kapitalga hisoblanuvchi amortizatsiya ajratmalari natijasida shakllanuvchi, korxonaning o’z moliyaviy vositalari;
  
• 
  foydaning investitsiya ehtiyojlariga ajratiluvchi qismi;
  
• 
  sug’urta kompaniyalari va muassasalari tomonidan tabiiy ofat va boshqa hodisalarda to’lanuvchi mablag’lar;
  
• 
  korxonaning aktsiyalar chiqarishi va sotishi natijasida olinuvchi mablag’lar;
  
• 
  yuqori turuvchi va boshqa organlar tomonidan qaytarib bermaslik asosida ajratiluvchi mablag’lar;
  
• 
  xayriya va shu kabi boshqa mablag’lar. Investitsiyalarning tashqi manbalari quyidagilar:
  
• 
  markaziy va mahalliy byudjetdan, tadbirkorlikni qo’llab-quvvatlovchi turli xil fondlar tomonidan ajratiluvchi qaytarib bermaslik asosidagi mablag’lar;
  
• 
  korxonalar Nizom jamg’armasida moliyaviy yoki boshqa moddiy va nomoddiy ishtirok shaklida, shuningdek, xalqaro moliya institutlari va alohida shaxslarning to’g’ridan-to’g’ri qo’yilmalari shaklida kiritiluvchi xorijiy investitsiyalar;
  
• 
  davlat va turli xil fondlar tomonidan qaytarib berish sharti bilan beriluvchi kreditlar, jumladan imtiyozli kreditlar.
  

Korxonalarning mustaqil xo’jalik faoliyati sharoitlarida ichki mablag’lar tarkibida amortizatsiya ajratmalari asosiy o’rinni egallaydi. Uning korxona investitsion resurslaridagi ulushi 50% va undan ko’proqni tashkil etadi.
Investitsion maqsadlarga yo’naltiriluvchi mablag’lar tanqisligi sharoitida lizing investitsion faoliyatni faollashtiruvchi muhim vosita bo’lib xizmat qiladi.
Lizing - moliyaviy-kredit munosabatlarining shakllaridan biri bo’lib, korxonalarning qurilma va asbob-uskunalarni ishlab chiqaruvchi korxonalar yoki maxsus tashkil qilingan lizing kompaniyalaridan uzoq muddatga ijaraga olishini anglatadi. Lizing bitimida ko’rsatilgan tomonlardan tashqari investitsion loyihalarni moliyalashtirish hamda ularni buning uchun zarur bo’lgan mablag’lar bilan ta’minlash imkoniyatiga ega bo’lgan tijorat yoki investitsion banklar ham ishtirok etishi mumkin.
Investitsiyalardan (kapital qo’yilmalardan) foydalanishning asosiy yo’nalishlari quyidagilar hisoblanadi:

• 
  yangi qurilish;
  
• 
  korxonani kengaytirish va qayta tiklash;
  
• 
  ishlab chiqarishni zamonaviylashtirish va texnik jihatdan qayta qurollantirish;
  
• 
  harakatdagi quvvatlarni takomillashtirish.