Toshkent farmatsevtika instituti

Axborot qismi.



Davolash profilaktika muassasalari dorixonalari ishini yaxshilash to‘g‘risida”gi buyruq
O‘zbekiston Respublikasi Sog‘liqni saqlash vazirligining 2001 yil 5 sentabrda chiqqan “Davolash profilaktika muassasalari dorixonalari ishini yaxshilash to‘g‘risida”gi 400–sonli buyrug‘iga binoan shifoxona dorixonalari o‘z faoliyatlarini amalga oshirishlari lozim. Buyruqqa asosan barcha davolash profilaktika muassasalari dorixonalarida tayyorlanayotgan dori vositalari sifatini nazorat qilishni standart talablariga muvofiqlashtirish hamda davolash profilaktika muassasalari shifoxonalari tarkibidagi dorixonalarda tayyorlangan dori vositalari bilan belgilangan tartibda hududdagi barcha DPMlarni ta’minlash choralari ko‘rilishi shart. Undan tashqari buyruqda aytilishicha DPM dorixonalari faoliyatini sanitariya qoidalari va me’yorlari asosida amalga oshirish ishlari doimiy nazorat qilinishi kerak.


Sog‘liqni saqlash vazirligi tasarrufidagi “DPM dorixonalarida steril dorilar tayyorlashni tartibga solish to‘g‘risida”gi buyruq va uning ahamiyati
O‘zbekiston Respublikasi Sog‘liqni saqlash vazirligining 4 oktyabr 2001 yilda chiqqan “Sog‘liqni saqlash vazirligi tasarrufidagi DPM dorixonalarida steril dorilar tayyorlashni tartibga solish to‘g‘risida”gi 444–sonli buyrug‘i amaliy va nazariy ahamiyatga ega. Respublika hududida joylashgan davolash profilaktika muassasalari ichki dorixonasida steril dorilar tayyorlash shart-sharoitlarini yaratish bo‘yicha tavsiyanoma berilgan. Unda davolash profilaktika muassasalari ichki dorixonasida steril dori vositalari tayyorlashda ishlatiladigan zarur asbob-uskuna va jihozlar ro‘yxati keltirilgan. Buyruqda dori vositalari tayyorlash hamda tahlil qilish jarayonida foydalaniladigan me’yoriy hujjatlar, dorixonalarda tahlil ishlari uchun ishlatiladigan indikatorlar, reaktivlar va erituvchilar ro‘yxati berilgan.


Davolash profilaktika muassasasi dorixonasi va uning asosiy vazifalari
Davolash profilaktika muassasasining dorixonasi haqidagi nizomga binoan shifoxona dorixonalari o‘rinlarining soni 100 va undan ortiq bo‘lgan davolash profilaktika muassasalarida tashkil etiladi.
Davolash profilaktika muassasasining dorixonasi ushbu muassasaning bo‘limlari bilan bir huquqda ishlab, ularni dori-darmon va boshqa tibbiyot tovarlari bilan ta’minlab turadi.
Davolash profilaktika muassasasi dorixonasining asosiy vazifalari quyidagilardan iborat:
- davolash profilaktika muassasasi bo‘limlaridan dori-darmonlar va boshqa tibbiyot mollari uchun talabnomalar qabul qilib olish;
- qabul qilingan talabnomalar bo‘yicha Sog‘liqni saqlash vazirligi amaldagi buyruqlari asosida belgilangan tartibda dori turlarini tayyorlash, ularni sifatini nazorat qilish, yorliqlash va tegishli bo‘limlarga tarqatish;
- davolash profilaktika muassasasi bo‘limlarini dori vositalar ishlab chiqaruvchi korxonalardan va ta’minotchilardan shartnoma asosida; davlat reestriga kiritilgan dori vositalari, bog‘lov materiallari, bemorlar parvarishida ishlatiladigan buyumlar, sanitariya va gigiyena buyumlari, dezinfeksiya vositalari hamda boshqa mahsulotlar bilan ta’minlash;
Shifoxonadagi bo‘limlari va xonalardagi dori vositalari bog‘lov materiallari, bemorlar parvarishida ishlatiladigan sanitariya va gigyiena ashyolari, dezinfeksiya vositalari va boshqa tibbiyot buyumlarini amaldagi me’yoriy hujjatlar talablari darajasida saqlanishi, ishlatilishini nazorat qilish va yo‘l qo‘yilgan xato-kamchiliklarni aniqlab, ularni bartaraf etish choralarini ko‘rish uchun rahbariyatga axborat berish;
- tibbiyot xodimlariga farmatsevtika yangiliklari, dorixonada mavjud bo‘lgan, yangi dorilar va ularni ishlatilishi haqida axborot berish;
- davolash-profilaktika muassasasi ixtisosi va ehtiyojiga ko‘ra dori vositalari va tibbiyot buyumlari zahirasini doimiy ravishda to‘ldirib borish;
- dorixonada mavjud bo‘lgan dori vositalarni saqlashda amaldagi sanitariya qoidalari va me’yorlariga hamda farmatsevtika talablariga qat’iy rioya qilish;