9.Əkizlər metodu vasitəsi ilə uşaqların irsiyyəti, mikromühitdə aparılan təlim-tərbiyə ilə irsiyyət arasındakı münasibətlər aşkara çıxarılır. Bu metod müşahidə və eksperiment şəraitində eyni yumurtadan əmələ gələn əkizlərin psixi inkişafını müqayisəli şəkildə öyrənməyə imkan verir. Bu zaman mühit və tərbiyə amillərinin təsirini aşkara çıxarmaq mümkün olur.
Bu cür ümumi metodlarla yanaşı pedaqoji psixologiyanın özünəməxsus xüsusi metodları da vardır.
1.Psixoloji-pedaqoji eksperiment. Pedaqoji psixologiyada eksperiment metoduna xüsusi yer verilir. Əldə edilmiş nəticələrin taleyi və səmərəliliyi psixoloji-pedaqoji eksperimentin düzgün təşkili və aparılmasından asılıdır. Hər şeydən əvvəl nəticələrdə səhvlərə yol verməmək üçün eksperimentin təşkili əvvəlcədən düşünülməlidir. Psixoloji-pedaqoji eksperiment uşağın fəaliyyətini daha dərindən tədqiq etməyə, izləməyə, tədqiqat şəraitini dəyişdirməyə tədqiqatçıya, müəllim və tərbiyəçiyə imkan verir.
