Uot 338: 04 Əliquliyev R. M

İnternet  cinayətkarlığı.  İnternetin  unikal  texnoloji  xüsusiyyətləri  bir  sıra  cinayət 

əməllərinin  həyata  keçirilməsi  üçün  əlverişli  mühit  yaradır.  Qlobal  şəbəkənin  tənzimlənməsi 

sahəsində  hüquqi  boşluqların  olması  bu  cür  neqativ  halların  qarşısının  alınmasını  xeyli 

çətinləşdirir.  İnternet  həm  ənənəvi  cinayətlərin  daha  rahat  şəkildə  həyata  keçirilməsi,  həm  də 

yalnız  bu  qlobal  şəbəkəyə  məxsus  olan,  geniş  ictimaiyyətə  məlum  olmayan  yeni  cinayət 

növlərinin reallaşdırılması üçün əlverişli mühit kimi çıxış edir [1]. 

İnternetin  imkanlarından  cinayətkar  elementlər  fəal  şəkildə  istifadə  edirlər,  terrorçu 

təşkilatların  narkotik,  silah  reklamı  və  satışının  həyata  keçirildiyi,  pornoqrafik    materialların 

yerləşdirildiyi,  həmçinin  irqçi,  millətçi,  ekstremistyönlü  saytlar  qlobal  şəbəkədə  geniş  yayılıb. 

Bu  virtual  məkanda  cinayətlərin  yüksək  sosial  təhlükəliliyi  transmilli  xarakter  daşıyır.  Yəni 

müvafiq fəaliyyətin fəsadları geniş insan dairələrini və müxtəlif ölkələri əhatə edir.  

İnternet  mühitində  cinayətkarlıq  hallarının  sürətlə  artması,  ilk  növbədə,  bu  qlobal 

şəbəkənin xüsusiyyətləri – açıqlığı, hamı üçün əlyetərli olması, heç bir dövlətin və ya təşkilatın 

nəzarətində olmaması ilə bağlıdır. 

Nəticə 

Qeyd etmək lazımdır ki, sivilizasiyanın inkişaf tarixi ərzində hər bir mütərəqqi yenilik özü 

ilə müəyyən problemlər gətirmişdir. Lakin bəşəriyyət həmişə mütərəqqi yeniliklərdən lazımınca 

bəhrələnmiş,  onların  gətirdiyi  problemlərin  öhdəsindən  gəlməyi  bacarmışdır.  İnternet  bəşər 

tarixində analoqu olmayan, heç bir vasitə ilə müqayisəyə gəlməyən bir fenomendir. Yəni heç bir 

texnoloji  yenilik  bəşəriyyəti  İnternet  qədər  dəyişdirə,  irəliyə  apara  bilməmişdir.  Qlobal 

şəbəkənin inkişaf tendensiyaları o qədər dinamik və çoxşaxəlidir ki, onun perspektivlərini dəqiq 

proqnozlaşdırmaq  mümkün  deyil.  İnternetin  bəşəriyyətə  faydaları  geniş  miqyaslı  olduğu  kimi, 

fəsadları  da  bütün  sahələri  əhatə  edir.  Lakin  bəşəriyyətin  keçmiş  zəngin  təcrübəsi  və  indiki 

səyləri  göstərir  ki,  insanlar  daha  yaxşı   imkanlar,  daha  rahat  həyat  naminə  İnternetin  də 

fəsadlarını aradan qaldıra biləcəklər.