Funksiyalar proqramlaşdırmada ən çox istifadə olunan imkanlardan biridir. Funksiyalar əsasən iki məqsəd üçün istifadə olunurlar:
Eyni kodun proqramda təkrar-təkrar tərtib olunmasının qarşısını almaq üçün.
Mürəkkəb məsələləri nisbətən daha kiçik mətiqi hissələrə bölmək üçün.
Hər-hansı funksiyadan istifadə etmək üçün onun kodunu tərtib etməliyik. Funksiyanı tərtib etdikdən sonra onu proqramın istənilən yerindən çağıra bilərik. Bu zaman funksiyanı tərtib edərkən ona verdiyimiz addan istifadə edirik.
Funksiyanın Tərtib Olunması.
Yeni funksiya tərtib etmək üçün əvvəlcə funksiya açar sözünü yazırıq.
funksiya
Daha sonra isə funksiyanın adını yazırıq.
funksiya salam_dunya
Funksiyalara ad verərəkən dəyişənlərin adlandırılması qaydalarına (rəqəmlə başlamamaq, v.s. ) riayət etməliyik. Funksiyanın adından sonra () mötərizələri içərisində prametrləri yazırıq, əgər funksiya heç bir parametr qəbul etmirsə onda mötərizələrin içinə heçnə yazmırıq. Parametrlər barədə ətraflı biraz sonra danışacağıq.
