“Təhlükəsiz iş aylığı”nın yekunları təqdim olunub
01.10.2015
Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətində (DƏMX) “Təhlükəsiz iş aylığı”nın yekunlarına dair mətbuat konfransı keçirilib. Xidmətin rəisi Fuad Əlizadə deyib ki, aylıq çərçivəsində ümumilikdə 107 işəgötürəndə dövlət nəzarəti keçirilib: “Bu tədbirlər zamanı 83 halda qanun pozuntusu aşkar edilib və 79 inzibati xəta haqqında protokol tərtib edilməklə 79 nəfər sahibkara qarşı ümumilikdə 179900 manat məbləğində inzibati cərimə tətbiq olunub”.
Nazirliyin rəsmi xəbərinə əsasən, Fuad Əlizadə deyib ki, cari ilin avqust ayında istehsalatla əlaqəli bədbəxt hadisələrin sayı ötən ilin müvafiq dövrü ilə müqayisədə 12,5 faiz, qeyd olunan hadisələr nəticəsində xəsarət alanların sayı 7,1 faiz azalıb: “Ümumilikdə bu ilin 8 ayında istehsalatla əlaqəli bədbəxt hadisələrin sayında ötən ilin müvafiq dövrü ilə müqayisədə 33,3 faiz, həmin hadisələr nəticəsində xəsarət alanların sayında isə 38,3 faiz azalma qeydə alınıb”.
Fuad Əlizadə əlavə edib ki, bu ilin 9 ay ərzində istehsalatda 112 bədbəxt hadisə baş verib, 32 nəfər həyatını itirib: “Bədbəxt hadisələrin 35 faizi tikinti sahəsi baş verib. Əməyin mühafizəsinin pozulması halları da ən çox tikinti sektorunda qeydə alınıb”.
APA-Economics-in məlumatına görə, DƏMX rəisi deyib ki, müxtəlif qanun pozuntuları səbəbindən 9 ayda 5635 hüquqi və fiziki şəxs ümumilikdə 3,6 milyon manat cərimələnib.
Dostları ilə paylaş: |
