Óz betinshe jumisi nókis-2023 Tema: Bank amanatı shártnaması

3.Amanattıń qaytarılıwın támiyinlew

Bank qabıl etip alǵan amanatlardıń qaytarılıwın támiyinlew ushın paydalanıwı shárt bolǵan qurallar hám usıllar nızam menen hám bank amanatı shártnaması menen belgilenedi.

Bank amanatshınıń talabına muwapıq amanattıń qaytarılıwı támiyinlengenligi haqqında xabar beriwi shárt.
Bank amanattıń qaytarılıshın támiyinlew boyınsha minnetlemelerin atqarmaǵan, sonıń menen birge támiynattı joǵaltǵan yamasa onıń shártlerin jamanlastırǵan jaģdayda, amanatshı bankten amanat summasın tezlik penen qaytarıp beriwdi, Puqaralıq Kodeksiniń 327-statyasına muwapıq oǵan procentler tólewdi hám de ózine jetkizilgen zıyandı qaplawdı talap etiwge haqılı.
Bank amanatshınıń amanattı yamasa onıń bir bólegin qaytarıw haqqındaǵı talabın Puqaralıq Kodeksiniń 762-statyasında názerde tutılǵan múddetlerde orınlamaģan jaģdayda, Puqaralıq Kodeksiniń 327-statyasına muwapıq bank amanatqa procentler tólewge qaramastan, keltirilgen zıyandı tólewi shárt.
Eger bank amanatı shártnamasında basqasha tártip názerde tutılǵan bolmasa, amanatqa úshinshi shaxslardan amanatshınıń esapbeti haqqındaǵı zárúr maǵlıwmatlardı kórsetken halda túsken pul qarjıları kiritip qoyıladı. Bunda amanatshı bunday shaxslarǵa amanat boyınsha esapbet tuwrısındaǵı zárúr maǵlıwmatlardı beriw menen olardan pul qarjların alıwǵa razı bolǵan dep esaplanadı.
Amanat bankke arnawlı bir úshinshi shaxs paydasına qoyılıwı múmkin.
Atına amanat qoyılıp atırǵan puqaranıń atın yamasa yuridikalıq shaxstıń atınıń kórsetiw bank amanatı haqqındaǵı tiyisli shártnamanıń zárúrli shárti bolıp tabıladı.
Eger shártnamada basqasha tártip názerde tutılǵan bolmasa, atına amanat qoyılǵan úshinshi shaxs pul óz esapbetine kelip túsken waqıttan baslap amanatshı huqıqların qolǵa kiritedi.
Atına amanat qoyılǵan úshinshi shaxs odan bas tartqan jaǵdaylarda úshinshi shaxs atına bank amanatı shártnaması dúzgen shaxs amanattı qaytarıp beriwdi talap etiwge yamasa onı óz atına ótkeriwge haqılı.
Eger táreplerdiń shártlesiwinde basqasha tártip názerde tutılǵan bolmasa, puqara menen bank amanatı shártnaması dúziw hám de onıń esapbetine amanat boyınsha pul qarjların kiritip qoyıw amanat dáptershesi menen tastıyıqlanadi.
Amanat dáptershesinde banktiń yamasa onıń tiyisli filialınıń atı, onıń jaylasqan mánzili hám de amanat boyınsha esapbet nomeri, sonıń menen birge esapbetke kiritilgen hámme pul qarjıları summası, esapbetten óshirilgen hámme pul qarjları summası hám amanat dáptershesi bankke usınıs etilgen waqıtta esapbetdegi pul qarjlarınıń qaldıg'ı kórsetilgen hám tastıyıqlanǵan bolıwı shárt.

Eger amanattıń basqa jaǵdayı tastıyıqlanģan bolmasa, amanat haqqında amanat dáptershesinde kórsetilgen maǵlıwmatlar bank penen amanatshı ortasında amanat boyınsha esap-kitaplardı ámelge asırıw ushın tiykar boladı.

Bank amanatı shártnamasında iyesiniń atı jazılǵan amanat dáptershesin beriw názerde tutıladı.
Bank amanat dáptershesi usınıs etilgeninde amanattı beredi, oǵan procentler tóleydi hám de amanatshınıń amanat boyınsha esapbetdegi pul qarjların basqa shaxslarǵa ótkeriw haqqındaǵı tapsırması orınlanadı.
Eger iyesiniń atı jazılǵan amanat dáptershesi joǵatılǵan bolsa yamasa usınıw ushın jaramsız halǵa keltirilgen bolsa, bank amanatshınıń arzasına muwapıq oǵan jańa amanat dáptershesi beredi.
Amanat (depozit) sertifikatı iyesiniń atı jazılǵan qımbatlı qaǵaz bolıp, bankke qoyılǵan amanat summasın da, amanatshınıń (sertifikat saqlawshınıń ) belgilengen múddet tamam bolǵanınan keyin sertifikattı bergen bankte yamasa bul banktiń qálegen filialında amanat summasın hám sertifikatda kórsetip qoyılǵan procentlerdi alıw huqıqın da tastıyıqlaydı.
Amanat (depozit) sertifikatı pul tólew ushın múddetinen aldın usınıs etilgen jaģdayda bank, eger sertifikattıń shártlerinde procentlerdiń basqasha muǵdarı belgilep qoyılǵan bolmasa, amanat summasın hám talap etip alınģanģa shekem saqlanatuǵın amanatlar boyınsha tólenetuǵın procentlerdi tóleydi.