Ózbekstan respublikasí sanlí texnologiyalar ministrligi muhammed al-xorezmiy atindaǵÍ tashkent informaciyalíq texnologiyalarí universiteti

MENIŃ STUDENTLIK BÁNDIRGIM
Annotaciya: Bul maqalada Ózbekstan Respublikası Prezidenti Sh.M.Mirziyoyevtiń jaslar máselesi boyınsha kóp ǵana inkaniyatlar, jeńillikler jaratılǵan shárayatlardan aqılǵa muwapıq paydalanıp atırǵan jas óspirimler qatarındaǵı Bibinurdıń arzıw-umtılısları, erisken nátiyjeleri haqqında sóz etiledi.
Insan ózi árman etken qalıs niyetine jetken payıtında shadlıǵı tolıp-tasıp, aspanlarǵa párwaz etedi. Test juwapları shıǵıp, mámleketlik grant tiykarında studentlikke usınıs etilgenimdi bilgenimdegi máwritler bir ómirge yadıma mórlenip qalǵan bolsa kerek. Bunıń ushın mıń shúkirshilik etemen. Endi men Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń Veterinariya diagnostikası hám laboratoriya isi qánigeliginiń 1-kurs studentimen. Qálbimde keship atırǵan sezimlerdi sóz benen bayan ete almayman. Qaraózek rayonınan paytaxtqa kelip, oqıwǵa hújjetlerimdi tapsırmastan aldın ata-anam menen oylasıp, usı oqıw ornın birgelikte tańladıq. Sebebi, bul dárgaydıń ashılǵanlıǵına ele kóp waqıt tolmaǵanlıǵına qaramay, jaslar usı jerde oqıwdı háwes etetuǵınday jetiskenliklerge erisip kiyatırǵanlıǵı hám Qaraqalpaqstandaǵı joqarı oqıw orınları arasında óz ornına iye bolıp úlgergenligi ayrıqsha itibarımdı tarttı. Jańa oqıw jılın baslap alǵanımızda, biz student-jaslar qunt penen bilim alıwımız ushın jaratılǵan keń sharayatlar menen jaqınnan tanısıp jáne de quwanıshqa bólendim. Húrmetli Prezidentimizdiń óz shıǵıp sóylewlerinde biz jaslarǵa bildirgen úlken isenimi maǵan bárqulla tasqın ǵayrat baǵıshlaydı. Sol sebepli óz aldıma úlken maqsetlerdi qoyıp, keleshekte elimizdiń rawajlanıwına salmaqlı úlesimdi qosqım keledi. Men jetip kelgen studentlik bándirgisi árman hám maqsetlerimniń ámelge
asıwına jol ashıp beriwine isenimim kámil. Aldaǵı waqıtta mennen tek ǵana jaratılǵan imkaniyatlardan únemli paydalanıp, oqıtıwshılar bergen bilimlerdi puqta ózlestirip, óz ústimde tınbay izleniw ǵana talap etiledi. Házirgi tez pát penen rawajlanıp atırǵan zamanda jumıs beriwshiler jáhán standartlarına sáykes, zamanagóy bilimge iye, básekiles kadrlardı jumısqa alıwdı qáleydi. Bilim beriw sapası artıp barǵan sayın talap ta soǵan jarasa joqarılay beredi. Mine usılardı inabatqa alıp oqıw dárgayları da zaman menen teń qádem basıwǵa úyrenip atır. Bilimlendiriw tarawına qaratılıp atırǵan ayrıqsha itibardıń gúwası bolıw hám onıń bir bólegine aylanıw adamdı sheksiz baxıtqa bóleydi eken. Men tańlaǵan oqıw ornı bizge zamanagóy bilim hám kónlikpelerdi bere alıwına isenemen. 2022-2023-oqıw jılı ushın studentlikke qabıl etilgenlerdiń 39 962 si mámleketlik grant tiykarında bilim alıw baxtına miyasar boldı. Kúndizgi bilimlendiriw túri boyınsha 118 352 abiturient student sıpatında oqıwǵa kabıl etildi. Sanlarǵa itibar berip qarasaq, ótken 2021-2022-oqıw jılına salıstırǵanda artqanlıǵın kóremiz. Bul bolsa mámleketimizde jaslardı joqarı bilimlendiriwge qamtıp alıw kórsetkishi asıp atırǵanlıǵın dálilleydi. Men jaslarǵa ayrıqsha itibar qaratılǵan usınday abat eldiń baxıtlı studentine aylanǵanımnan júdá quwanıshlıman. Ózimniń qoynıma sıymay atırǵan bul úlken quwanıshımdı Respublikamız jaslarınıń súyip oqıytuǵın «Qaraqalpaqstan jasları» gazetası arqalı men sıyaqlı student bolıw baxıtına miyasar bolǵan doslarım menen bóliskim keldi. Joqarı oqıw ornınıń studentlerin jańa oqıw jılı menen qızǵın túrde qutlıqlap, oqıwlarında tasqın tabıslar tilep qalaman.
Bibinur BAZARBAEVA,
Samarqand mámleketlik veterinariya medicinası,
sharwashılıq hám biotexnologiyalar universiteti
Nókis filialınıń 1-kurs studenti.