Pedagogik asoslari

OILADA BOLALARNI MA’NAVIY-AXLOQIY TARBIYALASHDA MILLIY QADRIYATLARDAN FOYDALANISHNING

PEDAGOGIK ASOSLARI

ADU

Kattta o`qituvchi: I.A.OXUNOV,

Talaba: O`.HAYDAROVA

O‘zbek xalqi qadimdan oila ma’naviyatiga alohida e’tibor qaratgan. Bugungi kunda ma’naviy merosdan foydalanib, mustaqil respublikamiz talabiga javob beradigan yoshlarni tarbiyalash har bir oilaning muqaddas burchidir.

Bu burchni sharaf bilan ado etish oilada yosh avlod ongiga avlodlar shajarasi, kasb-kori, urf-odatlari, an’analari, tarbiya usullari, jamiyat taraqqiyotidagi o’rni, o’ziga xos ijobiy tarixini singdirish, undan g’ururlanish hissini tarbiyalashdan boshlanadi. O’z ota-onasidan, oilasi, avlod-ajdodlari tarixidan g’ururlangan inson o’z o’lkasi, millati, xalqi, tili, diii, madaniyatidan g’ururlanishi, Uni avaylab -asrashi, dunyoga ko’z-ko’z qilishi tabiiydir. Buning uchun oilada bolaning ongiga yoshlikdan boshlab «sen tarixi boy, ulug’ millatning farzandisan», «sen ulug’ mutafakkirlar, allomai-zamonlarni dunyoga keltirib, tarbiyalagan bobokalonlarning ajdodisan», «o’zbek xalqi boy ma’naviyatli, vatanga, xalqqa, sadoqatli xalq», «Bizning mamlakat dunyoda tabiati eng go’zal, boy diyor» kabi tushunchalarni singdirib bormoq lozim.

Yurtboshimiz I.Karimov ta’kidlaganidek: «Har bir insonning, ayniqsa, endigina hayotga qadam qo’yib kelayotgan yoshlarning ongiga shunday fikrni singdirish kerakki, ular o’rtaga qo’yilgan maqsadlarga erishishi o’zlariga bog’liq ekanligini, ya’ni bu narsa ularning sobitqadam shijoatiga, to’la-to’kis fidokorligiga va cheksiz mehnatsevarligiga bog’liq ekanini anglab yetishlari kerak. Xuddi shu narsa davlatimiz va xalqimiz ravnaq topishining asosiy shartidir». Shu boisdan ham, yoshlar tarbiyasiga alohida e’tibor berish, ularni jamiyatimizning ijtimoiy, iqtisodiy va ma’naviy taraqqiyotida faol ishtirok etishlarini ta’minlash har bir oilaning, fuqaroning, davlat va nodavlat tashkilotlarining burch va vazifasi hisoblanadi.

Yurtboshimiz o’zlarining nutqlarida yoshlar tarbiyasi, oilada tarbiya masalasiga barchaning diqqatini qaratayotgani bejiz emas, chunki XXI asrda yashab samarali mehnat qilish, O’zbekistonning buyuk kelajagini bunyod etish asosan, bugungi yosh avlod zimmasiga tushadi. Shuning uchun yoshlarni chuqur bilimli, yuksak madaniyatli, mehnatsevar va tashabbuskor shaxslar etib shakllantirish oilada hayot tajribasiga ega, turmushning achchiq-chuchugini ko’rgan, qiyinchiliklarda toblangan yoshi ulug’larimiz, faxriylarimiz va ota-onalarning, shu bilan birga, mazkur ishga da’vat etilgan tarbiyachilar va jamoatchilikning asosiy vazifasidir.

Sir emaski, ma’naviy-ma’rifiy islohotlarning mazmun va mohiyatini teran anglamaslik, loqaydlik, mahalliychilik, ma’naviy va moddiy qadriyatlarga beparvolik oila ma’naviyatiga salbiy ta’sir etuvchi illatlardir. Buning oldini olishning muhim vositalaridan biri oilada bo’sh vaqtni samarali tashkil etishdan iboratdir.

Oilada bolalarni ma’naviy-axloqiy tarbiyalashda milliy qadriyatlardan foydalanishning mazmun-mohiyatini yurtboshimiz asarlaridagi g‘oyalardan kelib chiqqan holda, «o‘quvchilarni milliy va umuminsoniy qadriyatlarga tayangan holda komil inson etib tarbiyalash» jarayoni sifatida izohlash mumkin bo‘ladi.

Oilada bolalarni ma’naviy-axloqiy tarbiyalashda milliy qadriyatlardan foydalanish sohasini tadqiqot asoslariga ko‘ra quyidagi yo‘nalishlarda o‘rganilganligini qayd etish mumkin bo‘ladi:

Oilaviy tarbiyada milliy qadriyatlardan foydalanishning qadimgi asoslari. Bu asosan, islom dinigacha bo‘lgan davrlarni o‘z ichiga olgan asarlarda (qo’lyozmalar, “Avesto” kitobi, tosh bitiklari va osori-atiqalarda) o‘z aksini topgan.

Oilaviy tarbiyada milliy-diniy qadriyatlar ta’sirining islomiy asoslari. Bu asoslar buyuk tafsirchilar, hadisshunoslar, mutassavuf olimlar qarashlarida, Qur’oni Karimda, Hadisi Sharifda hamda O‘rta asr yozma manbalarida mujassamlashgan.

Oilaviy tarbiyada insoniy qadriyatlar ta’sirining qomusiy allomalar hamda mumtoz adabiyot vakillari tomonidan yoritilishi va ularning g‘oyalariga tayangan asoslar. Ushbu asoslar Abu Nasr Forobiy, Abu Rayhon Beruniy, Abu Ali ibn Sino, Mahmud Qoshg‘ariy, Yusuf Xos Hojib, Muslihiddin Sa’diy, Alisher Navoiy, Husayn Voiz Koshifiy, Zahiriddin Muhammad Bobur kabi allomalar asarlarida o‘z aksini topgan. Bu yo‘nalishdagi asarlar orasida ayniqsa, Unsurul Maoliy Kaykovusning «Kobusnoma» didaktik asari muhim o‘rin egallaydi. Unda oilaviy tarbiya va milliy qadriyatlarning barcha qirralari o‘ziga xos munosabatlar tarzida yoritilgan.

Oilada bolalarni milliy qadriyatlar asosida ma’naviy–axloqiy tarbiyalashning ma’rifatparvar jadidchilik g‘oyalaridagi asoslari. Bu asoslar o‘lkamizda Maxmudxo‘ja Behbudiy, Munavvar Qori, Abdulla Avloniy, Sadriddin Ayniy, Abdurauf Fitrat asarlarida keng yoritilgan .

Oilaviy tarbiyada bolalar ma’naviy-axloqiy tarbiyasini milliy qadriyatlar asosidi tarbiyalashning sho‘ro davri asoslari. Bu asoslar sho‘rolar davri me’yoriy hujjatlari va pedagogikaga oid asrlarida aks etadi .

Oilaviy tarbiyada milliy qadriyatlarni joriy etishning milliy istiqlol g‘oyasi asoslari. Bu yo‘nalish asoslari «Ta’lim to‘g‘risida»gi Qonun, “Kadrlar tayorlash milliy dasturi”, milliy istiqlol g‘oyasida mujassamlashgandir.

Oilaviy tarbiyada bolalar ma’naviy-axloqiy tarbiyasini milliy qadriyatlar asosida shakllantirish sohasi bo‘yicha olib borilgan ishlar hamda asarlar tahliliga oid ma’lumotlardan kelib chiqqan holda quyidagilarni qayd etish mumkin:

Oilaviy tarbiyaning milliy qadriyatlar bilan bog‘liq asoslari qadimda urug‘-qabila munosabatlari hamda patriarxal oila tizimidan kelib chiqadi. Uning qisqacha tarzda izohlanishi «Avesto» da «Ezgu fikr, ezgu so‘z, ezgu amal» kabi gumanistik «uchlikda» namoyon bo‘ladi.

Oilaviy tarbiyada milliy qadriyatlardan foydalanishning O‘rta asrlar davri bo‘yicha quyidagi qisqacha mulohazalarni kiritish lozim bo’ladi: oilaviy tarbiyaning islomiy qadriyatlari «tafsirchilikda - iymon», «Xadisshunoslikda - amal» «tasavvufchilikda - haqiqat» sifatida bolalar ongiga singdirilib borilgan. Oilaviy tarbiyada Alloh kalomi va Payg‘ambarimiz sunnatlari orqali milliy qadriyatlarning sindirilib borishi, ularda ma’naviy-axloqiy tarbiya ko‘nikmalarni shakllantirib borish bilan bir qatorda, ularda o‘ziga xos e’tiqodni ham yuzaga keltiradi.

Oilaviy tarbiyaning milliy qadriyatlar jihatlari qomusiy allomalar ijodida «Ruh va aql munosabati » (Forobiy ), «ruhni anglash» (ibn Sino), «aqlni charxlash» (Beruniy ), «Qadimgi tarix va yodgorliklarga e’tiqod» (Beruniy, Ulug‘bek) kabi asoslar sifatida namoyon bo‘ladi. Ularning qarashlarida har bir yo‘nalish o‘zining pedagogik (psixologik, didaktik) asoslangan chuqur mulohazalarga ega.

Oilaviy tarbiyada milliy qadriyatlarning aks etishi mumtoz adabiyotda «Insonparvarlik», «Adolat», «Ezgulik», «Erkinlik», «Halol mehnat», «To‘g‘ri so‘zlik», «O‘zaro yordam» va «Go‘zallik»ni madh etish hamda insoniyatni shunga chorlash sifatida kuzatiladi. Bu adabiyot o‘zining insonparvarlik asoslari bilan bir qatorda, bir vaqtning o‘zida barcha davrlar uchun ham hayotiy ekanligini namoyon etib kelmoqda, uning hayotbaxsh qirralari Navoiy «Xamsa» si, Bobur g‘azallari, Xayyom «To‘rtliklari», Sa’diy «Bo‘stoni», Firdavsiy «Shohnoma»si, Qoshg‘ariy naqllari va Nodira ko‘z yoshlari kabilarda yorqin namoyon bo‘ladi.

Ma’lumki, jamiyat taraqqiyotida oila va milliy qadriyatlarning rivojlanishi yonma-yon kechgan o‘zaro bog‘liq va uzluksiz jarayondir. Ularning rivojlanish shakllari turlicha kechgan bo‘lsa-da, o‘zining ijtimoiy–iqtisodiy asoslari jihatdan ularni bir qancha umumiyliklar bog‘lab turadi. Shunday umumiyliklardan biri bu tarbiya sohasidir.