1-mavzu: pedagogik mahorat haqida tushuncha, uning o ’qituvchi kasbiy faoliyatida tutgan o’rni va ahamiyati. Ma`Ruza mashg`uloti rejasi

1.1.Pedagogik mahorat va uning ta’lim –tarbiya tizimida tutgan o‘rni.
Yangi insonni shakllantirish masalasining ko‘p qirrali va murakkabligi pedagogik mahorat muammosining hozirgi zamon tarbiya nazariyasi va praktikasi uchun muhimligini ko‘rsatib beradi. Chunki hamma vaqt insonni har tomonlama mukammal tarbiyalash, uning kelajagini belgilash borasida tarbiyachi pedagog mahorati, uning yetukligi, chuqur kasbiy bilimi, ko‘nikma va malakasi, maxsus bilim va tajribasisiz erishib bo‘lmaydi. Zero, pedagogik mahorat barcha o‘quv-tarbiyaviy faoliyatning eng qulay yo‘llarini belgilaydi, hamda har bir pedagogdan o‘quvchi shaxsning barcha tomonlarini rivojlantirish va takomillashtirishga doir kasbiy bilim, tajribaga ega bo‘lishni talab etadi.
Hozirgi pedagogik ta’lim yo‘nalishi bo‘lajak pedagog mutaxassislarning ijodiy qobiliyatlarini rivojlantirish uchun yetarli sharoitlarni belgilab berishi kerakki, natijada o‘sha mutaxassisni chuqur ilmiy bilim kasbiy-pedagogik tayyorgarlikka ega bo‘lishiga olib kelsin. Huddi shu maqsadda Respublikamizning barcha oliy o‘quv yurtlarining o‘quv rejasiga ko‘ra “Pedagogik mahorat” kursi kiritildi va o‘qitila boshladi. Albatta bunga qadar ushbu muammo bo‘yicha shug‘ullangan Rossiyalik taniqli pedagoglardan V.A. Slastenin, A.I. Piskunov, A.P. Petrovskiy, V.K. Rozov, L.F. Spirin va boshqalarning ishlarini aytib o‘tish o‘rinli. Ularning tadqiqot ishlarida pedagogik mahoratni shakllantirish yo‘llari haqida fikr yuritiladi.
Umuman olganda, psixologik - pedagogik fanlar tizimida va amaliyotda juda katta tajriba, bilimlar manbai, tavsiyalar to‘plangan bo‘lib, bular o‘qituvchilarga, bo‘lg‘usi pedagoglarga ma’lum tizim holida yetib borishi, ular ijodiy imkoniyatlari rivojiga ta’sir etishi zarur. Lekin mavjud pedagogik-psixologik va metodika bo‘yicha darsliklarda pedagogik mahorat masalasiga kam e’tibor berilgan. Bu esa ana shunday bilimlarni - tizimlashtirilgan va ayniqsa, oliy ma’lumotli pedagoglarni tayyorlash uchun zarur bo‘lgan qo‘llanmalar yaratish zaruriyatini keltirib chiqaradi. Ana shunday yaxlit tarzda yaratilgan I.A.Zyazyun rahbarligida Moskvada, 1989 yilda nashr etilgan «Основы пeдагогичeского мастeрства» nomli o‘quv qo‘llanmasi mavjud xolos.
Hozirgi zamon uzluksiz talim tizimida bo‘lajak mutaxassislarning ijodiy qobiliyatlarini rivojlantirish uchun sharoit yaratish, chuqur ilmiy, kasbiy pedagogik tayyorgarlikka erishishga imkon yaratilishini nazarda tutadi.
Psixologik - pedagogik fanlar tizimida bu masalaga ma’lum darajada e’tibor berilgan bo‘lsada, lekin respublikamizda hozirga qadar yaxlit bir tizim tarzida o‘rganilib, talabalarning o‘rganishlari uchun qo‘llanma, darslik ishlab chiqilmagan edi.
«Pedagogik mahorat» kursi esa ta’lim va tarbiyaviy ishlarning asosiy malakalarini hosil qilishga: pedagogik muomala, nutq pedagogikasi, pedagogik o‘zaro ta’sir ko‘rsatish, pedagog - psixik holatini mustaqil tartibga solib turish, pedagogik ta’sir ko‘rsatish dramaturgiyasi va rejissurasi, fikrlash madaniyati, o‘quvchilar bilan muomala madaniyati, xulqini, o‘z-o‘zini boshqarish madaniyati, turli pedagogik treninglar va ularning elementlarini shakllantirish masalalariga qaratilgan.