15-lekcíYA. ǴAwashaniń qatar aralarina íslew beríw hám suwǵariw. ǴAwashani tóGÍNLEw hám chekankalaw. Paxtani jiynap teríp aliw reje

15-LEKCÍYA. ǴAWASHANIŃ QATAR ARALARINA ÍSLEW BERÍW HÁM SUWǴARIW. ǴAWASHANI TÓGÍNLEW HÁM CHEKANKALAW. PAXTANI JIYNAP TERÍP ALIW
Reje

1. 
   Ǵawashanıń qatar aralarına islew beriw hám suwǵarıw.
   
2. 
   Ǵawashanı tóginlew hám chekankalaw.
   
3. 
   Paxtanı jıynap terip alıw
   

Ǵawashanıń qatar aralarına islew beriw hám suwǵarıw.

Paxtadan joqarı hasıl alıw ushın ǵawasha qatar aralarına islew beriw, birlew, tóginlew suwǵarıwǵa usaǵan áhmiyetli agrotexnikalıq ilajlarǵa ámel etiw kerek. Shigit egilgennen soń topıraq tıǵızlanıp qaladı. Bul jaǵday báhár jawıngershilikli bolǵanda kóbirek bayqaladı. Bunday jaǵdayda ǵawasha qatar aralarına óz waqtında islew berilse, topıraqta hawa rejimi jaqsılanadı, topıraq jaqsı qızadı, tamır shiriw hám basqa kesellikler azayadı. Jabayı shópler kóbeyiwiniń aldı alınadı hám ǵawasha tamırınıń rawajlanıwı ushın qolaylı sharayat jaratıladı. Íslew beriw tiykarınan shigit egilgennen soń baslanadı. Ǵawasha qatar aralarına islew beriwde kultivatordıń jumıs organları ǵawashanıń fazasına, topıraqtıń jaǵdayına qarap, imkaniyatına qarap keńirek hám belgilengen tereńlikte isleytuǵın etip ornatılıwı kerek.Rotatsiyalıq jumısshı bólimlerden paydalanıw kultivatsiya waqtında atızdıń barlıq bólegin jumsartıw, usı waqıtta topıraqtan ıǵallılıqtıń parlanıwın kemeyttiriw hám ósimliktiń háwij alıp rawajlanıwı ushın qolaylı sharayat jaratıw imkaniyatın beredi.Paxta atızlarında báhárden baslap jabayı shóplerde ósip shıǵa baslaydı. Olar tiykarınan bir hám kóp jıllıq shópler bolıp tamırı hám tuqımnan kóbeyedi. Shigitti keń qatarlap egiwge ótiw hám ǵawashanıń keń qatarlarda ósirip, qarıqlardıń tereń jumsartılıwı, gerbidtsidlerden paydalanıw, jabayı shóplerdiń keskin azayıwına hám ketpen menen bosastırıw imkaniyatın beredi. Ǵawashanıń ósiw dáwirinde gerbitsidlerden paydalanıw otawdı kemeyttiredi. Sonı da aytıw kerek, eger jabayı shópler otalsa hám topıraq jumsartılsa kóp jıllıq shóplerdiń tamırları jıynastırılıp, atızdan sırtqa shıǵarıp taslanıwı kerek. Sonday islengende ǵana jabayı shóp basqan atızdı úsh- tórt jıl ishinde kóp jıllıq jabayı shóplerden tazalap alıw múmkin boladı. Bunnan tısqarı, atızdı erte báhárde egiske tayarlaw dáwirinde tırmalaǵanda kóplegen tamırlar tırma menen jerdiń ústine shıǵadı. Sonda bul tamırlar terip taslansa, kóp jıllıq jabayı shópler atızda bir qansha azayadı.