2-soat Reja: O‘rta asrlarda Yevropa tilshunosligi Arab tilshunosligi

Ruhoniy Anselm (1033-1109) boshchiligidagi realizm ta’limotiga ko’ra faqat umumiy tushunchalargina (masalan, daraxt tushunchasi, harakat tushunchasi va b.) real mavjud. Ushbu tushunchalarga muvofiq keluvchi predmet va hodisalar esa ularning kuchsiz nusxasi, xolos. Yana ham anig’i obyektiv dunyo umumiy tushunchalardangina iborat. Ayni tushunchalarda qayd etilgan, ifodalangan predmet va hodisalar esa o’sha tushunchalarning yuzaki nusxasi (kopiyasi) dir.
Rossellin (1050-1110) boshchiligidagi nominalizm ta’limoti esa, haqiqatga to’la muvofiq, real tarzda faqat o’ziga xos xususiyatlarga, belgilarga ega bo’lgan narsa, predmet, hodisalargina mavjud, degan g’oyani ilgari suradi.
Bizning tafakkurimiz orqali ushbu predmet va hodisalardan chiqariluvchi umumiy tushunchalar esa, deyishadi, bu ta’limot vakillari, real, aniq mavjud bo’lmaydi. Ular inson tafakkurining mahsuli hisoblanadi, fikrlash faoliyati tufayli hosil bo’ladi, yuzaga keladi.
Pyer Abelyar (1079 -1142) boshchiligidagi konseptualistlar (mo’tadil nominalistlar) ham mutlaqo to’g’ri holda real tarzda faqat alohida narsalar mavjud, ular umumiy tushunchalarimiz-ning asosi bo’lib xizmat qiladi, deyishadi.
Konseptualistlar umumiy tushunchalar alohida mavjud bo’lmaydi, balki real mavjud narsa - predmetlardan hosil qilinib, narsa, predmet va hodisalarning xususiyatlarini aks ettiradi, deydi. Ushbu fikr hozirda ham tilshunoslik fanida tan olingan. Chunki bu g’oya obyektiv haqiqatga to’la muvofiq keladi.
Arab tilshunosligi
VII-VIII asrlarda Araviya hududida va arablar tomonidan bosib olingan qator mamlakatlarda - Old Osiyo, Shimoliy Amerika hamda Pireney yarim orolida - jahon miqyosidagi mamlakat - Arab xalifaligi tashkil topdi.
Arab xalifaligi islom diniga asoslangan ko’pmillatli davlat bhlib, xalifatda ish yuritish vositasi va fan tili arab tili hisoblangan.
Arab xalifaligida tilshunoslikning paydo bo’lishi va rivojlanishi, Hindistondagi kabi, amaliy ehtiyojlar bilan bog’lanadi. Ya’ni bu davrda eski yodgorliklar va Qur’on tili bilan jonli arab tili (shevalari) orasida katta farqlanish yuzaga keladi.
Bir tomondan musulmon dunyosining muqaddas diniy kitobi bo’lgan
«Qur’on»ni tushunarli qilish, undagi so’zlarni to’g’ri va aniq talaffuz qilish, ikkinchi tomondan, klassik arab tilini shevalar ta’siridan saqlash maqsadida arab olimlari til masalalari bilan jiddiy shug’ullanishga kirishdilar.
Arab tilshunosligi o’z taraqqiyoti davrida hind va yunon tilshunosligi yutuqlariga, ananalariga tanqidiy va ijobiy yondashgan. Arablar o’z tillarining xususiyatlaridan kelib chiqqan holda ulardan foydalanganlar.
VII-VIII asr arab tilshunosligining dastlabki markazlari Iroqning Basra va Kufa shaharlari hisoblangan. Basra va Kufa shaharlarida ikkita lisoniy maktab tashkil topgan bo’lib, ular o’rtasida tilshunoslikning ko’pgina masalalari yuzasidan «fikrlar jangi», qizg’in bahslar, munozaralar olib borilgan.
Ushbu lisoniy munozaralar tilshunoslik fanining markazi Arab xalifaligining poytaxti bo’lgan Bog’dod shahriga ko’chirilgandan so’ng to’xtagan.
Arab tilshunosligining asoschilaridan biri Basra grammatika maktabining vakili
Xalil al - Farohidi (taxminan 718-791y) birinchi arab tili lug’atini yaratdi. U lug’atini
«Kitobul ayn» («Ayn harfi kitobi») deb nomlab, unda grammatikaga oid muhim fikrlarni bayon etdi. Shuningdek, olim «Kitobul avomil» («Boshqaruvchilar kitobi») nomli asarni ham yozdi. Ammo bu asarlar bizgacha yetib kelmagan.
Xalil al - Farohidining shogirdi, mashhur arab tilshunosi, kelib chiqishiga ko’ra fors basralik Amir bin Usmon Sibavayxiy (733 yilda vafot etgan) o’zining salmoqli «Al - kitob» asarini yaratdi. Muallif ushbu asarda o’zigacha bo’lgan barcha tadqiqotchilarning ta’limotlarini, fikrlarini, qarashlarini umumlashtiradi. U arab tili grammatikasining tugal va mukammal ko’rinishini taqdim etadi. Ushbu asar har ikkala: Basra va Kufa maktabi vakillari tomonidan bir xilda yuqori baholangan va qadrlangan.
Kelib chiqishiga ko’ra yunon Abu-Abayda (770-837) noyob so’z va ibora, ifodalarning keng qamrovli lug’atini tuzadi.
Bog’dodlik hind Sag’ani (1181-1252) 20 tomlik lug’at yaratadi va uni
«To’lqinlar toshqini» deb nomlaydi.
Misrlik ibn Mansur (1232-1311) katta hajmdagi salmoqli lug’at tuzib, uni «Arab tili» deb ataydi.
Sherozlik fors Feruzobodi (1329-1414) 60 tomlik lug’at tuzgan va uni «Qomus»
(Okean) deb nomlagan. Bundan keyin yaratilgan ko’plab lug’atlar ham «Qomus» nomi bilan ataladigan bo’lgan.
Yuqorida qayd etilgan fikrlardan, keltirilgan asarlardan ma’lum bo’ldiki, arab tilshunoslari leksikografiyaga alohida, jiddiy ahamiyat berganlar. Shuning uchun arab tilshunosligida leksikografik tadqiqotlar muhim o’rinni egallaydi. Arab leksikograflari ayrim predmetlarni anglatadigan sinonimlar lug’atini, masalan, qilichni anglatadigan 500 ta so’z va iboradan, arslonni anglatadigan 500 ta, tusni ifoda etadigan 400 ta so’z va iboradan tashkil topgan ko’plab turli mavzudagi lug’atlarni tuzganlar.
Demak, arab tilshunoslari leksikografiya sohasida juda katta yutuqlarga erishganlar.
Xullas, arab leksikografiyasida lug’atlar mazmuniga ko’ra olti guruhga bo’linadi: 1. To’liq izohli lug’atlar. 2. Predmet lug’atlari (masalan, hayvonlar bilan bog’liq lug’atlar va b). 3. Sinonimlar lug’ati. 4. Noyob so’zlar lug’ati. 5. o’zlashgan so’zlar lug’ati. 6. Tarjima lug’atlari.
Arab leksikografiyasi Sharq - Eron, Turkiya, qisman hind xalqlariga ham,
Yevropa xalqlariga ham katta ta’sir ko’rsatdi.
Arab tilshunoslari, yunon tilshunoslaridan farqli, fonetika masalalariga g’oyat sezgirlik bilan munosabatda bo’lganlar. Ular tovush va harfni, yunonlardan farqli, qat’iyan farqlaganlar. Shuningdek, harf termini bilan faqat yordamchi so’z va affikslarnigina emas, balki nutq tovushini, aloma termini bilan esa tovushning yozuvdagi ko’rinishini, ya’ni harfni ifodalaganlar.
Arablar unli va undosh tovushlarni farqlab, undoshni mohiyat, unlini esa o’tkinchi deb ta’riflaganlar va arab so’zlarida (o’zaklarida) undosh tovushlarning asosiy rol o’ynashini ta’kidlaganlar. Qiyoslang: kitob, kotib, kutub. Shunga ko’ra ular uch undoshli o’zaklarni alohida ajratganlar.
Arab tilida o’zak 3 (ba’zan 4) undoshdan iborat bo’lib, so’z va so’z formalarini yasash paytida bu undoshlar orasidagi unli tovushlar o’zgartiriladi (kitob, kotib, kutub). So’zning bunday tuzilishi fleksiya (egilish) haqidagi ta’limotni yaratishga olib keldi. Shunga ko’ra arab - yahudiy filologiyasida o’zak, so’z yasovchi elementlar tushunchasi bilan birga fleksiya haqidagi tushuncha ham paydo bo’ldi.
Arablar, hindlar kabi, tovushlarni akustik va fiziologik belgilariga ko’ra farqlaganlar. Nutq a’zolari sifatida og’iz bo’shlig’i, burun bo’shlig’i va bo’g’iz hisoblangan. Nutq tovush-larini hosil qilishda bo’g’iz, til, tanglay, milk, tish, lab xizmat qilishi ta’kidlangan.
Arab tilshunosligida sintaksis masalalari, hind va yunonlardagidek, grammatikaning eng bo’sh bo’limi hisoblangan. Shunga qaramasdan arablarda sintaksisning tekshirish obyekti sifatida gap, gapning struktur-semantik tahlili kuzatiladi. Ular gapning kamida ikki so’zdan-ikki otdan yoki ot va fe’ldan iborat bo’lishini, bu so’zlar o’rtasidagi subyekt - predikat munosabatining o’rganilishini to’g’ri ta’kidlaydilar. Gaplarning tuzilishiga ko’ra otli, fe’lli va holli turlarga bo’linishini qayd etdilar. Otli gaplarning ot so’zdan boshlanishini (masalan, Zayd turibdi), fe’lli gaplarning esa fe’l so’zdan (masalan, turgan Zayd) boshlanishini aytadilar.
Otli gapning egasi mubtado (mubtado), kesim esa habar (xabar) deb nomlanadi.
Gapning ikkinchi darajali bo’laklari sifatid 1)to’ldi-ruvchi, 2) hol va 3) izohlovchilar ko’rsatiladi.
So’zlar o’rtasidagi sintaktik munosabatga xizmat qiluvchilar sifatida moslashuv, boshqaruv va bitishuv olinadi. Otli gaplarda ega kesim bilan moslashadi.
Arab tilshunoslari morfologiyada, Aristotel kabi, uchta so’z turkumini-ismun
(ot), fe’lun (fe’l) va harfun (yuklama, yordamchi so’zlar va affikslarni) ajratadilar.
Otni keng ma’noda olib, uning tarkibiga ot, sifat, olmoshlarni ham kiritadilar.
Otlarni atoqli va turdosh otlarga, turdosh otlarni esa aniq va mavhum otlarga ajratadilar. Otlarning son, egalik, kelishik kategoriyalari ancha mukammal tasvirlanadi. Otlarning kelishik kategoriyalari sifatida tushum kelishigi (-ni), jo’nalish kelishigi (-ga, -ka, -g’a), o’rin va payt kelishigi (-da), chiqish kelishigi (-dan) va birgalik kelishigi (bila) qayd etiladi. Qaratqich kelishigi alohida izofa hodisasi sifatida tushuntiriladi. Bosh kelishik haqida so’z yuritilmaydi.
Arab grammatikasining morfologiya qismi Sibavayxiy asarida puxta ishlab chiqilgan. Aniqrog’i, u morfologiyaga oid quyidagi masalalarni tadqiq qiladi: 1. So’z turkumi. 2. o’zakning tuzilishi. 3. Ot va ularning tasnifi. 4. Fe’l va uning shakllari va boshqalar.
Arab tilshunoslarining tadqiqotlarida fe’l markaziy o’rinlardan birini egallaydi. Sibavayxiy o’z ishlarida fe’lning qator grammatik kategoriyalari: o’timlilik, o’timsizlik, nisbat, shaxs, son va boshqalarni qayd etadi. Fe’llarni tuzilishiga ko’ra tub va yasama fe’llarga ajratadi.
Arablarda sonlar birliklar, o’nliklar, yuzliklar va mingliklarga bo’linadi. Olmoshlarning kishilik va o’zlik olmoshlari qayd etiladi, ularning ichki turlari
(masalan, kishilik olmoshlarining uch shaxsi: man, san, o’z, biz, siz, ular) beriladi.
Arab tilshunoslarining asosiy tadqiqot obyektlaridan biri sifatida arab tilining lug’at tarkibi kuzatiladi. Arab leksikologlari so’zlarni turli nuqtai nazardan o’rganadilar. Bu holda ular so’zlarning tuzilishini, ma’nosini, kelib chiqishini, qo’llanish darajasini hisobga oladilar, shunga ko’ra so’zlarga baho beradilar.
Arablar so’zlarning bir ma’noli va ko’p ma’noli bo’lishini aytadilar. Ular so’zlarning ko’p ma’noliligi ayni bir so’zning turli joylarda turli predmet va hodisalarni anglatishidan hosil bo’lishini, ya’ni shuning natijasi ekanligini ta’kidlaydilar. So’zlarning to’g’ri va ko’chma ma’nolarga ega bo’lishini aytib, ko’chma ma’no hosil bo’lishining 12 usulini ishlab chiqadilar.
Arab leksikologiyasida sinonim va antonim so’zlarga alohida e’tibor beriladi va tadqiqotlarda keng o’rin ajratiladi.
Arab tilshunoslari, asosiy e’tiborni o’z ona tillariga qaratishdan tashqari, fors, mo’g’ul va turkiy til masalalari bilan ham shug’ullanganlar.
Turkiy til masalalari bo’yicha tilshunos Asiruddin Abu Hayyon al - Andalusiy (1256-1344) qator asarlar yaratdi. Ma’lumotlarga qaraganda bu asarlarning o’ndan ortig’i bizgacha yetib kelgan. Masalan, 1. «Kitobul af’ol fillisoniy turkiya» («Turk tilidan ish kitobi»). 2. «Kitob zahvul mulk finnahvit turkiya» («Turk sintaksisi sohasidan yorqin kitob»). 3. «Adduratul mudita fil lug’atit turkiya» («Turk tili tarixi») 4. «Kitob al idroki lisonul atrok» («Turklar tilini tushunish kitobi»).
«Turklar tilini tushunish» kitobi 1312 yilda arab tilida yozilgan bo’lib, kirish, lug’at va grammatika bo’limlaridan tashkil topgan. Muallif asarning kirish qismida til sistemasining tuzilish elementlari - tashkil qiluvchilari sifatida lug’at tarkibini, morfologiya va sintaksisni ko’rsatadilar. Ya’ni u alohida olingan so’zlarning ma’nolarini, so’zlarning turlanishi va tuslanishining qoidalarini hamda so’z birikmalarini qayd etadi.
Asarning lug’at qismida turkiy so’zlar arab alfaviti tartibida joylashtirilgan bo’lib, unda 3000 ga yaqin so’z mavjud.
Asarning morfologiya qismida so’z turkumlari haqida fikr yuritiladi. Bunda ot, fe’l va harf (yordamchi so’zlar va affikslar) alohida qayd etiladi. Turkiy tillarning so’z yasash, so’z o’zgartirish va forma yasash kategoriyalari haqida ma’lumot beriladi.
Asarda sintaksisning so’z birikmasi ta’limotiga to’xtab o’tiladi.
Turkiy tilga bag’ishlangan muallifi noma’lum «At - tuhfatuz zakiyatu fillug’atit turkiya» («Turkiy til haqida noyob tuhfa») asari ham bo’lib, u XIV asrga oid deb taxmin qilinadi. Arab tilida yozilgan bu manba prof. S.Mutallibov tarjimasida o’zbek tilida 1968 yilda Toshkentda nashr qilingan. 1978 yilda esa asar akad. E.Fozilov va
M.T.Ziyayevlar tomonidan rus tiliga hgirilib, «Iziskanniy dar tyurkskomu yaziku» nomi ostida (akad. A.N.Kononov muharrirligida) Toshkentda chop etildi.
Asarda qipchoq shevasining lug’at tarkibi va grammatik qurilishi tasvirlanadi.
Tadqiqot uch bo’limdan: 1. Qisqacha kirish. 2. Lug’at va 3. Grammatikadan tashkil topgan.
Manbaning kirish qismida til va jamiyat masalasiga e’tibor qaratilib, tilning jamiyatdagi vazifasi, o’rni uning tafakkur bilan bog’liqligi haqida fikrlar beriladi.
Muallif: «Inson hayvondan faqat tushunish va til (so’zlash, bizningcha-nutq
R.R) bilangina farq qiladi»,- deydi. Demak, fikrlash va til (nutq) qobilyati faqat insongagina xos ekanligi ta’kidlanadi. Binobarin, inson ana shu qobilyatiga ko’ra o’zgalar bilan, jamiyat a’zolari bilan aloqaga kirishadi, o’zaro aqliy, lisoniy munosabatda bo’ladi.
Ishning kirish qismida, shuningdek, grafika - yozuv bilan bog’liq ayrim masalalar hamda ba’zi tovushlar haqida, tovush-larning fiziologik - talaffuz xususiyatlari hamda talaffuz vaqtida tushib qolish xususiyatlari haqida ma’lumot beri-ladi. Masalan, d: ichir (asli ichdir); b: agar (asli arabcha ab-gar); r: bila (asli birla, birlan); q: sichan (sichqan), tashari
(tashqari), bashar (bashqar); k: ichari (ichkari); ng: aliz (alingiz).¹
Asarning lug’at bo’limida uch mingta turkiy so’z qayd etiladi. Ular arab tiliga tarjima qilinadi, ma’nolariga alohida e’tibor beriladi.
Manbaning grammatikaga oid bo’limida muallif, asosan, morfologiyaga katta e’tibor beradi. Ishda turkiy til gram-matikasi arab tili grammatikasiga qiyoslanadi.
Aniqrog’i, arab tili grammatikasi asosida turkiy til grammatikasi tahlil qilinadi.
Asarda turkiy tildagi so’zlar arab tili grammatikasi asosida uch turkumga ot (ismun), fe’l (fe’lun) va yordamchi so’zlar (harfun)ga ajratiladi. Sifat, son va olmoshlar arab tili an’anasiga muvofiq ot turkumi tarkibiga kiritiladi. Ot ma’no jihatdan atoqli, turdosh, jamlovchi va kichraytish otlariga ajratiladi. Otlarning grammatik kategoriyalari: son, egalik va kelishik kategoriyalari haqida yetarli darajada ma’lumot beriladi. Otlarning son jihatdan birlik va ko’p-likka ega ekanligiga e’tibor qaratiladi. Qiyoslang: at – at-lar; epchi – epchilar (ayol - ayollar).
Otlarda egalik shakllari birlik va ko’plik ko’rinishiga, tuzilishiga ega ekanligi aytiladi. Qiyoslang: bashim, ko’zim-bashimiz, ko’zimiz; bashing, ko’zing - bashingiz, ko’zingiz; bashi, ko’zi - bashlari, ko’zlari.¹
Asarda beshta kelishik kategoriyasi qayd etiladi. Bular: 1. Tushum kelishigi. 2.
Jo’nalish kelishigi (-g’a, -ga, -qa,-ka,-a, ust). 3. o’rin-payt kelishigi (-da). 4. Chiqish kelishigi (-tan,-dan). 5. Birgalik kelishigi (bila).
Asarda sifat haqida ma’lumot beriladi hamda belgining eng ortiqligini ifodalovchi shakllar: -roq, -rak affikslari keltiriladi.
Olmoshlarning - kishilik olmoshlarining uch shaxsi: man, san, o’z; biz, siz, o’zlar - qayd etiladi.
Asarda son turkumining to’rtta darajasi keltiriladi. Bu-lar: birliklar: bir, ikki, uch, besh...; o’nliklar: o’n, yigirma, qirq, elli...; yuzliklar: yuz, ikki yuz, uch yuz, to’rt yuz...; ming-liklar: ikki ming, uch ming, to’rt ming... va boshqalar.
Muallif «At - tuhfa» asarida fe’l (fe’lun) turkumiga atroflicha to’xtaladi. Fe’l turkumining qator grammatik ka-tegoriyalari: zamon, mayl, bo’lishli-bo’lishsizlik, shaxs, o’tim-lilik, nisbatlar haqida fikr yuritadi.
Ishda fe’lning ancha murakkab bo’lgan nisbat kategoriyasi-uning majhullik, birgalik, orttirma va o’zlik nisbatlari haqida ma’lumot beriladi.
Ishda fe’lning o’tgan zamon, hozirgi zamon va kelasi zamon kategoriyalari ham atroflicha yoritiladi.
«At - tuhfa» da harfun - yordamchi so’zlar masalasiga ham e’tibor beriladi.
Turkiy tilda dag’i, taqi, yo’qsa, yo’q, ya, ammo kabi so’zlar bog’lovchi bo’lib kelishi aytiladi. Yuklamalar haqida fikr yuritilgan bo’limda faqat ta’kid yuklamalarigina emas, balki, umuman ma’noni kuchaytirish usullari haqida fikr beriladi. Qiyoslang:
biy-biy (bek-bek); al-al; uk-uk.²
Turkiy tilda undovlarning uchta ekanligi aytiladi. Bular: ey, abav, abu. Masalan:
A kichi! «Ey odam!»
«At - tuhfa» asarida grammatikaga – sintaksisga oid ma’lumotlar ham berilgan bo’lib, uning asosini gap haqidagi fikrlar tashkil qiladi. Gaplar otli va fe’lli gaplarga ajratiladi. Gapning zaruriy, tarkibiy qismlari sifatida ega (mubtado) va kesim (xabar beriladi). Muallif: Biy uydadir, gapini sintaktik jihatdan mutlaqo to’g’ri ega (biy) va kesim (uydadir) kabi bo’laklarga ajratadi.
Ishda, asosan, so’roq gaplar haqida fikr yuritiladi. So’roq gaplarning o’ziga xos xususiyatlari, hosil bo’lishi, so’roq vositalari haqida fikrlar beriladi. Masalan, Biylar keldilarmi? Nadan kularsan? Necha aqchadir? va boshqalar.
Xullas, arab tilshunosligi, umuman, jahon tilshunosligi tarixida yorqin iz qoldirgan bo’lib, Yevropaga hind tilshunosligiga nisbatan ancha oldin ma’lum bo’lgan.
XIII asrning o’rtalarida (1258) Arab xalifaligining poytaxti bo’lgan Bog’dod mo’g’ullar tomonidan bosib olinadi. Natijada xalifalik o’z ichida alohida davlatlarga bo’linib ketadi. Shu bilan arab madaniyatining klassik davri o’zining nihoyasiga yetadi.