Абдулла орипов шеърларига хос бадиий ифода усули

1.2. Shoirning poetik so‘zdan foydalanish mahorati
Obrazli tafakkurning eng serjilo, ta’sirchan va lo‘nda shakli bo‘lgan she’riy asarlarda poetik so‘zning o‘rni o‘zgachadir. Shoir oddiy so‘zlarni muayyan sifatlar yoki iboralar bilan qo‘llaganda kutilmagan ma’nolar, favqulodda ta’sirchan, quyma misralar maydonga keladi. Zotan shoir Abdulla Oripov she’rlarida ipakday mayin, mushki anbardek iforli, xanjardek keskir so‘z va ma’no uyg‘unligi mujassamdir. Ma’lumki, badiiy asar tilini poetik tahlil qilishda poetik nutqning fikr ifodalashdagi imkoniyatlari o‘rganiladi. Darvoqe, buni Abdulla Oripov ijodining umumiy manzarasida ham, ko‘plab she’rlarida ham kuzatiladi. Shoir ona tili imkoniyatlaridan foydalanib, so‘zning ma’nosini kengaytirishga harakat qiladi. Injular tizmasidek jilolangan ona tili lug‘at boyligini botiniy ko‘z bilan ko‘ra olgan shoir har bir so‘zni did bilan tanlaydi; tafakkur tarozisida o‘lchaydi. Original va obrazli ifoda usuli zamirida badiiy mantiq yotadi; tabiiyki, bu mantiq lo‘nda, har qanday sun’iy bezakdan xoli, ixcham shaklda yuzaga chiqadi. Bu shaklning voqe bo‘lishida, avvalo, shoirning didi, tafakkuri va o‘tkir nigohining uyg‘un mutanosibligini ko‘ramiz. Aslida xalq hayotini, turmush tajribalarini kuzatish natijasida ijtimoiy-ruhiy holatlarga oid xulosalar, mantiqiy umumlashmalar og‘zaki ijodda paydo bo‘ladi. Maqol, matal, aforizmlar kabi paremalar avloddan-avlodga o‘tib, xalq badiiy tafakkurida yashab keladi. Bunday hikmatli iboralarda o‘xshatish (istiora, tashbeh, metafora), taqqoslash (antiteza), parallelizm, kinoya, piching va boshqa badiiy tasvir vositalari keng qo‘llanadi. Abdulla Oripov she’riyatida bu kabi tasvir vositalari mavjud, albatta. Masalan, shoirning aksar she’rlarida, qisqa va lo‘nda to‘rtlikarida irsoli masal san’ati qo‘llanganini, muayyan bir fikr isboti yoki his-tuyg‘u ifodasi uchun xalq maqoli, matallarini o‘z o‘rnida ishlatganini kuzatish mumkin. “Yaxshilik va yomonlik” she’rida shoir yozadi:
El aro yuradi bir naql,
Xalq uni takrorlab aytadi.
Kimsaga yomonlik qilmagil,
Bir kuni o‘zingga qaytadi.

Darvoqe, pand bersang bir jonga,

U ham tinch turarmi hech zamon.
Deydilar, tuflasang osmonga
Yuzingga tushgaydir begumon:

Yaxshilik qilsang-chi, sen, biroq,

Qaytari u senga? Bu mubham...
Boshini silasang gohi choq
Qo‘lingni tishlaydi iting ham. (2 jild, 248-bet).

Shoir ushbu she’rda bitta emas, bir nechta hikmatni qalamga olingan mavzu mohiyatiga singdirib yuboradi. Birinchi bandda yaxshilik qadrini ochish uchun unga antiteza bo‘lmish yomonlik to‘g‘risidagi: «Birovga yomonlik qilsang, albatta, senga ham yomonlik qaytadi», degan xalq naqlini keltiradi. Ushbu naqlning: «Birovga choh qazisang, o‘zing yiqilasan» yoki «Birovga yaxshilik qilsang, yaxshilk ko‘rasan» kabi variantlari ham mavjud. SHe’rning ikkinchi bandida «Osmonga tuflasang, betingga tushar» xalq naqlinig bir oz sayqallangan variantini qo‘llaydi. Ayni band mohiyatida ham senga tegmagan, senga ozor yetkazmagan kimgadir tegadigan bo‘lsang, o‘zingga jabr qilgan bo‘lasan, degan mazmun mujassamdir.

Bu o‘rinda yuqoridagi ikkinchi band tahlili munosabati bilan Abdulla Oripov she’rlariga xos bo‘lgan alohida bir xususiyatni ta’kidlashni istar edik. Shoir aksar hollarda aynan xalq naqlini, azaliy haqiqatlarni she’r matnda qo‘llashi jarayonida «Deydilar», «Deydiki» tarzidagi ifodani ko‘p ishlatadi. Shoirning mashhur «Deydilar, it hurar - O‘tadi karvon», misralari bilan boshlanuvchi to‘rtligi fikrimizni isbot etadi. «Deydilar» fe’lida majhullik nisbati bor. Ammo shoirning har bir go‘zal satri shu so‘z ortida xalq donoligining javhari turganini ta’kidlab turadi. Shoir ba’zan dono odam yoki donishmand tildan so‘z aytishga jazm qiladi:
Donishmand dediki,
Osonni kutma,
Imkondan ortiq bir imkonni kutma.
Daryodan daryoni talab aylagil
Va lekin hech qachon ummoni kutma.

Aslida shoirning o‘zi ham donishmand, faylasuf. Uning she’riy misralarida dono fikrlar ko‘p. Shoir aytmoqchiki, har narsaning o‘z o‘lchovi bor, har narsa o‘ziga mos bo‘lsin, iste’dodsizdan san’atni kutma, tuban odamdan saxovat kutma, tuban tuban, yuksak yuksakdir.

“Yaxshilik va yomonlik” she’rining oxirgi bandida shoir it obraziga murojaat qiladi. Aslida, xalq orasida it bilan bog‘liq juda ko‘p naqllar bor. Bu o‘rinda shoir kimga yaxshilik qilishni ham bilgan ma’qul demoqchi. Chunki xalq orasida “It itligini qaladi”, degan hikmat yuradi. Shoir bu kabi hikmatlarni juda yaxshi biladi.
Bu tipdagi misollarning barchasi shoirning xalq qo‘llagan tasvir vositalaridan, uning go‘zal tili va xalq donishmandligidan juda o‘rinli foydalanganini, shoirga xos poetik tafakkurning naqadar xalqona ekanini namoyon etadi.
Abdulla Oripov she’rlarini tadqiqot mavzusi nuqtai nazaridan tekshirganda juda ko‘p o‘rinlarda bevosita «falsafa» yoki «hikmat» so‘zlarining qo‘llangani ko‘zga tashlanadi. SHe’rlaridan ayrimlari «Tulki falsafasi», «Men anglab yetgan falsafa» yoki «Sharq hikmati» kabi sarlavhalar bilan nomlanadi. Ayrim she’rlarining avvaligi misrasidayoq shu «hikmat»li so‘z aytayotganiga diqqatni qaratadi: «Dunyoda ajib bir hikmat mavjuddir» (2-jild, 265-bet), «Mana bu hikmatga, do‘stim, quloq sol» (2-jild, 342-bet). Shoir garchand she’riy misralar tarkibida «xalqning so‘zi» (1-jild, 307-bet), «donishmand dediki» (1-jild, 307-bet), «qadim bir gapni uqtirar hayot» (2-jild, 118-bet), «azaliy haq gap» (2-jild, 135-bet), «xalq naqli» (2-jild, 230-bet), «tabarruk keksaning gapi» (2-jild, 310-bet) birikmalarini ishlatsa ham, bular aynan o‘sha xalq donoligi, xalq falsafasi va hikmatiga sinonim tarzida keladi. Shoirning o‘z ta’biri bilan aytganda «ulug‘ bir hikmatga amin bo‘lgan»i diqqatni tortadi (2-jild, 315-bet). Shoir bir to‘rtligida yozadi:

Goho yer mehrini o‘ylarkan,

Esga tushar dorning siyog‘i;
Ajab hikmat, odam o‘larkan,
Uzilganda... yerdan oyog‘i. ( 1 jild, 57-bet).

Ushbu to‘rtlikda ikki ma’no mujassam. Istaysizmi-yo‘qmi insonning oyog‘i yerdan uzilganda o‘ladi. Ikkinchidan dorga osilgan odamning ham oyog‘i yerdan uzilgan bo‘ladi. Dor va yer so‘zlari vositasida shoir «ajib hikmat»ni bayon etmoqda.

Ko‘p hollarda aynan «hikmat» so‘zi ishlatilmasa ham, shoirning mutafakkir sifatida hikmatlar yozayotganiga guvoh bo‘lasiz. Masalan quyidagi to‘rt misrada xalqona tafakkurga xos shu darajada balqib turadiki, uning muallifini aniq bilmaganlar xalq to‘qigan deyishlari ham mumkin.

Bozorga o‘xshaydi asli bu dunyo,

Bozorga o‘xshaydi bunda ham ma’ni.
Ikkisi ichra ham ko‘rmadim aslo,
Molim yomon degan biror kimsani. (1- jild, 231-bet).

Darvoqe, shoirning hadislarni she’rga solib yozgan «Haj daftari» turkumining ikkinchi nomi «Hikmat sadolari»dir.

Shoir ijodini nashrga tayyorlovchi, fidoyi tadqiqotchi Doniyor Begimqulov shoirning ayrim she’rlari bevosita hikmatli so‘zlar bilan boshlanishiga e’tibor berib yozadi: “Ko‘pchilik kichik she’rlar hikmatli so‘zlar bilan boshlanadi: “Toki tirik ekan dunyoda odam, unga hamroh erur goh shodlik, goh g‘am” (“Bayram”). Bunday she’rlarni xotimalashda ham o‘ziga xoslik bo‘rtib turishini aytib: “Bejiz aytmaganlar, asl hukmdor, Xudoning yerdagi soyasi bo‘lur” (“Sharq hikmatlari”), “Janglarda qay uzra bergan bo‘lsa jon, uning qatorida men ham o‘lganman” (“Mujohid”) kabi misralarni misol qilib keltiradi1..
Shoirning “O‘zbekiston” she’rida ikki-uch ming yillik xalq tarixi millatning so‘z boyligiga tayangan holda san’atkorona mahorat bilan singdirilgan. SHe’rni o‘qir ekanmiz, Beruniy, Amir Temur, Ulug‘bek, Navoiy kabi buyuk siymolar shaxsiyati, ularning ulug‘ bunyodkorlik ishlari ko‘z oldimizda jonlanadi. SHe’rning boshidan oxirigacha ezgulik va olijanoblik, tenglik va adolat uchun kurash tuyg‘ularini ifodalashda xalqimizning quyma tashbehlari, noyob topilmalari, ularga burkangan so‘z sehri she’rga yangicha jilo bergan:
Zabtga olib keng Osiyoni,
Bir zot chiqdi mag‘rur, davongir,
Ikki asr yarim dunyoni
Zir qaqshatdi Buyuk jahongir.
yoki :
Temur tig‘i yetmagan joyni
Qalam bilan oldi Alisher.
yoki:
Dengiz ortin yoritdi ilk bor
Beruniyning aql mash’ali. (1-jild, 179-bet)
SHe’rdagi so‘z kitobxonning diqqatini o‘ziga jalb etadi. Qo‘llangan odatiy so‘zlardan o‘zgacha poetik so‘zgina shoirning iste’dodini namoyon qiladi. Yuqoridagi misollarda “zabtga olib”, “zir qaqshatdi”, “aql mash’ali”, “davongir” kabi so‘z birikmalari va so‘zlari odatiy adabiy til normalaridan badiiy jilosi bilan farqlanib turadi. Qolaversa, bu birikmalar xalq poetik nutqida topiladi ham.
Shoirning “O‘zbekiston” she’rini o‘qigan har bir kitobxon qalbida Vatanga cheksiz muhabbat his – tuyg‘ulari jo‘sh uradi. Misralarda ona tilimizning so‘z boyliklari butun husnu tarovati bilan ko‘z-ko‘z etiladi. SHe’rdagi his-tuyg‘u va voqelik ifodasi mantiqiy, izchil tadrijda, bir-birini to‘ldiradi, ijtimoiy jarayonlar negizini teran ochgan holda yuksak badiiyat bilan tasvirlanadi.
Abdulla Oripov poetik ijodining xalqona qirrasi shoirning keng xalq ommasi uchun tushunarli badiiy til imkoniyatlaridan foydalanish mahorati bilan bog‘liq, albatta. Shoir Dantening “Ilohiy komediya” tarjimasi haqida fikr yuritib, shunday degan edi: “Tarjima jarayoni men uchun eng ulug‘ maktab bo‘ldi. Agar qog‘oz ustida eng ko‘p ter to‘kkan bo‘lsam, o‘sha tarjima ustida to‘kkanman. Ona tilimizning naqadar boy ekanligiga imon keltirganman”.
Chunki adabiy asarlarda xalq hayotini badiiy aks ettirishning asosiy vositasi sifatida til ish ko‘radi. Epik asarlarga nisbatan ulkan adabiyotshunos Izzat Sulton aytgan quyidagi mulohaza g‘oyat o‘rinlidir: “Tilning badiiy asardagi alohida roli yana shunda ko‘rinadiki, asarning syujet qurilishida, xarakterlar tasvirining chuqurligida, kompozitsiyasida nuqsonlar bo‘lsa, o‘quvchi unday asarni o‘qishi mumkin, ammo tili no‘noq bo‘lsa, o‘qimaydi”1.
Til - adabiyotning asosiy quroli, hayot hodisalari, dalillar bilan birga uning asosiy ish materialidir. Voqelikni obyektiv yoritishda, subyektiv nuqtai nazar bilan baholashlarni ifodalashda asarning mazmuni va uslubi til vositasida ro‘yobga chiqadi. U yoki bu darajada o‘quvchi ongi – shuuriga, hissiyotiga ta’sir ko‘rsatadi. Shu boisdan xoh mumtoz adabiyotimizda, xoh zamonaviy badiiy-estetik tafakkurimizda bo‘lsin, atoqli so‘z san’atkorlari o‘z asarlarining tili masalasiga alohida e’tibor berib kelganlar. Bu borada Yusuf Xos Hojib, Ahmad Yugnakiylardan tortib Alisher Navoiy, Boburgacha, shuningdek, Abdulla Qodiriy, Oybek, G‘afur G‘ulom, Abdulla Qahhor kabi adiblarning ma’naviy merosidan juda ko‘plab qimmatli fikrlar keltirish mumkin.
Abdulla Qodiriy «Yozg‘uvchilarimizga» nomli maqolasida: «So‘z so‘ylashda va ulardan jumla tuzishda uzoq andisha kerak. Yozuvchining o‘zigina tushunib, boshqalarning tushunmasligi katta ayb. Asli yozuvchilik aytmoqchi bo‘lgan fikrni hammaga barobar anglata bilishda, oraga anglashmovchilik solmaslikdadir. Bundan tashqari, fikrning ifodasi xizmatiga yaramagan so‘z va jumlalarga yozuvda aslo o‘rin bermasligi lozim... Kishiga ishonish va behuda kuchanish ma’qul gap emas, birovga orqa qilib, o‘zingizda bo‘lgan talantning ruhiga fotiha o‘qiy ko‘rmangiz! Bir soatda emas, o‘n soatda yozish, bir qayta emas, o‘n qayta tuzatish kishining yordamiga termulishga qaraganda ham foydali, ham unumlidir», deb ta’kidlaydi. Shuningdek, Oybek “O‘zbek poeziyasida til” maqolasida poeziya tiliga xos to‘rtta xususiyatni alohida qayd qiladi. Ular - ohangdorlik, bo‘yoqlilik, ixchamlik, chiroylilikdir. Adibning ta’kidlashicha, “qofiya uchun ma’noni qurbon qilish yaramaydi”, “har bir so‘z uzukka qo‘yilgan qimmatli tosh kabi porlasin.” Oybek tildagi yetishmovchiliklar yosh shoirlarda, hatto G‘afur G‘ulom, Uyg‘un, Hamid Olimjon, Maqsud Shayxzoda kabi taniqli shoirlarning she’rlarida ham yo‘q emasligini dalillagan. Tildagi kamchiliklar - chigallik, siqiqlik, balandparvozlik, sun’iylik, qashshoqlik va quruqlikdan iborat. Uningcha, so‘zlar she’rga chertib, tanlab olinishi lozim. SHe’rda ishlatilgan so‘z kuchli, ifodali, ravshan, sodda, toza, xalqqa yaqin bo‘lishi kerak. SHe’r tili “texnika lug‘ati” emas. Oybek she’r tili oldiga vazifalar qo‘yib deydiki, til hayotni to‘g‘ri ko‘rsatishga xizmat qilsin. U yaxshi ishlanishi kerak, asar omma ichiga til orqali kirib boradi, u keng aholiga qaratiladi, shu sababli u barchaga tushunarli bo‘lsin1.