75-modda. Aksiyadorlar umumiy yig‘ilishining kvorumi Agar aksiyadorlarning umumiy yig‘ilishida ishtirok etuvchilarni ro‘yxatga olish tamom bo‘lgan paytga kelib, jamiyatning tarqatilgan va joylashtirilgan ovoz beruvchi aksiyalarining jami oltmish foizidan ko‘piga ega bo‘lgan aksiyadorlar (ularning vakillari) ro‘yxatdan o‘tgan bo‘lsa, aksiyadorlarning umumiy yig‘ilishi vakolatli (kvorum to‘plagan) hisoblanadi.
Aksiyadorlar umumiy yig‘ilishini o‘tkazish uchun kvorum bo‘lmasa, aksiyadorlarning yangi umumiy yig‘ilishini o‘tkazish sanasi e’lon qilinadi. Aksiyadorlarning yangi umumiy yig‘ilishini o‘tkazishda kun tartibiga o‘zgartishlar kiritishga yo‘l qo‘yilmaydi.
O‘tkazilmay qolgan yig‘ilish o‘rniga aksiyadorlarning yangi chaqirilgan umumiy yig‘ilishida ishtirok etuvchilarni ro‘yxatga olish tugagan paytga kelib, jamiyatning joylashtirilgan ovoz beruvchi aksiyalarining jami oltmish foizdan kam bo‘lmagan ovoziga ega bo‘lgan aksiyadorlar (ularning vakillari) ro‘yxatga olingan bo‘lsa, bu umumiy yig‘ilish vakolatli hisoblanadi.
Aksiyadorlarning yangi umumiy yig‘ilishini o‘tkazish to‘g‘risida xabar qilish ushbu Qonunning 69-moddasida nazarda tutilgan tarzda yig‘ilish o‘tkaziladigan sanaga kamida 10 kun qolganida amalga oshiriladi.
Oldingi tahrirga qarang. Kvorum bo‘lmaganligi sababli aksiyadorlarning umumiy yig‘ilishini o‘tkazish sanasi 20 kundan kam muddatga ko‘chirilgan taqdirda, umumiy yig‘ilishda ishtirok etish huquqiga ega bo‘lgan aksiyadorlar o‘tkazilmay qolgan umumiy yig‘ilishda ishtirok etish huquqiga ega bo‘lgan aksiyadorlarning reyestriga muvofiq aniqlanadi.
(75-moddaning beshinchi qismi O‘zbekiston Respublikasining 2008-yil 26-sentabrdagi O‘RQ-183-sonli Qonuni tahririda — O‘R QHT, 2008-y., 39-son, 392-modda) 76-modda. Aksiyadorlarning umumiy yig‘ilishida ovoz berish Aksiyadorlarning umumiy yig‘ilishida ovoz berish “jamiyatning ovoz beruvchi bitta aksiyasi — bitta ovoz” qoidasiga muvofiq o‘tkaziladi, jamiyatning kuzatuv kengashi a’zolarini saylash bo‘yicha kumulyativ ovoz berishni o‘tkazish hollari va ushbu Qonunda nazarda tutilgan boshqa hollar bundan mustasno.
