Azərbaycan respublikasi təHSİl naziRLİYİ baki döVLƏt universiteti

 
Qarın.  Kərə yağı saxlamaq məqsədilə  ən çox xırdabuynuzlu heyvanların qarnından istifadə 
olunardı. Yağı qarına yığmaq üçün onu duzlayıb kiçik kündələr halına salırdılar. Sonra onları qarına 
yığır və üstündən əllə basırdılar ki, aralarında hava qalıb yağı xarab etməsin. Həcmindən asılı olaraq 
hər bir qarın 8-10 kq-dan 15-16 kq-a qədər yağ tuturdu.
72
 
Motal,  əsasən,  qoyun dərisindən hazırlanırdı.  Ən yaxşı motal erkək heyvan, xüsusilə qoç 
dərisindən düzəldilirdi. Böyük həcmli motal dərisində 15-16 kq-a qədər pendir saxlaya bilirdilər. 
Pendir yığmaq üçün bütöv soyulmuş qoyun dərisinin qolları  və arxa hissəsi iplə möhkəm 
bağlanırdı. 
Cılğı təzə pendir və ya şor saxlamaq məqsədilə bütöv soyulmuş keçi dərisindən hazırlanırdı. 
Təzə  şor və pendir cılğıda bir müddət qalıb özünü tutandan sonra onu çıxardıb motal dərisinə 
doldururdular. 
Dağarcıq. Dəri məmulatının ən qədim növü olub ərzaq məhsulları: yarma, un, duz, çörək və s. 
saxlanılırdı. Dağarcıq,  əsasən, xırda buynuzlu heyvan dərisindən düzəldilirdi. Motal və  cılğıdan 
fərqli olaraq, dağar dərisi yumşaq qalmaq üçün xalq üsulu ilə aşılanıb yararlı hala salınırdı. 
Eymə. Maldarlıq təsərrüfatında ağartı  məhsullarının emalında eymə xüsusi yer tuturdu. 
Eymənin böyük ölçülüsü «tejən» adlanırdı. Qatıq yığmaq (yığıntı) üçün qoyun dərisi arpa unundan 
hazırlanmış yal vasitəsi ilə aşılanırdı. Sonra onun arxası  və qollarının ağzı tikilib bağlanır, yalnız 
boğazı açıq saxlanırdı. Bir qayda olaraq, eymənin boğazına tənək çubuğundan düzəldilmiş çənbərə 
tikilirdi. 
Tuluq - Azərbaycanda tuluqdan başlıca olaraq maye (su, neft, ayran) daşınmasında istifadə 
edilirdi. Hazırlanma üsuluna və formasına görə tuluq eyməyə bənzəyirdi. Tuluqdan, həmçinin yağ 
hasil etmək üçün nehrə kimi də istifadə olunurdu. Tuluq habelə çay nəqliyyatı vasitəsi (kəlik, pələ) 
kimi də istifadə olunmuşdur. 
Keçmişdə Abşeronda  əhalinin su təchizatında quyu suyu mühüm yer tuturdu. Quyudan su 
çıxarmaq üçün aşılı göndən hazırlanmış «dol», habelə su daşımaq üçün istifadə edilən tuluq ən 
sərfəli vasitə sayılırdı. Abşeron neftini dəvə karvanları vasitəsilə uzaq ölkələrə, həmçinin iri 
tuluqlarda daşıyırdılar.