Fənn: Çıxan protezlərin hazırlanma texnikası
Şöbə: “Ortopedik stomatologiya”
2 nömrəli Bakı Baza Tibb Kolleci
54
MÖVZU 6.
Üz qövsü anlayışı, onun vasitəsi ilə Kamper xəttinin təyini.
Yeni modellərin artikulyatora bərkidilməsi.
Dişlərin çıxması nəticəsində diş sıraları əmələ gəlir. Diş sıralarının ayrı-ayrı dişlərdən təşkil
olmasına baxmayaraq, onlar morfoloji və funksional baxımdan tamdır. Dişlərin alveol çıxıntısında
yerləşməsi və köklərinin istiqaməti diş sıralarının davamlılığında əhəmiyyətli rol oynayır. Bütün
dişlərin kəsici və çeynəmə səthlərindən keçən müstəvi okklüziya səthi adlanır. Bu səth ön dişlər
tərəfdən üfüqi istiqamətdə gedib, bəbək xəttinə paralel olur, yan dişlər tərəfdən isə Kamper xəttinə
(burun-qulaq xəttinə-burun qanadından qulaq çıxıntısına gedən xətt) paraleldir. Dişlərin okklüziya
səthlərindən keçən xətt okklüziya əyriliyini təşkil edir. Okklüziya əyrisi sagital və transversal
istiqamətdə olur və daimi dişlər tamam çıxdıqdan sonra daha aydın nəzərə çarpır. Diş sıralarının
mərkəzi okklüziya vəziyyətində qapanması (dişləm) üç müstəvidə öyrənilməlidir - şaquli, sagital və
transversal. Ön dişlərin kəsici kənarlarından çeynəmə dişlərin yanaq qabarcıqlarına doğru kecən,
aşağıya baxan əyri xətt şpeye əyrisi adlanır.
Bütün diş qövsünə aid olan əlamətlər:
1. Üst diş qövsü ellips, aşağı diş qövsü parabola şəklində olur.
2. Yuxarı diş qövsü aşagı diş qövsündən geniş olduğundan, yuxarı dişlər aşağı dişləri örtür.
3. Hər bir diş iki antaqonistlə görüşür.
4. Mərkəzi dişlərdən başlayaraq azı dişlərə doğru diş tacının hündürlüyü tədricən kiçilir (köpək
dişlərdən başqa).
5. Yuxarı dişlərin tacları xaricə, kökləri isə içəri tərəfə, aşağı dişlər isə əksinə, tacları dilə tərəf,
kökləri isə xaricə əyilmiş olur.
Frontal dişlərin qapanması əlamətləri:
1. Üst frontal dişlər aşağı frontal dişlərin 1/3-ni örtür.
2. Yuxarı və aşağı mərkəzi kəsici dişlər arasından keçən orta xətt bir sagital səthdə yerləşir.
Çeynəmə dişlərin qapanması əlamətləri:
1. Dişlərin yanaq-damaq istiqamətində qapanması.
2. Dişlərin ön-arxa istiqamətdə qapanması.
| 
