Abdulla Oripov. Tanlangan asarlar. 2-jild. She'rlar
BUYUKLIK Osmonu falakda mo’jaz yulduz - tosh
Mindi o‘z tabiiy tayyorasiga.
Rosa bo‘shliqlarda daydigach bebosh,
Urildi Mushtariy sayyorasiga.
Mushtariy degani oftob misoli
Fazo karvonida muhtasham nordir.
Ne kechdi u sho‘rlik yulduzning holi,
Vazni tog‘ qoshida zig‘ircha bordir.
Buyuklik qudratin sezmay yo sezib,
O’zi izlab topmish so‘nggi marrani.
Mushtariy samoda milyard yil kezib,
Axir axtarmagan o‘sha zarrani.
Taajjub qilaman, buyuklik asli,
Tanlagan yo‘lidan burilmas ekan.
Zarra buyuklikka urilgay, ammo,
Buyuklik zarraga urilmas ekan.
1994
