BUTAFOR (buttafuori/property man) – Butaforiya düzəltməklə məşğul olan kino, TV və teatr işçisi.
BUTAFORİYA (properties/props) – 1) Müxtəlif materiallardan – karton, kağız, ağac, metal və kətandan hazırlanıb istifadə olunan saxta əşyalar (qab-qacaq, bəzək şeyləri və s.). B. həqiqi əşyalardan forma və keyfiyyətcə fərqlənir. Hər ekran və səhnə əsərinin özünəməxsus B.-sı olur; 2) Məcazi mənada: saxta cah-cəlal, qəlp zinət əşyaları.
BÜLLETEN (bulletin) – 1) Rəsmi akt, sərəncam və s. sənədlər məcmusu; 2) Yığcam xəbər buraxılışı; qısa rəsmi məlumat (hərbi məlumat, görkəmli dövlət xadimlərinin səhhəti haqqında B. və s.); 3) Tematik məsələlərə həsr olunmuş xəbər buraxılışı.
C
CANLI PROQRAM (live programme) – Hazırlanması ilə efirə verilməsi arasında zaman fərqi olmayan proqram. Studiyada canlı söhbətdən, müsahibə və sorğulardan, canlı telefon bağlantılarından ibarət olan və həmin anda yayımlanan proqram.
