Бакы Дювлят Университетинин

Xəbərsiz itkin düşmüş şəxslərin axtarışı vətəndaşların və ya hər hansı müəsisə, idarə 
rəhbərliyinin ərizələri əsasında cinayət işi ilə əlaqəli olmadan və cinayət işi başlanmadan aparılır. 
Xəbərsiz itkin düşmüş şəxsin axtarışı ilə bağlı aparılmış əməliyyat-axtarış tədbirləri nəticəsində 
əldə olunmuş məlumatlar məhkəmə orqanına təqdim olunur. Məhkəmə orqanı təqdim olunmuş 
materiallar əsasında Azərbaycan Respublikası Mülki Məcəlləsi ilə nəzərdə tutulmuş iki qərardan 
birini – xəbərsiz itkin düşmək və ya ölmüş elan etmək – çıxarır. 
Xəbərsiz itkin düşmüş şəxsin axtarışını müvəffəqiyyətlə təşkil etmək üçün əməliyyat-axtarış 
fəaliyyətini həyata keçirən orqan axtarışda maraqlı olan şəxsdən itkin düşmüş barədə mümkün 
qədər çox məlumat almalıdır. Bu məlumatlar təkcə onun şəxsiyyətini deyil, həmçinin itkin 
düşməsindən bilavasitə əvvəl və sonra mövcud olmuş halları əhatə etməlidir. İtkin düşmüş şəxslə 
bağlı xəstəxanalara, meyitxanalara, müvəqqəti tutub saxlama yerlərinə və s. sorğular 
göndərilməlidir. 
Xəbərsiz itkin düşmüş şəxsin axtarışını həyata keçirərkən onun itkin düşməsinə səbəb ola 
biləcək müxtəlif xarakterli hallar nəzərə alınmalıdır. Həmin hallar təbii, şəxsi xarakterli, onun 
sağlamlığı ilə bağlı ola bilər. Məsələn, psixi xəstə olan şəxsin itkin düşməsi. 
Belə halların nəzərə alınması uyğun əməliyyat-axtarış tədbirlərinin seçilməsini, 
planlaşdırılmasını müəyyən etməyə kömək edir. 
Əməliyyat-axtarış fəaliyyəti qarşısında qanunla müəyyən edilmiş digər vəzifə naməlum 
meyitlərin şəxsiyətinin müəyyən edilməsidir. 
Şəxsiyyəti məlum olmayan meyit aşkar etdikdə təcrübədə, bir qayda olaraq, cinayət işi 
başlamadan dərhal hadisə yerinə baxış həyata keçirilir. Müayinənin nəticələri sonradan 
zərərçəkmişin şəxsiyyətinin müəyyən edilməsi ilə bağlı əməliyyat-axtarış tədbirlərinin həyata 
keçirilməsində istifadə edilir.