Biznes asoslari fanidan ii-kurslar uchun

KIM TADBIRKOR BO‘LISHI MUMKIN?
Tadbirkorlik faoliyati bilan shug‘ullanishni xohlagan barcha fuqarolar tadbirkor bo‘lishi mumkin. Biroq buning uchun fuqaro muomala layoqatiga ega bo‘lishi, ya’ni o‘n sakkiz yoshga to‘lgan bo‘lishi lozim. Shu bilan birga, ayrim sabablarga ko‘ra tadbirkorlik faoliyati bilan shug‘ullanishi mumkin bo‘lmagan shaxslar yoki guruhlar mavjud. Bularga: – davlat organlari; – davlat organlarining mansabdor shaxslari; – tadbirkorlik faoliyati bilan shug‘ullanishi qonun hujjatlarida man etilgan boshqa shaxslarni kiritish mumkin.


TADBIRKORLIK UCHUN NIMALAR ZARUR?

Siz tadbirkorlik faoliyatini amalga oshirishingiz uchun quyidagilar taqozo etiladi: – biznes-g‘oyaga ega bo‘lish; – biznes-g‘oyani amalga oshirish uchun aniq xatti-harakatlar rejasi (biznes-reja) ishlab chiqish; – tadbirkorlik faoliyatini yo‘lga qo‘yish uchun zarur bo‘lgan dastlabki (boshlang‘ich) kapitalga ega bo‘lish; – tadbirkorlik faoliyatini amalga oshirish uchun kerakli moddiy resurslar va shart-sharoitlarga ega bo‘lish.

BILIMINGIZNI SINAB KO‘RING!

1. Tadbirkorlik tushunchasi nimani anglatadi?

2. Nima uchun tadbirkorlik bozor ishtirokchilarini harakatga undovchi faoliyat hisoblanadi?
3. Tadbirkorlik layoqati qanday xislatlar orqali namoyon bo‘ladi?
4. Nima uchun tadbirkorlik ishlab chiqarish omillari orasida eng muhimi hisoblanadi?
5. Tadbirkorlikning asosiy jihatlarini izohlab bering.
6. Tadbirkorlik alohida shaxs, jamiyat va davlatga qanday manfaat keltirishi mumkin?
7. Kimlar tadbirkor bo‘la oladi?
8. Tadbirkorlikni boshlash uchun nimalar zarur?
MAVZU YUZASIDAN AMALIY TOPSHIRIQ VA MASHQLAR


Test: «Siz tadbirkorlik layoqatiga egamisiz?» Ushbu test sizning tadbirkorlik layoqatingiz darajasini baholash imkonini beradi. Savollarga «Ha» yoki «Yo‘q» deb javob bering.
1. Boshlagan ishingizni qandaydir to‘siqlar chiqishiga qaramasdan oxirigacha yetkaza olasizmi?
2. O‘z qaroringizda qat’iy tura olasizmi yoki sizni osongina fikringizdan qaytarish mumkinmi?
3. Siz o‘zingizga mas’uliyatni olish, boshqarishni yoqtirasizmi?
4. Atrofingizdagilarning hurmat va ishonchiga sazovormisiz?
5. Sog‘lommisiz?
6. Darhol natija olmasangiz ham tong otgandan kun botgunga qadar mehnat qilishga tayyormisiz?
7. Boshqalar bilan muloqot qilish va hamkorlikda ishlashni yoqtirasizmi?
8. Boshqalarni ham tanlangan yo‘lning to‘g‘riligiga ishontira olasizmi?
9. Sizga boshqalarning g‘oya va fikrlari tushunarlimi?
10. Siz o‘z ishingizni boshlashni xohlagan soha bo‘yicha tajribangiz bormi?
11. Siz amaldagi soliqqa tortish, ish haqini hisoblash, buxgalteriya hisobini yuritish qoidalari bilan tanishmisiz?
12. Siz taklif qilmoqchi bo‘lgan tovar yoki xizmatga o‘zingiz yashayotgan shahar yoki viloyatda talab bo‘ladimi?
13. Sizda marketing va moliya sohasida boshlang‘ich bilimlar bormi?
14. Yashayotgan shahringiz (viloyatingiz)da siz tanlagan yo‘nalishdagi boshqa tadbirkorlarning ishlari yaxshi ketyaptimi?
15. Mo‘ljalingizda ijaraga olish mumkin bo‘lgan bino bormi?
16. Siz o‘z korxonangizni faoliyatning birinchi yilida ta’minlab turish uchun yetarli moliyaviy mablag‘ga egamisiz?
17. Sizda o‘zingiz tashkil etayotgan korxonani moliyalashtirishga qarindoshlar va tanishlarni jalb etish imkoniyati bormi?
18. Mo‘ljalingizda zarur materiallarni yetkazib berishi mumkin bo‘lgan ta’minotchilar bormi?
19. Mo‘ljalingizda sizda yetishmaydigan bilim va tajribaga ega bo‘lgan mutaxassislar bormi?
20. O‘z shaxsiy ishiga ega bo‘lish – sizning asosiy orzungiz ekanligiga ishonasizmi?