Elеktr o‘lchаsh usullаri o‘lchash turlari

44-rasm. Bevosita ta’siridagi asboblarning strukturali sxemasi.
Sxemada: X va Y lar o‘lchash asboblarining kirishidagi va chiqishidagi kattaliklari; O‘₁,O‘₂…O‘_n – o‘lchash ma’lumotlarining alohida o‘zgartkichlari.
O‘lchanadigan kattalikni uni o‘lchovi bilan avtomatik yoki operator ishtirokida solishtirish natijadisa olinadigan o‘lchash asboblari solishtirish asboblari deyiladi. Boshqacha aytganda, bu asboblarda o‘lchanadigan kattalik bevosita uning o‘lchovi bilan yoki o‘lchov sifatida qabul qilingan aniq qiymati bilan o‘zaro solishtiriladi. Solishtirish asboblarida chiqish kattaligi Y teskari bog‘lanish zanjiridagi maxsus o‘zgartkich yordamida (O‘_tеsk) o‘lchanadigan kattalik X bilan bir turdagi X_k ga o‘zgartiriladi va keyin X va X_k kattaliklar asbobning kirishida solishtiriladi (ayriladi). Solishtirish asboblarining strukturali sxemasi (berk zanjirli bo‘ladi) quyidagi rasmda ko‘rsatilgan.

45-rasm. Solishtirish asboblarining strukturali sxemasi.
Teskari bog‘lanish zanjirining mavjudligi asbobning aniqligini ko‘tarishi mumkin, lekin ko‘pincha uning tezkorligi va umumiy sezgirligiga teskari ta’sir ko‘rsatishi mumkin.
Solishtirish asboblariga teng yelkali tarozilar, o‘zgarmas tok ko‘priklari, potensiometrlar misol bo‘lishi mumkin.
Ko‘p hollarda o‘lchanadigan kattalik bilan uning aniq qiymatlari emas, balki shu kattaliklar hosil qilgan effektlar solishtiriladi. Masalan, o‘zgarmas tok ko‘priklarida o‘lchanadigan va aniq qarshiliklarining zanjirlaridan o‘tadigan elektr toki solishtiriladi. Teng yelkali tarozilarda o‘lchanadigan оbyеkt va toshlarning massasi emas, balki shu jismlar hosil qilgan aylantiruvchi momentlar solishtiriladi.
O‘lchash asboblari ularning ko‘rsatishi, chiqishdagi kattalik bilan o‘lchandigan kattaliklarning o‘zaro bog‘liqligi bo‘yicha analogli va raqamli asboblarga bo‘linadi.
Analogli asboblar. Analogli asboblarda ularning ko‘rsatishi o‘lchanadigan kattalikning uzluksiz o‘zgarish funksiyasiga bog‘liq bo‘ladi.
Analogli asboblar yuqori tezkorlikka ega, bundan tashqari, asbobning ko‘rsatishi bo‘yicha o‘lchanadigan kattalikning o‘zgarishi (raqamliga qaraganda) psixologik jihatdan oson qabul qilinadi (kuzatiladi). Lekin, analogli (asosan, strelkali) asboblarning aniqligi uning shkalasi bo‘yicha kuzatish xatoligi bilan cheklanadi (xatolik odatda 0,05–1% dan kichik bo‘lmaydi).
Raqamli asboblar. Raqamli o‘lchash asbobi deb, o‘lchash borasida uzluksiz o‘lchanadigan kattalikning natijasi raqamli qayd etish qurilmasida yoki raqamlarni yozib boruvchi qurilmada diskret tarzda o‘zgartirilib, indikatsiyalanadigan asboblarga aytiladi.
Raqamli asboblar diskret o‘lchash usuliga asoslangan bo‘lib, asbobning ko‘rsatishi raqam ko‘rinishida bo‘ladi, shu sababli ularning ko‘rsatuvlari osongina qayd qilinadi, ularni EHMga kiritish juda qulay.
Elektr o‘lchash asboblarining qayd qiluvchi, o‘ziyozar, bosmalovchi, integrallovchi va jamlovchi turlari ham mavjud.
Qayd qiluvchi elektr o‘lchash asboblarda ko‘rsatuvlarni diagrammali qog‘ozda yozib olish yoki raqamli tarzda qayd etish ko‘zda tutiladi.
Integrallovchi elektr o‘lchash asboblari – berilgan (o‘lchanadigan) kattalikni vaqt bo‘yicha yoki boshqa mustaqil o‘zgaruvchi ko‘rsatkich bo‘yicha integrallash xususiyatiga ega. Bunga misol qilib elektr energiya hisoblagichini ko‘rsatish mumkin.
Jamlovchi elektr o‘lchash asboblarida ko‘rsatishlar turli kanallar orqali berilgan ikki yoki bir necha kattaliklarning yig‘indisi bilan funksional bog‘langan bo‘ladi. Bunga bir necha generatorlar quvvati yig‘indisini o‘lchash uchun mo‘ljallangan vattmetrlar misol bo‘la oladi.
O‘lchash asboblari ishlatilishi xususiyatiga ko‘ra ko‘chma va ko‘chirib yuritilmaydigan (statsionar) asboblarga bo‘linadi.
O‘lchanadigan kattalik turiga qarab, elektr o‘lchash asboblari ampermetr, voltmetr, vattmetr, ommetr, fazometr, chastotomer va shu kabi asboblarga bo‘linadi.
Ishlatilish sharoitiga qarab elektr o‘lchash asboblari A, B, V va T guruhlarga ajratiladi. Masalan, A guruhdagi asboblar havoning nisbiy namligi 80% gacha yetadigan, harorati +10+35^°C gacha bo‘lgan quruq va isitiladigan yopiq xonalarda ishlatishga mo‘ljallangan. T guruhga kiruvchi asboblar esa quruq va nam, eng issiq iqlim (tropik) sharoitida foydalanishga mo‘ljallab tayyorlangan.
Elektr o‘lchash asboblari mexanik ta’sirlarga bardoshliligiga qarab chidamli, mustahkam asboblarga bo‘linadi. Mexanik ta’sirlar (silkinish, tebranish yoki zarbali silkinish)ning salbiy oqibatlariga bardosh berib, so‘ngra (ularning ta’siridan keyin) maromida ishlash xususiyatini saqlab qolgan asboblar chidamli elektro‘lchash asboblari jumlasiga kiradi. Silkinish, tebranish sharoitida maromida ishlash imkoniyatini saqlagan asboblar silkinish yoki tebranishga mustahkam elektr o‘lchash asboblari deyiladi.
Toklarning turiga qarab elektr o‘lchash asboblari o‘zgarmas va o‘zgaruvchan hamda ikkala xil tok zanjirlarida ham ishlatiladigan (o‘lchay oladigan) asboblarga bo‘linadi.
Ko‘rsatuvchi o‘lchash asboblari keltirilgan xatoliklarning ruxsat etilgan qiymati bo‘yicha sakkizta aniqlik klassiga bo‘linadi:
Aniqlik klassi: 0,02; 0,05; 0,1; 0,2; 0,5; 1; 1,5; 2; 2,5; 4.
O‘lchash qurilmalari – bir joyda joylashgan ham funksional, ham konstruktiv bog‘langan o‘lchash vositalarining (o‘lchovlar, o‘lchash o‘zgartkichlari, o‘lchash asboblar) va yordamchi vositalar yig‘ilmasidan iborat bo‘lib, o‘lchash jarayonini ratsional tashkil etishda xizmat qiladi.
O‘lchash qurilmalariga suyuqlik va gazlarni sarfini o‘lchash uchun ishlatiladigan o‘lchash komplekslari, elektr o‘lchash asboblarini sinovdan o‘tkazish va darajalash (graduirovkalash) qurilmalari misol bo‘ladi.
O‘lchash tizimlari. Bir-biri bilan maxsus aloqa kanallari orqali yig‘ilgan va funksional bog‘langan o‘lchash vositalari (o‘lchovlar, o‘lchash o‘zgartkichlari va o‘lchash asboblari), yordamchi qurilmalar va hisoblash texnikasi vositalari majmuyidan iborat bo‘lib, o‘lchash ma’lumoti signalini avtomatik tarzda qayta ishlash uchun qulay shaklda ishlab berish uchun mo‘ljallangan.