Falsafa (Etika,Estetika, Mantiq) fanidan ma’ruza matnlari 1-mavzu. Falsafa fanining predmeti, mazmuni va jamiyatdagi roli Reja

Mantiq ilmining evolyusiyasi. Mantiqqa oid dastlabki an’analar Qadimgi SHarq mamlakatlarida, xususan, Hindiston, Xitoyda vujudga keldi. Ularning shakllanishiga notiqlik san’ati, matematika ilmining rivojlanishi va shu kabilar katta ta’sir ko‘rsatdi. SHuni aytish kerakki, Qadimgi dunyoda Aristotelgacha bo‘lgan davrda mantiq falsafa tarkibida mavjud bo‘lgan mustaqil fan sifatida shakllanmagan.
Hind mantiqshunoslari bahs-munozarada nima isbotlanyapti va qanday isbotlanyapti, degan masalani ajratib ko‘rsatishgan. Ular isbotlashning elementlarini (tezis, asos, misol, bir xillik, har xillik, bevosita hissiy qabullash, xulosa, avtoritet va shu kabilarni) batafsil tahlil etganlar. Nyaya maktabining vakillari xulosa chiqarish masalasini o‘rganishga katta hissa qo‘shdilar.
Qadimgi Hindistondagi shakllangan mantiq an’analari Qadimgi Gretsiyada mantiq ilmining paydo bo‘lishiga ta’sir ko‘rsatgan.
Qadimgi grek falsafasida mantiq masalalari, dastlab, Parmenidning «Tabiat to‘g‘risida» asarida, Eleylik Zenonning aporiyalarida, Geraklit ta’limotida u yoki bu darajada ko‘rib chiqilgan. Aristotelgacha bo‘lgan mantiqiy ta’limotlar ichida Demokritning mantiqiy ta’limoti, Sokratning induktiv metodi va Platonning dialektikasi diqqatga sazovordir.
Demokrit (er. av. 460–370 y.y.) mantiqiy ta’limotida fikrning chinligi masalasi muhim o‘rin tutadi. U ko‘proq induksiya va analogiyani o‘rganishga e’tibor beradi, haqiqatni bilish uchun yakka buyumlarni kuzatish, his qilish or-qali umumlashtirish zarur, deb ta’kidlaydi. Demokritning mantiqiy ta’limoti keyinchalik Aristotel va F. Bekon ta’limotlariga sezilarli ta’sir ko‘rsatgan.
Sokrat (er. av. 469–399 y.y.) ta’limotiga ko‘ra haqiqatni aniqlash uchun o‘ziga xos usul darkor. Bu usul vositasida o‘rganilayotgan buyum haqida umumiy tushuncha hosil qilinadi va shu tushunchaga asoslanib buyum haqida fikr yuritiladi. Haqiqatni aniqlash uchun muxolif fikridagi ziddiyatlar o‘rganiladi.
Platon (er. av. 427–347 y.y.) ustozi Sokratning, umumiy tushunchalar buyumlarning mohiyatini ifodalaydi, degan fikrini davom ettiradi. U umumiy tushunchalarni buyumlardan va insonlardan ajralgan mutlaq g‘oyalar sifatida talqin qiladi, ularni birlamchi deb biladi. U hukmni tafakkurning asosiy elementi deb hisoblaydi.
Mantiq ilmining alohida fan sifatida shakllanishi Aristotelning nomi bilan bog‘liq. U birinchi bo‘lib mantiq ilmi o‘rganadigan masalalar doirasini aniqlab berdi. Aristotel mantiqni «ma’lum bilimlardan noma’lum bilimlarni aniqlovchi», «chin fikrni xato fikrdan ajratuvchi» fan sifatida ta’riflaydi. Mantiqning vazifasi chin fikrni, haqiqatni aniqlashdir, deb ta’kidlaydi.
Aristotelning mantiqiy ta’limotida xulosa chiqarish etakchi o‘rinni egallaydi. Mutafakkir deduktiv, ya’ni sillogistik xulosa chiqarishning nazariy asoslarini ishlab chiqqan.
Aristotel ta’limotida xulosa chiqarish isbotlash shakli deb ham hisoblanadi. U isbotlashning ilmiy (apodeyktik), dialektik, ritorik, sofistik usullarini tahlil qilgan, eristika – muvaffaqiyatli bahs yuritish qonun-qoidalarini ishlab chiqqan, peyrastikaning – maqsadsiz muhokama yuritishning zararli ekanligini ta’kidlagan.
Aristoteldan so‘ng mantiq ilmi asosan stoya maktabi vakillari, Epikur, skeptiklar ta’limotlarida rivojlantirilgan.