Oxunun ifadəliliyi üçün psixoloji fasilədən düzgün istifadə edilməsi tələb olunur. Məhşur səhnə ustası K.S.Stanislavski yazmışdır ki, əgər məntiqi fasiləsiz nitq ( o cümlədən oxu) savadsız hesab olunursa, psixoloji fasiləsiz o, cansızdır. İbtidai siniflərdə psixoloji fasiləni praktik yolla başa salmaq mümkündür. Ə.Məmmədxanlının “Buz heykəl” hekayəsində uşaqlar oxuyurlar: “Birdən lap içəridən bir cüt uşaq gözü kəşfiyatçı əsgərin gözlərinə dikilir”. Bu cümlədə birdən sözündən sonra edilən fasilə dinləyicini intizarda saxlayır. Fasilədən sonra dinləyicilərin qarşısında təəccüb, təəssüf və sevinclə dolu bir səhnə açılır. Birdən sözündən sonrakı fasilə şaxtadan donmuş ananın qucağında uşağın sağ qalması ilə əlaqədar şagirdlərin keçirdikləri psixoloji halları, heyrət hissini qüvvətləndirir.
Bəzən fasilənin gözlənilməsi çətin olduğundan tez – tez müəllifin fikri təhrif olunur. H.Ziyanın “Sünbülüm” şerində bir parçanı nəzərdən keçirək:
