İxtisaslaşmanın köməyi ilə hotel personalı arasında vəzifə bölgüsü aparılır. İxtisaslaşmanın olmaması və ya zəif olması nəticəsində personal bütün məsələlər üzrə məsuliyyət daşıyır. Menecmentin əsas vəzifələrindən biri ixtisaslaşmış işlərin miqyasını müəyyən etməkdir. İxtisaslaşma məhsuldarlığı artırır və bütün faliyyətdə idarəçilik nəzarətini asanlaşdırır. Şöbələr, hotelin müxtəlif işlərin fəaliyyətini əlaqələndirmək (kordinasiyası) üçün müəyyən işlərin növlərini bir yerdə qruplaşdırır. Şöbələr yaradılandan sonra iş növlərini yerinə yetirmək üçün hotel rəhbərliyi menecer və işçilərə səlahiyyət verir. Səlahiyyəti müəyyən edəndə ilk növbədə əməkdaşın şəxsi keyfiyyətini, işlədiyi mühit, peşəkarlıq səviyyəsi və hotelin idarəçilik üslubu (stili ) nəzərə alınmalıdır. Strukturun işlənib hazırlanmasında adətən menecerə tabe olan işçilərin sayı nəzərə alınmalıdır. Hər bir şöbədə işçilərin sayı hotelin yerləşdiyi ərazidən, tipindən, xidmətin standartlarından, işçilərin hazırlıq səviyyəsi və motivasiyasından, qarşılıqlı əlaqə və nəzarətdən aslı ola bilər. Təşkilat strukturunun hazırlanmasında hotelin iyerarxiya (tabeçilik pilləsi) səviyyəsinin sayı mühüm rol oynayır. Rəhbərlik və tabeçilikdə olanların şaquli xətt üzrə qarşılıqlı münasibətinin sxemi qurulur. Bu sxem üzrə personalın hər bir üzvü təşkilatın strukturunda öz yerini tutur. Hoteli səmərəli idarə etmək üçün vəzifələrin dəqiq müəyyənləşməsi zəruridir. Lakin imkan daxilində iyerarxiya səviyyəsini (pilləsini) azaltmaq lazımdır. Əks təqdirdə bu qarşılıqlı əlaqə sisteminə mənfi təsir edə bilər. Kiçik hotellərin təşkilatı strukturunda əlaqələndirmə (kordinasiya) əsas amil deyil. Lakin hotelin həcmi və nömrə fondunun sayından asılı olaraq, təşkilat strukturunun rolu artır. Hotel personalının vəzifə bölgüsündən sonra hər bir işçinin və ya işçi qrupunun əlaqələndirilməsi (kordinasiya ) zərurəti yaranır. Hoteldə bir məsələnin həlli digər məsələləri ortaya çıxarır. Məsələn, qonaq hoteli tərk edəndən sonra mühasibat şöbəsində qonağın hesabatları üzrə əməliyyat yerinə yetirilir. Bunun üçün ön büro və mühasibatlıq arasında dəqiq qarşılıqlı əlaqə olmalıdır. Məsələn, hoteldə müxtəlif konfrans və digər tədbirlərin keçirilməsi zamanı şöbələr arasında sıx əlaqə olmalıdır. Şöbələrin sıx əlaqəsi (kordinasiya) qərarların qəbulunda mühüm rol oynayır. Təşkilat strukturunun hazırlanmasında müxtəlif prinsiplər mövcuddur. Tərtib olunan təşkilatı strukturun sxemində hər bir işçinin öz menecerinə tabeçiliyi göstərilib. Məsələn, hotelin baş meneceri qəbul və xidmət şöbəsində struktur dəyişiklik etmək istəsə bu şöbənin meneceri ilə razılaşdırır. Eyni zamanda sıravi işçi hər hansı bir məsələ barəsində birbaşa baş menecerə müraciət etməməli, əvvəlcə şöbə menecerinə deməlidir. Lakin bəzi hallarda hoteldə həyata keçirilən bir sıra lahiyələrlə əlaqədar baş menecer bir sıra məsələləri həll etmək və nəzarətdə saxlamaq üçün sıravi işçilərlə əlaqə yarada bilər. Təşkilati strukturunun prinsiplərindən biri də vahid komanda prinsipidir. Bu prinsipə görə, hər bir işçi öz menecerinə tabedir və ona hesabat verir.
Hotel menecerinin fəaliyyəti yalnız qonaqlara xidmət göstərmək deyil, eyni zamanda bu xidmətin keyfiyyətinə nəzarət etməkdir.
