İkram agasiyev şİrxan səLİmov azərbaycan tariXİ baki-2017 Elmi redaktor

17.6. XX əsrin əvvəllərində Azər­baycan mədəniyyəti.
Çarizmin milli müstəmləkə siyasəti maarifin inkişafında özünü daha aydın göstərdi. Bu dövrdə Bakı şəhərində azərbaycanlı əhalisinin yalnız 19, 3 % savadlı idi. Savadsızlığın başlıca səbəbi isə ana dilində məktəblər açılmasına icazə verilməməsi və təhsilin pullu olması idi. Azərbaycan burjua­ziyasının Dövlət Duma­sında olan nümayən­dələrinin məktəb açmaq tələbləri əsasən eşidilməz qalır­dı. Lakin 1905-1907-ci illər inqila­bından sonra çar höküməti maarif sahəsində də bəzi güzəştlərə getməyə məcbur oldu.

Bu dövrdə Azərbacan demokratik ictimaiyyəti “rus-tatar” mək­təbləri şəbə­kəsini genişləndirmək uğrunda mübarizə aparırdı. Azər­baycanda mədəniyyət və təhsilin inkişafında “Nicat”, “Nəşri-maarif” kimi cəmiyyətlər mühüm rol oynadı.

Sahibkarlar, ziyalılar, ictimai və din xadimlərindən ibarət böyük bir qrupu özündə birləşdirən və H.Z.Tağıyevin rəhbərlik etdiyi “Nəşri-maarif” cəmiyyəti məktəb şagirdlərinə maddi yar­dım göstərməklə yanaşı, özü də təhsil ocaqlarının yaradıl­masında iştirak edirdi. 1915-ci ildə cəmiyyətin açdığı 15 xalq məktəb­lərində 900 şagird təhsil alırdı. “Nicat” cəmiyyətinin qurucuları isə Ə.Ağaoğlu, Ə.Axundov, M.Hacin­ski, kimi qabaqçıl Azərbaycan ziyalıları idi.

Azərbaycan demokratik ziyalıları Azərbaycan qadınlarının da savadlanması istiqamətində fəal iş görürdü. 1901-ci il oktyabrın 1-də Azərbaycan milli burjuaziyasının lideri və Azər­baycan maarifçiliyi tarixində özünəməxsus yeri olan H.Z.Tağıyev öz hesabına “Bakı rus-müsəlman qadın məktəbi” açmışdı. Bunun ardınca 1902-ci ildə Gəncədə qadın məktəbi, daha sonra Ağdamda, Qazax qəzasının Salahlı kəndində, Göyçay qəzasının Zəyəm kəndində, Şuşada, Şamaxıda və başqa yerlərdə qadın məktəbləri açıldı. Bu məktəblərdə H.Məlikova, X.Ağa­yeva, R.Hacıbəyova, S.Vəzirova, Ş.Əfəndiyeva, A.Sul­tanova kimi ziyalı Azər­baycan qadınları müəllimlik edirdilər.

Əsrin əvvəllərində Bakı və sair şəhərlərdə yaşlıların da təhsil alması üçün əsasən bazar günü fəaliyyət göstərdikləri üçün “Bazar günü məktəbləri” adlanan müəssisələr də fəaliyyət göstərirdi. Bu dövrdə Azərbaycan mədəniyyət xadimlərinin qarşısında duran ən mühüm vəzifələrdən biri də tədris-metodik vəsaitlər hazırlayıb nəşr etdirmək idi. Bu işdə R.Əfəndiyev, S.S.Axundov, F.Ağazadə, A.Şaiq, M.Mah­mudbəyov, A.Səhhət, Ə.Əfən­di­yev, Q.N.Nəriman­bəyov, Q.Qəmərlinski, Ü.Hacıbəyov, F.Köçərli kimi Azərbaycan ziyalı­larının böyuk rolu olmuşdu. A.Şaiqin rəhbərliyi altında “Uşaq çeşməyi”, “Gülzar” kimi dərsliklər, A.Mahmudbəyovun redaktorluğu ilə “İkinci il”, “Türk ədəbiyyatına ilk qədəm”, “Yeni türk əlifbası”, M.Şahtaxtinskinin “Şərq əlifbasının fonetikası” adlı dərsliklər yazılmışdı.

XX əsrin əvvəllərində Azərbaycanda mədəni-maarif ida­rələri də fəaliyyət göstər­məyə başlamışdı. Bakıda, Şuşada, Nuxada, Gəncədə, Qubada kitabxanalar açılmışdı. 1902-ci ildə Qara şəhərdə, 1906-ci ildə Bayılda açılmış xalq evlərində görkəmli mədəniyyət xadimlərinin mühazirələri təşkil edilirdi. 1907-ci ildə Bakıda müsəlman mədəni - maarif cəmiyyəti “Səadət”, 1910-cu ildə isə “Səfa” cəmiyyəti fəaliyyət göstərməyə başladı.

Birinci rus inqilabından sonra Azərbaycanda milli mətbuat sahəsində də xeyli irəli­ləyiş­lər baş vermişdi. Azərbay­canda 1917-ci ilin fevralınadək 227 dövri mətbuat orqanı nəşr edilmişdi. 1905- 1917-ci illərdə Azərbaycanda nəşr olunan əsas mətbuat orqanları “Həyat”, “Tazə həyat”, “Tərəqqi”, “İttifaq”, “Həqiqət”, “İqbal”, “Yeni iqbal” , Hüm­mət”, “Təkamül”, “Bakı həyatı”və başqa qəzetlər idi. Mətbuat tarixində “Müsavat” partiyasının orqanı olan “Açıq söz” qəzetinin xüsusi yeri var idi. Azərbaycanda bu dövrdə inqilabi - demokratik mətbuat orqanı olan satirik “Molla Nəsrəd­din” jurnalı xüsusi yer tuturdu.1905-1907-ci illər milli mətbuatın inkişafında nəşriyyat­çılar arasında Orucov qardaşları, H.Vəzirov, İ.Aşur­bəyli, Ə.Mikayılov, M.İbrahimov xüsusilə fərqlənirdi. Gəncədə, Lənkəranda, Şuşada, Naxçıvanda da kiçik mətbəələr fəaliyyət göstərirdi. C.Məmmədquluzadə və Ö.F. Neman­zadə Tiflisdə “Qeyrət” mətbəəsini təsis etmişdi.

Bu dövrün Azərbaycan ədəbiyyatında tənqidi realizm yüksək səviyyəyə çatmışdı və bu cərəyanın görkəmli nümayəndələri C.Məm­məd­­quluzadə, M.Ə.Sabir, Ə.Haqver­diyev, Ə.Nəzmi, Y.V.Çəmən­zəminli, Ə.Möcüz və başqaları idilər. Dövrün digər ədəbi cərəyanı romantizm idi. Onun ən böyük nümayən­dələri M.Hadi, A.Səhhət, H.Cavid, A.Şaiq və b. idilər. H.Cavid Azərbaycan ədəbiyyatında şerlə yazılmış ilk dram əsərinin müəllifi idi. XX əsrin əvvəllərində ədəbi fəaliyyətin müstəqil istiqaməti kimi formalaşan Azərbaycan uşaq ədəbiyyatı A.Səhhət, A.Şaiq, M.Ə.Sabir, C.Məmmədquluzadə, S.S. Axun­dovun əsərləri sayə­sində yarandı. XX əsrin əvvəllərində Azərbaycan ədəbiyyatı tarixinin öyrənilməsinin əsasını qoyan görkəmli ədəbiyyatşünas alim F.Köçərli “Azər­baycan türklərinin ədəbiyyatı” adlı 3 cildlik əsərini yazdı.

Bu dörvdə Azərbaycan elminin görkəmli nümayən­dələrindən olan tarixçi-şərqşünas, etnoqraf M.Şahtaxtinski Sarbon Universitetinin “Asiya fonetikası” cəmiyyətinin həqiqi üzvü idi. XX əsrin əvvəllərində tarixşünaslıq elmi Rəşid bəy İsmayılovun “Qafqazın qısa tarixi”, Hacı Şeyx Həsən Mollazadə Gəncəvinin “Zəbdətüt Təfarix” (Tarixin qaymağı), Mirzə Rəhim Fənanın “Qarabağın yeni tarixi” əsərləri ilə zənginləşdi.

XX əsrin əvvəllərində teatr, müsiqi, təsviri incəsənət də öz inkişafında yeni mərhələyə qədəm qoydu. Mədəni - maarif cəmiyyət­lərinin yaranması Azərbaycan milli teatr sənətinin inkişafına və Azərbaycan teatrının H.Ərəblinski, C.Zeynalov, H.Sarabski, S.Ruhulla kimi korifeylərinin də yaranmasına təkan verdi. 1916-cı ildə H.Ərəb­linski və H.Sarabskinin rəhbərliyi ilə “Müsəlman dram cəmiyyəti” yaradıldı. H.Ərəblinski 1916-cı ildə “Neft və milyonlar səltənətində” adlı ilk Azərbaycan filminin yaradılmasında yaxından iştirak etmişdir. Azərbaycan opera teatrının yaranması da bu dövrə təsadüf edir. 1908-ci il yanvarın 12-də H.Z.Tağıyev teatrında Ü.Hacıbəyovun Azərbaycanın ilk milli operası olan “Leyli və Məcnun” operasının ilk dəfə tamaşaya qoyuldu. Azərbaycan müsiqisinin inkişafında Ü.Hacıbəyov, M.Maqo­mayev, C.Qaryağdıoğlu, H.Sarabski, Q.Pirimov kimi mədəniyyət xadimlərimizin böyük xidmətləri olmuşdur.

Azərbaycan müsiqili komediyalarının da banisi olmuş Ü. Hacıbəyovun “Ər və arvad”, “O olmasın, bu olsun”, “Arşın mal alan” komediyaları müəllifə dünya şöhrəti qazandırdı.1908-1915-ci illərdə Ü.Hacıbəyov “Şeyx Sənan”, “Rüstəm və Zöhrab”, “Əsli və Kərəm”, “Şah Abbas və Xurşud Banu”, “Harun və Leyla” kimi bir sıra yeni operalar yaratdı. 1913-cü il oktyabrın 25-də ilk dəfə milli musiqili teatr səhnəsində Ü.Hacıbəyovun “Arşın mal alan” musiqili komediyası səhnəyə qoyuldu və böyük müvəffəqiyyət qazandı.

Azərbaycan musiqi mədəniyyətinin inkişafında bəstəkar M.Maqo­mayevin də misilsiz xidmətləri olmuşdur. Onun 1916-cı ildə yaratdığı “Şah İsmayıl” operası Azər­baycan opera sənətinin qızıl fonduna daxil oldu. XX əsrin görkəmli rəssamlarından Ə.Əzimzadə, B.Kəngərli Azərbaycan təsviri incəsənətinin tərəqqisində mühüm rol oynadılar. 1913-cü ildə Bakıda ilk rəsm əsərləri sərgisinin açılışı Azərbaycanın mədəni həyatında böyük hadisə idi.

Azərbaycanın XX əsr memarlıq incəsənətinin inkişafını qabaqçıl sənaye şəhərinə çevrilən Bakının gündən-günə artan memarlıq abidə­lərində görmək mümkün idi. O dövrdə tikilmiş İsmailiyyə (1910), Mayılov qardaşları teatrı (1911) hazırda da Azərbaycan memarlıq nümunələrinin parlaq incilərindən hesab olunur.1913-cü ildə Mir Əhməd xan həyat yoldaşı Tuğba xanımın şərəfinə Lənkəranda Xan evini inşa etdirdi. 1902-ci ildə Peterburq Mülki Mühəndislər İnstitutunu bitirmiş ilk azərbaycanlı mühəndis memar Zivər bəy Əhmədbəyov və Məmməd­həsən Hacinskinin memarlıq sənətinin inkişafında özünəməxsus yeri olmuşdur.