Jismoniy madaniyat va sportni boshqarish

10.6. Jismoniy tarbiya va sportni targ’ib qilish

Respublikamizda milliy g’oya va aholining iftihorini keng ommaga targ’ib qilishda jismoniy tarbiya va sport hamda xalq milliy o’yinlarining mohiyati kattadir. Ular haqida targ’ibot ishlarini olib borish ham muhim ahamiyatga egadir. Ommaviy axborot vositalari orqali va bevosita muloqotlarda O’zbekiston Davlat jismoniy tarbiya va sport qo’mitasi, «Ma’naviyat va ma’rifat» jamoatchilik markazi va boshqa tashkilotlar bu sohada samarali mehnat qilib kelmoqda.

Hozirgi kunda televideniyada berilayotgan sport ko’rsatuvlari, ayniqsa, futbol, tennis, kurash, boks hamda milliy o’yinlarni barcha miriqib tomosha qiladi. Sportga oid adabiyotlar, gazeta va jurnallarni berilib o’qiydigan muxlislarning soni tobora oshib bormoqda.
Hayotiy tajribalar, amaliy faoliyatlar natijasining ko’rsatishicha, o’quvchilar gazetalarda milliy sport turlari, sevimli sport musobaqalari, ularda ishtirok etuvchi mahalliy jamoalar, sportchilar haqida xabarlar yozishni talab qilmoqdalar. Qishloq aholisi o’rtasida jismoniy tarbiya va sport ishlari etarli darajada targ’ibot qilinmoqda. Chunki, u erlarda moddiy-texnik ta’minot, sport inshootlarining soni ko’paymoqda. Aksariyat katta-kichik kishilar jismoniy mehnat bilan band. Qolaversa, ularda jismoniy tarbiya va sportga ehtiyoj tushunchasi hali to’la darajada emas desa bo’ladi. Shu tomonlarni hisobga olgan xolda, avvalo, sport inshootlarini qurish va jismoniy tarbiya ta’limi bilan aholini qurollantirishning zamonaviy usullarini topish lozim bo’ladi. Buning uchun madaniyat, san’at, adabiyot, manaviyat va ma’rifat xodimlarining jismoniy tarbiya va sport hamda sayohat sohasidagi faoliyatlarini yanada kuchaytirish, ularning mafkuraviy targ’ibotini keng yo’lga qo’yish maqsadga muvofiqdir.
Eng muhim va jonli targ’ibot vositasi sifatida sport musobaqalari, ommaviy sog’lomlashtirish tadbirlari, jamoalarning o’rtoqliq uchrashuvlarini tashkil qilish lozim. Ularda sport tashkilotlarining rahbarlari, olimlar, faxriylar, xalqaro sport musobaqalarining sovrindorlari bilan muloqotlar uyushtirishni yaxshilash maktab o’quvchilarining «Quvnoq startlar» va «Umid nihollari»ni mazmunan boyitib, televideniyada ko’proq namoyish qilish kerak.
Sport tashkilotlari va ularning quyi tarmoqlarida boshqarish faoliyatlarini tashkil qilishda ish uslublari muhim ahamiyat kasb etadi. Targ’ibot shakllari, vosita­lari va asosiy mazmunini talabalar mustaqil ravishda o’rganishlari maqsadga muvofiqdir.