Mavzu: akademik litseylarda maxsus kurslarni oʻqitish metodikasi

1.3 Maxsus fanlarni o’qitishga qo’yiladigan talablar. Maxsus fanlarni o’qitishda kasbiy-pedagogik bilimlarning ahamiyati.

Pedagogik fanlarni o’qitish metodikasi fani yakka holda mukammallikka erisha olmaydi. U ham boshqa fanlar kabi ijtimoiy fan yutuqlaridan foydalanadi va mazmunan boyib boradi. Hozirgi kunimizda umumbashariyat tomonidan yaratilgan bilimlar va kelajak haqida ma`lumot beruvchi nazariyalar ma`lum darajada pedagogika fani uchun manba bo’lib xizmat qiladi. Boshqa fanlar kabi pedagogika har bir insonning ijtimoiy kamolotiga xizmat qiladi.Tabiat va jamiyatning rivojlanishi qonuniyatlari to’g’risidagi ma`lumotlarga asoslanadi va o’zi ham ijtimoiy fan sifatida rivojlanib boradi. Shu sababli u falsafa, tarix, iqtisod, psixologiya, sotsiologiya, etika va estetika kabi fanlar bilan uzviy aloqadadir. 
Ma`lumki, har bir o’qituvchi-tarbiyachi, talaba o’z ona yurti tarixini bilishi, vatanparvar bo’lishi lozim. Ta`lim-tarbiya tarixi, pedagogika tarixi fanidan xabardor bo’lmay turib, o’qituvchilik qilishi mumkin emas. Pedagogika nazariyasini chuqurroq anglash uchun uning o’tmishdagi taraqiyotini bilish kerak. Masalan, pedagogika tarixi o’tmishda ta`lim-tarbiya borasida qanday kurashlar bo’lgani va qanday qilib ijobiy yoki salbiy yakunlangani, ijtimoiy-iqtisodiy va siyosiy sharoitlarning o’zgarishi tufayli pedagogik g’oyalar, tarbiya muassasalaridagi ishlarning mazmuni va metodlari qanday o’zgarib borganini, tarixda ijod etgan olimlarning pedagogik g’oyalari va ularning faoliyatlari bilan tanishtiradi. 
O’qituvchi talabalarga bilim berish, ma`lumotli qilish, tarbiyalash maqsadida unga tizimli ta`sir ko’rsatadi. Bunda psixologiya va ijtimoiy omillarga asoslanadi. Ya`ni ko’rsatilayotgan ta`sirning samarasini bilish uchun pedagog talabaning sezgi, idroki, tasavvur, diqat va tafakkur, fikrlash jarayonining qanday kechayotganini bilishi va ularga asoslanib ta`sir ko’rsatish rejasini belgilaydi. 
Demak, Maxsus fanlarni o’qitish metodikasi fani psixologiya va sotsiologiya kabi fanlar bilan ham uzviy bog’langandir. Ma`lum ma`noda o’qituvchilarga xizmat qiladigan psixologiya turkumidagi fanlarni ham pedagogik fanlar tizimiga kiritish mumkin. 


Etika va estetika fanlari pedagogikaning tarbiya nazariyasi bo’limi bo’yicha ma`lumot beradi. Bu fan talabaning xulqi, odobi me`yorlarini aniqlash, belgilash hamda go’zallikni chin ma`noda tushuntirish, talaba ongida hayotning jozibali, nafis qirralariga bevosita rag’bat uyg’otish borasida pedagogika fani bilan aloqadadir. Fanlarni o’qitish yo’llari ham pedagogika fanining didaktika bo’limiga aloqador. Chunki har qanday fanni o’qitish metodi shu fanning mazmuni, tizimini talabalar tomonidan o’zlashtirib olinishiga xizmat qiladi. Chunonchi, pedagogika fani bolalar anatomiyasi, fiziologiyasi, bolalar gigiyenasi va bolalar kasalliklari kabi fanlar bilan ham mustahkam aloqada. Bu fanlar bir-biriga chambarchas bog’liqdir. Pedagogika fani ob`ekti yil sayin kengayib bormoqda, natijada uning tarmoqlari ham bir necha guruhlarga ajralmoqda. Ular pedagogika fanlari tizimini tashkil etadi. 
Ma`lumki, turli sohada bilim oluvchi talabalarni o’qitish va tarbiyalashning nazariy hamda seminar tomonlarini yolg’iz pedagogika fanining o’zi mufassal yoritib bera olmaydi. Pedagogik fanlarni o’qitish metodikasi fani tarmoqlari mazkur muammolarni ijobiy hal etishda muhim omil hisoblanadi.