Əhəmiyyətlilik prinsipinə əsasən informasiya o zaman əhəmiyyətli hesab olunur ki, onun buraxılması yaxud təhrif edilməsi istifadəçilərin iqtisadi qərarına təsir göstərmiş olur. Əhəmiyyətlilik konkret şəraitdə obyektin yaxud səhvin həcmindən asılıdır. Əhəmiyyətli maddələr dedikdə, maliyyə hesabatlarının istifadəçilərinin bilməli olduqları mühüm maddələr başa duşulur.
İkili yazılış prinsipi - baş vermiş iqtisadi hadisənin, əməliyyatın eyni məbləğdə bir hesabın debetində digər hesabın kreditində yazılmasını nəzərdə tutur. İkili yazılış üsulu bütün biznes əməliyyatlarının müvafiq mühasibat hesablarında əks etdirilməsini və ümumiləşdirilməsini təmin edir, onun əsasında maliyyə bərabərliyi əldə olunur: Aktivlər =Kapital + Öhdəliklər + Gəlirlər – Xərclər. Bu üsulun kəşfinə qədər maliyyə əməliyyatlarını qeydə almaq üçün birtərəfli qeydiyyat (yazılış) üsulundan istifadə edilmişdir.
