Muammoli o‘qitish texnologiyasi reja

Muammoli ta’lim texnologiyasining maqsadi ta’lim oluvchilarga bilim, ko‘nikma va malakalarni egallatish, ular tomonidan mustaqil faoliyat usullarini o‘zlashtirish, ularning bilish va ijodiy qobiliyatlarini rivojlantirishdan iborat.
T.V.Kudryavtsev muammoli o‘qitish mohiyatini quyidagida ko‘radi: muammoli o‘qitish talabalar oldida muammoli vaziyatlarni yaratishda, talabalarning mustaqilligida va o‘qituvchining umumiy rahbarligi ostida, maktab o‘quvchilarining o‘qituvchi bilan birgalikda faoliyati borishida bu vaziyatlarni anglash, qabul qilish va hal qilishda xulosalanadi. Biroq, bunday aniqlash muammoli o‘qitishni tushunishning butun hajmini aks ettirmaydi. Bundan tashqari, ba’zan o‘qitishning tadqiqot usullari guruhi ham muammoli o‘qitish deb yuritiladi. Ehtimol, bu erda “muammoli” so‘zini tadqiqot ma’nosida tushunish ta’sir ko‘rsatadi.
O‘qituvchisi tomonidan qo‘yilgan muammoni hal etish jarayonida talaba ma’lumotlarni qayta ishlabgina qolmaydi, balki ularni o‘zlashtiradi va o‘zi uchun yangi bilimlarni kashf etadi. Muammoli o‘qitishning asosiy mohiyati hamda afzalligi shundaki, o‘qituvchi ta’lim usullari (muammoli savollar qo‘yish, gipotezalarni ilgari surish va ularni tasdiqlash yoki rad etish, talabalarga “yordam so‘rab” murojaat etish va boshqalar) orqali ularni ijodiy fikrlashga hamda munozaraga chorlaydi.
Muammoli metodlar – fandan muammoli vaziyatlar yaratishga, talabalarning maxsus fanlardan bilimlarini faollashtirishni talab etadigan, murakkab masalalarni izlash va echishga, tahlilga, alohida faktlar ortida hodisa va qonunlarni ko‘ra olishlariga asoslangan metodlardir.
Hozirgi zamon psixologiyasi va didaktikasi shunga asoslanadiki, fikr yuritish jarayonining boshlang‘ich momenti, odatda, muammoli vaziyat bo‘ladi. Insonda biror narsani tushunishga talab paydo bo‘lganidagina u fikr yurita boshlaydi.
Muammoli vaziyat – muayyan qiyinchilik sabab yuzaga kelgan holat bo‘lib, uni bartaraf etish yo‘li topilishi kerak. Vazifa engil hal etiladigan yoki aksincha hal etilishi mumkin bo‘lmagan paytda muammoli vaziyat vujudga kelmaydi.
Muammoli o‘qitish jarayonida o‘qituvchi avvalo muammoli vaziyat yaratadi, savollar qo‘yadi, masalalarni, eksperimental topshiriqlarni taklif qiladi, muammoli vaziyatni echishga qaratilgan muhokamani uyushtiradi, xulosalarining to‘g‘riligini tasdiqlaydi. Talabalar oldingi bilim va tajribalariga asoslanib muammoli vaziyatni hal qilish yo‘llari to‘g‘risida o‘ylaydilar hamda takliflar kiritadilar. Oldin olgan bilimlarini umumlashtirib, hodisalarning sabablarini aniqlagan holda, ularning kelib chiqishini tushuntiradi, muammoli vaziyatni echishning eng oqilona variantini tanlaydilar. Bu metod ta’lim oluvchilarning bilim qiziqishini oshiribgina qolmay, ularda fikrlash qobiliyatini ham rivojlantiradi.
Muammoli vaziyatni o‘rganish mavzuga oid materialni tahlil qilishda talaba shu vaziyatga o‘zi kirishishi, uni tushunishi, baholay olishi kerak. Ushbu holatda u qanday muammo borligi va qo‘yilayotgan muammoning mohiyati nimada ekanini aniqlashi lozim, muammoni hal etishdagi o‘zining roli va bunda o‘zini qanday tutishi kerakligini belgilashi kerak. Muammoli vaziyatlar metodi tayyorlov, tanishuv, tahlil va yakuniy qaror qabul qilish bosqichlariga bo‘linadi. Tayyorlov bosqichida o‘qituvchi maqsadni belgilab, kerakli vaziyatni rejasini ishlab chiqadi, ya’ni:
a) beriladigan misol nazariy kursni mantiqan davom ettirishi va talabalarning kelgusidagi kasbiy ehtiyojlariga muvofiq bo‘lishi kerak;
b)qo‘yilayotgan muammo murakkabligi ta’lim oluvchilarning imkoniyatlari darajasida bo‘lishini hisobga olish kerak, ya’ni talaba bir tomondan vazifani bajara olsin, ikkinchi tomondan uni bajarish ishtiyoqi hamda muvaffaqiyat hissi paydo bo‘lsin;
v) talabalarga muammo ustida ishlash bo‘yicha yo‘l-yo‘riqlar berilishi kerak. Tanishuv bosqichida talabalar muammoni real, ya’ni jonli muhokama qilishga jalb etiladi. O‘qituvchi ta’lim oluvchilarning ma’lum sohadagi bilim, ko‘nikmalarini hisobga olgan holda bajariladigan, ishning umumiy izohini belgilaydi. Individual ravishda yoki butun guruhni qo‘yilayotgan muammoning mazmuni bilan tanishtiradi. Tahlil va yakuniy qaror qabul qilish bosqichida muammoli vaziyatni tahlil etish guruhiy ish bo‘lgani uchun muammo ochiq bahs-munozara shaklida hal etilgani ma’qul. Muhimi, talabalardagi faollikni rivojlantirish va muammoni hal etish bo‘yicha boshqalar kiritgan taklifga xolis baho berish. Bu esa ishlab chiqarishda yuzaga keladigan vaziyatlarni tahlil etish ko‘nikmasining takomillashuviga va mustaqil ravishda qaror qabul qila olish qobiliyatini rivojlantirishga imkon yaratadi. Barcha tahlillardan so‘ng yakuniy xulosa chiqaradilar.
Maqsadga yo‘naltirilgan muammoli vaziyatlarni yaratishda quyidagilarga e’tibor berish lozim:

1. 
   Muammoli vaziyat ta’lim oluvchilarning ishlab chiqarish faoliyatiga asoslangan bo‘lishi kerak.
   
2. 
   Muammoli topshiriq talaba o‘zlashtirgan bilim, ko‘nikma va malakalar darajasiga mos bo‘lishi lozim.
   
3. 
   Muammoli vaziyat yangi mavzuni tushuntirishdan oldin qo‘yilishi kerak. Agar mos muammoli vaziyatni hal etishga talabalar malakasi yetarli bo‘lmasa, ularga ayrim amallarni bajarishdagi ish usullarini ko‘rsatish, zarur bo‘lgan bilimlarni eslatish lozim.
   
4. 
   Bilim, ko‘nikma va malakalar takomillashuv jarayoni bevosita o‘qituvchi-pedagogning rahbarligi ostida muammoli vaziyatlarni hal etish yo‘li bilan amalga oshiriladi. Muammoli vaziyat yaratish bilan birga, xulosa chiqarishlariga yordam beradigan yo‘llovchi savollar berib borishni ham nazarda tutish lozim.
   

Muammoli o‘qitish jarayonini qurish uchun mos ravishdagi muammoli vaziyatlarni oldindan ko‘zda tutilgan va tizimli yaratish talab qilinadi. Quyida keltirilganlar maxsus fanlarni o‘qitish amaliyoti uchun xarakterli hisoblanadi.