Ağırlıq mərkəzi vəziyyətinin hündürlüyü. Bədənin ağırlıq mərkəzi dayaq üzərindən nə qədər hündür yerləşərsə, bir o qədər də sabitlik dərəcəsi aşağı olacaqdır. Məsələn, duruş vəziyyətindən oturuş vəziyyətinə keçdikdə ağırlıq mərkəzi enəcək, onun hündürlüyü dayaq üzərindən azalacaq və buna müvafiq sabitlik dərəcəsi artacaq. Duruş vəziyyətində əlləri yuxarı qaldırdıqda, ağırlıq mərkəzi yuxarı qalxacaq, onun hündürlüyü artacaq və sabitlik dərəcəsi azalacaqdır.
Ağırlıq xətti. Bədənin ağırlıq xəttinin yerinin dəyişməsinin sabitlik dərəcəsinə olan təsiri, əsas etibarilə bədənin ağırlıq xəttinin dayaq meydançasının mərkəzindən keçməyən vəziyyətlərdə meydana çıxır. Məsələn, duruş vəziyyətində gövdənin sağ tərəfə büküldüyü zaman ağırlıq xətti dayağın sağ sərhəddinə yaxın keçir. Bu halda sabitlik dərəcəsi sola nisbətən sağa tərəf az olur.
