5. Qo‘rquv va hayajonga asoslangan muloqot uslubi. Bunday muloqot uslubiga odatda yosh, tajribasiz o‘qituvchilar tushib qolishi mumkin. Ushbu uslub asosida boshlangan muloqot ko‘pincha o‘quvchilarni tez-tez ogohlantirish, ularni qattiqqo‘llik bilan tarbiyalashga harakat qilish, o‘qituvchi yoqtirmagan o‘quvchilar hatti-harakatini ta’qiqlash vaziyatida olib boriladi. O‘quvchilar faolligi, tashabbuskorligi inkor etiladi. Natijada o‘qituvchi bilan o‘quvchilar orasida ko‘z ilg‘amas qarama-qarshiliklar paydo bo‘ladi.
Muloqot jarayonidagi ushbu qarama-qarshiliklar o‘quvchilarda o‘z tushunchalariga muvofiq paydo bo‘lgan dastlabki sifatlar bilan o‘qituvchining o‘quvchilarga qo‘yadigan talablari va ularni bajarish imkoniyatlari o‘rtasida ziddiyatlarning kelib chiqishidan paydo bo‘ladi. Ba’zan o‘quvchining ongi bilan xulqi bir-biriga muvofiq kelmasligidan, yoki o‘qituvchining o‘quvchilar yosh xususiyatlarini, fe’l-atvori, xarakteri, qiziqishlari, jismoniy, ruhiy hamda fiziologik jihatdan sog‘lomligini bilmasliklari oqibatida ziddiyatlar kelib chiqadi. Muloqot jarayonidagi ushbu ziddiyatlarni bartaraf etishda asosan o‘qituvchining o‘zi qizg‘in faoliyat olib borishi, ustoz o‘qituvchilar tajribalaridan foydalanishi, lozim bo‘lganda, tortinmasdan ulardan yordam so‘rashi maqsadga muvofiqdir.
O‘quvchilar ta’lim-tarbiya jarayonida milliy va umuminsoniy qadriyatlarni, axloqiy normalarni o‘zlashtiradilar. O‘quvchi eng yaxshi insoniy fazilatlarni, axloq-odobni, muloqot madaniyatini asosan o‘qituvchi timsolida anglab olishini unutmaslik kerak. O‘quvchilar jamoasida o‘qituvchilar bilan o‘zaro munosabatlar insonparvarlik tamoyillariga asoslanadi. Ular odatda ikki xil bo‘lib biri rasmiy, ikkinchisi norasmiy muomala deyiladi.
Rasmiy muomala munosabatlari O‘zbekiston Respublikasining Qonunlari, direktiv hujjatlariga asoslanadi.
Norasmiy muomala pedagogik etika va estetikaning konuniyatlariga va o‘qituvchi odobiga asoslanadi va jamoaning har bir a’zosi tomonidan ixtiyoriy ravishda bajariladi. Muloqot odobi psixologik qonuniyatlar, odob normalari va qoidalari, talablari hamda o‘qituvchilar jamoasining fikri asosida boshqariladi.
