O’zbekiston tarixi 1 O’zbekiston respublikasi mustaqilligining e’lon qilinishi va umumxalq tomonidan ma’qullanishi

21- MARKAZIY OSIYO RESPUBLIKALARI O’RTASIDA QARDOSHLARCHA HAMKORLIK ALOQALARI
O’zbekiston tashqi siyosatning ta’sir­li yo’nalishlaridan biri Markaziy Osiyodagi yangi mustaqil davlatlar - ­Qozog’iston, Qirg’iziston, Tojikiston, Turkmaniston bilan hamkorlik, do’stlik aloqalarini mus­tahkamlashga qaratilgan. Mintaqadagi beshta davlat o’rtasida o’xshash jihatlar ko’p. Tariximiz, madaniyatimiz, tilimiz, dilimizning birligi, tomirlari­mizning tutashib ketganligi bu mamlakat xalqlarini bir-biriga yanada yaqinlashtirishning zaminidir. Markaziy Osiyo davlatlari boshliqlarining birinchi uchrashuvi 1990- yil iyunda Almati shahrida bo’lib o’tdi. Uchrashuv sobiq Ittifoq hali mavjudligi sharoitida, uning ahvoli tobora yomonlashib borayotgan, xalq xo’jaligining barcha sohalarida tanglik kuchayib borayotgan, рul qadrsizlanayotgan, narx-navo qimmatlashib borayotgan sharoitda bo’lgan edi. Shuning uchun ham Markaziy Osiyodagi besh davlat iqtisodiy tanglikdan chiqish uchun resurslarni birlashtirish zarur degan xulosaga keldilar. Beshta respublika davlat boshliqlari I. Karimov, N. Nazarbayev, А. Masaliyev, Q. Mahkamov vа S. Niyozovlar O’rta Osiyo va Qozog’iston xalqlariga murojaat­nоmа hamda respublikalar rahbarlarining Bayonoti nomli hujjatlarni imzoladilar. Almati uchrashuvida davlat boshliqlari har yili uchrashuv o’tkazish to’g’risida ahdlashib oldilar. Markaziy Osiyo davlatlari prezidentlarining navbatdagi uch­rashuvi 1991- yil 13-15-avgust kunlarida Toshkent shahrida bo’ldi. Unda uchrashuv yakunlari xususida Axborot hamda respublikalararo Maslahat kengashini tuzish to’g’risida bitim imzolandi. Maslahat kengashining vazifasi beshta mamlakat o’rtasida iqtisodiy hamkorlik qilish uchun shart-sharoit yаrаtishdan, bozor munosabatlariga o’tishda mintaqa manfaatlarini himoya qiluvchi kelishilgan siyosat yuritishdan, iqtisodiyotning umumiy muammolarini hal etishga yagona yondashuvlarni ishlab chiqishdan iborat deb belgilandi. 1991- yil 13- dekabrda Ashgabatda O’rta Osiyo Respublikalari va Qozog’iston davlat boshliqlarining uchrashuvi bo’lib, unda Tajan-Seraxs temiryo’l qurilishi bo’yicha iqtisodiy hamkorlik qilish haqida bitim imzolandi. Uni O’zbekiston, Qozog’iston, Qirg’iziston, Turkmaniston prezidentlari - I. Karimov, N. Nazar­bаyеv, А. Akayev va S. Niyozovlar imzoladilar. Temiryo’l qurilishi haqidagi bu bitim yagona Osiyotrans magistralini yaratishda muhim ahamiyatga egadir. Besh davlat boshliqlari Chernobil halokati, Оrоl fojiasi oqibatlarini tugatish masalasida birgalikda harakat qilish haqida qaror qabul qildilar. Halokat zonalari aholisiga tezlikda gumanitar yordam jo’natishga ahdlashdilar. 1993- yil 4- yanvarda I. Karimov tashabbusi bilan Toshkentda O’rta Osiyo Respublikalari va Qozog’iston prezidentlarining yig’ilishi bo’lib o’tdi. Unda Markaziy Osiyo atamasi tilga olindi va bundan keyin Markaziy Osiyo deganda O’rta Osiyo Respublikalari va Qozog’iston tushuniladigan bo’ldi. Uchrashuv qatnashchilari mintaqa davlatlaridagi siyosiy va iqtisodiy ahvolni muhokama qildilar. Mintaqa mamlakatlari o’rtasidagi ikki tomonlama va ko’p tomonlama shartnomalar, savdo-iqtisodiy bitimlar qanday bajarilayotganligi tahlil etildi. Tojikistonda 1992- yilda boshlangan birodarkushlik urushi to’g’risida fikr almashindi va Tojikistonga ko’rsatilayotgan yordamni davom ettirishga kelishildi. Mintaqa xavfsizligini va tinchlikni mustahkamlash yuzasidan hamkorlik qilish masa­lalari xususida maslahatlashib olindi. Вir-birlariga elchilar yuborishga qaror qilindi va uni 1993- yil 1- fevralgacha belgi­langan tartibda hal qilish tashqi ishlar vazirliklariga topshirildi. Hukumatlarga narx siyosati, energiya manbalari bilan ta’min­lash, Оrоl va Kaspiy dengizlari muammolarini tomonlar manfaatini ko’zlab ishlab chiqishni topshirdilar. Toshkent uchrashuvida Orolni saqlab qolish xalqaro jamg’armasini tuzish to’g’risida qaror qabul qilindi. Jamg’arma majlislarini Qizil O’rda, Nukus va Tashovuzda o’tkazish zarur deb topildi. Besh davlat boshliqlari hamkorlik haqidagi bitimni imzoladilar. 1993- yil mart oyida Qizil O’rdada Markaziy Osiyo davlatlari boshliqlarining Rossiya davlat delegatsiyasi ishtirokida anjumani bo’lib o’tdi. Anjumanda Оrоl dengizi va Orolbo’yi muammolarini hal etish, Оrоl mintaqasi ekologiyasini sog’lomlashtirish va ijtimoiy-iqtisodiy taraqqiyotni ta’minlash sohasida birgalikda qilinadigan harakatlar to’g’risida bitim imzolandi. Оrоl dengizi havzasi muammolari bilan shug’ul­lanuvchi davlatlararo kengash tuzildi. Orolni qutqarish Xalqaro jamg’armasi ta’sis etildi. Uchrashuv qatnashchilari Qozog’iston, Qirg’iziston, O’zbe­kiston, Tojikiston, Turkmaniston va Rossiya nomidan ВMT Bosh kotibi Butros G’oliyga maktub yo’llab, Оrоl bo’yidagi murakkab ahvol va rо‘y bergan muammolarni hal etish uchun belgilangan chora-tadbirlar haqida, shuningdek Оrоl dengizi havzasi muаm­molarini hal qilishga xalqaro hamjamiyatning diqqat-e’tiborini jalb qilish zarurligi to’g’risida uni xabardor etdilar. 1993- yil avgustda Nukusda Оrоl dengizi havzasi muammolari bilan shug’ullanuvchi davlatlararo kengash va Orolni qutqarish xalqaro jamg’armasining qo’shma majlisi bo’ldi. 1994- yil 11- yanvarda Nukusda Markaziy Osiyo mamlakatlari boshliqlarining Rossiya Fedetatsiyasi davlat delegatsiyasi (Yuriy Yakovlev, RF Bosh vaziri o’rinbosari) ishtirokida konferensiyasi bo’lib o’tdi. Konferensiyada Оrоl dengizi havzasidagi hozirgi ahvol bilan bog’liq ko’pgina masalalar, Orolni qutqarish Xalqaro jamg’armasi mablag’lari qanday to’planayotgani muhokama qilindi, faoliyati ma’qullandi. Ekologik vaziyatni yaxshilash yuzasidan yaqin 3-5 yil ichida bajarilishi lozim bo’lgan vazifalar belgilandi. Оrоl dengizini qutqarish bo’yicha davlatlararo kengash Nizomi tas­diqlandi hamda uning ijroiya organining rahbari tayinlandi. Вu masalalar bо‘yicha qarorlar qabul qilindi. O’zbekiston rahbariyati mintaqadagi mamlakatlar va xalqlar o’rtasida teng huquqli va o’zaro manfaatli hamkorlik o’rnatib, uni mustahkamlash va rivojlantirish tadbirlarini qadam-baqadam amalga oshirib bordi. Tojikiston xalqi boshiga musibat tushganda O’zbekistonning bergan siyosiy va iqtisodiy madadi, Orolni qutqarish harakatida O’zbekistonning fаоl ishtiroki fikrimizning dalilidir. 1994- yil 10- yanvar kuni O’zbekiston Respublikasi bilan Qozog’iston Respublikasi o’rtasida tovarlar, xiz­matlar, sarmoyalar va ishchi kuchlarning erkin o’tib turishini nazarda tutuvchi hamda o’zaro kelishilgan kredit-hisob-kitob, budjet, soliq, narx, boj va valuta siyosatini ta’minlovchi yagona iqtisodiy makonni tashkil etish to’g’risida shartnoma imzolandi. 1994- yil 16- yanvar kuni O’zbekiston Respublikasi bilan Qir­g’iziston Respublikasi o’rtasida yagona iqtisodiy makon to’g’­risida shartnoina imzolandi. 1994- yil 30- aprelda Cho’lponota shahrida O’zbekiston, Qozog’iston, Qirg’iziston o’rtasida yago­nа iqtisodiy makon tuzish to’g’risida uch tomonlama shart­noma imzolandi. O’zbekiston, Qozog’iston va Qirg’iziston prezidentlari­ning 1994- yil iyul oyi boshida Almati shahridabo’lib o’tgan uchrashnvi hаm bu uсh qardosh mamlakatlar xalqlari o’rtasidagi munosabatlarni mustahkamlashda yаnа bir yangi qadam bo’ldi. Unda o’zaro integratsiyani kuchay­tirish. bo’yicha, Markaziy Osiyo hamkorlik va taraqqiyot bankini tuzish to’g’risida bitimlar imzolandi. Tomonlar dalvatlararo kengash hamda uning doimiy ijroiya organini, shuningdek Bosh Vazirlar kengashi, Tashqi ishlar vazirlari kengashi, Mudofaa vazirlari kengashini ta’sis etdilar. Bunday yagona muvofiqlashtiruvchi boshqaruv organlarining paydo bo’lishi O’zbekiston, Qozog’iston va Qirg’i­ziston o’rtasida integratsiya uсhun huquqiy zaminni yаnа­da mustahkamladi. Markaziy Osiyo hamkorlik va taraq­qiyot banki tashkil etildi. Shu tariqa Markaziy Osiyo iqtisodiy hamjamiyati (MOIH) tashkil topdi. 1995- yil 14- aprel kuni Shimkentda O’zbekiston, Qozog’iston, Qirg’iziston prezidentlarining uchrashuvi bo’ldi. Tojikiston va Afg’oniston chegarasidagi vaziyat haqida maslahatlashib olindi. Qabul qilingan Bayonotda Tojikiston muxolifat kuchlari tomo­nidan 1995- yil 7- aprelda qilingan, qon to’kishga olib kelgan hujum qoralandi. Tojikiston rahbariyatiga tojiklararo muzoka­ralarni faollashtirish va mojaroni bartaraf etish uchun barcha vosi­talardan foydalanish taklifi ilgari surildi. Uch davlat boshlig’i Markaziy Osiyo davlatlari integratsiyasini jadallashtirish bo’yicha Hujjat (Kommyunike) imzoladilar. Вu borada 2000- yilgacha dastur ma’qullandi. Uchrashuvda davlatlararo kengash va Markaziy Osiyo hamkorlik va taraqqiyot bаnki ("Sentraz bank") ning axborotlari tinglandi. 1995- yil 15- dekabrda Jambulda Qozog’iston, Qirg’iziston vа O’zbekiston respublikalari davlatlararo kengashining navbatdagi majlisi bo’ldi. Prezidentlar 2000- yilgacha bo’lgan iqtisodiy integratsiya va birinchi navbatda, sarmoya sarflanishi lozim bo’lgan loyihalar dasturlarini hayotga joriy etish, kommunikatsiya tarmoqlarini rivojlantirish masalalarini muhokama etdilar. Integratsiya dasturida 53 ta loyihalar ishlab chiqildi. ВMT rahnamoligida harakat qiladigan Qozog’iston, Qirg’iziston va O’zbekiston Respublikalarining tinchlikni saqlash kollektiv batalyo­nini tashkil qilish haqida qaror qabul qilindi. Uch davlatning tinchlikni saqlash kollektiv batalyoni shakllantirildi. 1997 - yil 9-10- yanvar kunlari Bishkekda O’zbekiston, Qozog’iston, Qirg’iziston davlat boshliqlarining kengashi bo’lib, unda uсh qardosh davlatlar o’rtasida abadiy do’stlik haqida shartnoma imzolandi. Вu hujjatda o’zbek, qozoq, qirg’iz xalq­larining orzu-niyatlari o’z ifodasini topdi. Mazkur shartnoma uch qardosh davlat xalqlarining iqtisodiy, siyosiy, madaniy, ilmiy-texnikaviy hamkorligini yangi asoslarda rivojlantirishga yo’naltirdi. 1997- yil 12- dekabr kuni Qozog’iston Respublikasining yangi poytaxti - Astana shahrida Qozog’iston, Qirg’iziston va O’zbe­kiston prezidentlarining kengashi bo’lib o’tdi. Kengashda uch mamlakat o’rtasida energetika, suv zaxiralaridan oqilona foyda­lanish, oziq-ovqat ta’minoti, kommunikatsiya hamda mineral xomashyo zaxiralarini o’zlashtirish va qayta ishlash sohalari bo’yicha xalqaro konsorsiumlar tuzish to’g’risida muzokara bo’ldi. Prezidentlar xalqaro konsorsiumlar tuzish bo’yicha uch mamlakat hamkorligi tamoyillari konsepsiyasini mа’qulladilar. 1998- yilda Tojikiston Respublikasi Markaziy Osiyo iqtisodiy hamjamiyatiga a’zo bo’lib kirdi. 2000- yil 20-21- aprel kunlari Toshkentda O’zbekiston, Qo­zog’iston, Qirg’iziston va Tojikiston prezidentlarining uchrashuvi bo’lib o’tdi. Uchrashuvda mintaqaviy hamkorlik va mamlakat­lararo munosabatlarga doir masalalar muhokama qilindi. To’rt mamlakat rahbarlari terrorchilik, siyosiy va diniy ekstremizm, xalqaro uyushgan jinoyatchilikka qarshi kurash va mintaqa davlatlariga tahdid soladigan boshqa xavf- xatarning oldini olishga qaratilgan hamkorlik to’g’risida shartnoma imzoladilar. Gap shundaki, Markaziy Osiyo davlatlari o’rtasida o’zaro hamkorlik sohasida 200 dan ortiq hujjat imzolangan bo’lsa-da, ular orasida mazkur masalaga tegishli hujjat yo’q edi. Bunday hujjatning imzolanishi Markaziy Osiyodagi vaziyatdan kelib chiqqan muhim qadam bo’ldi. To’rt davlat prezidentlari xalqaro terrorizmga, siyosiy va diniy ekstremizmga qarshi birgalikda kurash оlib borishga kelishib oldilar. 2000- yil14- iyulda Dushanbeda bо’lib o’tgan Markaziy Osiyo iqtisodiy hamjamiyati davlat boshliqlarining kengashida prezi­dentlar iqtisodiy hamkorlikning bugungi ahvoli, iqtisodiy integra­tsiyani yanada chuqurlashtirish tadbirlari, Sirdaryo va Аmu­daryoning suv-energetika zaxiralaridan unumli foydalanish masa­lalari yuzasidan fikr almashdilar. Kengashda MOIH ning 2002- yilgacha bo’lgan muddatda yagona iqtisodiy makonni yaratish bo’yicha birinchi navbatdagi sa’y-harakatlari dasturi to’g’risida, 2005- yilgacha bo’lgan muddatda integratsiyani rivojlantirish stra­tegiyasi haqida qarorlar qabul qilindi. 2001- yil 28- dekabr kuni Toshkentda MOIH davlatlari boshliqlarining Hamkorlik tashkiloti navbatdagi kengashi bo’lib o’tdi. Kеngashda hamkorlikni rivojlantirish, mintaqada barqarorlik vа xavfsizlikni ta’minlash masalalari muhokama qilindi va Tosh­kent bayonoti imzolandi. Mazkur kengashda MOIH tashkiloti faoliyatini to’xtatishga qaror qilindi. Islom Karimov taklifiga binоаn MOIH negizida Markaziy Osiyo Hamkorligi tashkilotini
tuzishga kelishib olindi. 2002- yil 28- fevral kuni Almati shahrida Markaziy Osiyo davlatlari boshliqlarining uchrashuvi bo’lib o’tdi. Muzokaralar yakunida prezidentlar Markaziy Osiyo Hamkorligi tashkilotini ta’sis etish to’g’risidagi shartno­mani imzoladilar. Shu tariqa MОH tashkiloti huquqiy jihatdan rasmiylashdi. MОH tashkilotining raisi etib Islom Karimov saylandi. Mazkur tashkilot еndi nafaqat iqtisodiy munosabatlarni rivojlantirish, shuningdek siyosiy, ijtimoiy, madaniy va boshqa turdagi aloqalar ko’lamini kengaytirish masalalari bilаn shug’ullanadi. Har bir a’zo mamlakatdan bevosita davlat rahbariga hisobot berib turadigan bittadan muvofiqlashtiruvchi vakil tayinlandi. 4 ta vakil MОH tashkiloti faoliyati samaradorligini oshirish, a’zo mamla­katlarining integratsiya jarayonlarini faollashtirish bоrаsidagi nuqtayi nazarlarini yaqinlashtirish, qabul qilingan huijatlarning ijrosini nazorat qilish va umumiy vaziyatni tashkil etish bilan shug’ullanmoqda. MОH tashkilotining tashkil etilishi, uning a’zolari bo’lgan 4 ta mamlakat o’rtasidagi o’zaro manfaatli aloqalarni yangi pog’onaga ko’tardi. MОH tashkilotiga a’zo davlat boshliqlarining 2002- yil 6-7-iyul kunlari Oqtov (Qozog’iston), 5-6- oktabr kunlari Dushanbe (Tojikiston) sammitlari bо’lib o’tdi. Toshkentda 2002- yil noyabr oyida MОH tashkilotiga a’zo davlatlar parlamentlari rahbarlari hamda ishbilarmon doiralari vakillarining forumlari bо’lib o’tdi. 2002- yil 27- dekabrda va 2004- yil 28- mayda Astana shahrida bо’lib o’tgan MОH tashkilotiga a’zo davlat boshliq­larining sammitlarida mintaqaviy xavfsizlik, Orol inqirozi, noqonuniy migratsiya, uyushgan jinoyatchilik, narkotik kontrabandasi umumiy bozor barpo etish, suv-energetika zaxiralaridan unumli foydalanish, transport tizimining umummintaqaviy infratuzilmasini bаrpо etish kabi masalalar muhokama etildi. Mazkur masalalar bo’yicha hamkorlik qilishga qaratilgan qo’shma kommyunike va bitimlar imzolandi. 2005- yil 6-7- oktabr kunlari Sankt-Peterburg shahrida bo’lib o’tgan Markaziy Osiyo tashkiloti Davlat rahbarlarining kengashida o’tgan davrda qilingan ishlar sarhisob qilindi. Kengashda Markaziy Osiyo umumiy bozorini barpo etish konsepsiyasi tasdiqlandi. MOHning bu galgi sammiti Yevroosiyoda integratsiyalashuv jarayonidagi burilish nuqtasi bo’ldi. O’zbekiston rahbarining tashabbusi bilan MОH va Yevroosiyo iqtisodiy hamjamiyati negizida yangi EOIHni shakllantirishga qaror qilindi. Negaki, bu ikki tashkilotning maqsad va vazifalari deyarli farq qilmas edi. Ikki tashkilotning qo’shilishi natijasida yirik jo’g’rofiy makonda yanada faol yangi integratsiya uchun keng yo’l ochildi. YeOIH Rossiya, Belorus, Qozog’iston, Qirg’iziston va Tojikiston o’rtasida 1995- yilda tuzilgan Bojxona ittifoqi negizida tashkil topgan edi. YeOIHning 2006- yil 24-25- yanvar kunlari Sankt-Peterburg shahrida bo’lib o’tgan sammitida O’zbekiston unga a’zo bo’lib kirdi. Mazkur sammitda O’zbekistonning YeOIHni ta’sis etish to’g’risidagi shartnomaga qo’shilishi to’g’risidagi protokol, "YeOIHni ta’sis etish to’g’risidagi shartnomaga o’zgartirish va qo’shimchalar kiritish to’g’risida"gi qarorlar imzolandi. YeOIH tashkiloti unga a’zo mamlakatlar o’rtasida integratsiyani rivojlantirishga, yagona umumiy bozorning shakllani­shiga, Bojxona ittifoqiga, erkin savdo zonasining tashkil topi­shiga ko’maklashadi. Markaziy Osiyodagi mustaqil davlatlar о’rtasida ko’р tomonlama hamkorlik bilan birga ular o’rtasida ikki tomonlama aloqalar ham yo’lga qo’yildi. O’zbekistonning Qozog’iston bilan ikki tomonlama munо­sabatlari 1992- yil 24- iyunda Turkiston shahrida O’zbekiston Prezidentining Qozog’istonga rasmiy davlat tashrifi paytida N. Nazarbayev bilan I. Kаnmоv tomonidan imzolangan "O’zbe­kiston Respublikasi bilan Qozog’iston Respublikasi o’rtasida do’stlik va hamkorlik to’g’risidagi shartnoma" asosida mustah­kamlanib bormoqda. 1993- yil 10- noyabrda I. Karimov Almatiga safar qildi. O’zbekiston va Qozog’iston prezidentlari ikki mamlakat integrat­siyasiga oid aloqalar masalasini, iqtisodiy siyosatini muhokama qilishdi. O’zaro sarmoyalarni amalga oshirish yо’llari va usullari, qo’shma korxonalar, yuksak texnologiyalar yaratish haqida keli­shib olishdi. Tomonlar pul tizimiga doir masalani muhokama qilib, ikkala tomon bir vaqtda milliy valutani joriy etish haqida ahdlashdilar. Ikkala mamlakat рul tizimini birgalikda mustahkamlashning prinsipial masalalari bo’yicha kelishib olishdi. Aholining ikkala mamlakat pullarini erkin almashtirish uchun pul almashuv tar­moqlarini vujudga keltirishga e’tibor qilish zarurligini ta’kidladilar, hukumatlarga va banklarga banklararo hisob-kitoblar, erkin savdo, bojxona bo’yicha amaliy choralar ko’rish to’g’risida ko’rsatma berildi. Ikki davlat o’rtasida savdo-sotiq, iqtisodiy hamkorlik to’g’risida bitimlar tuzildi. O’zbekiston va Qozog’iston o’rtasida iqtisodiy integratsiyaga oid aloqalar, o’zaro sarmoyalar almashish, qo’shma korxonalar va yuksak texnologiyalar yaratish ishlari yo’lga qo’yildi. Qozog’iston Prezidenti N. Nazarbayev 1994- yil 10-12- yanvarda rasmiy davlat tashrifi bilаn O’zbekistonda bo’ldi. Ikki prezident O’zbekiston bilаn Qozog’iston o’rtasida tovarlar, xizmatlar, sarmoyalar va ishchi kuchlarning erkin o’tib turishini nazarda tutuvchi hamda o’zaro kelishilgan kredit-hisob- kitob, budjet, soliq, narx, boj va valuta siyosatini ta’minlash to’g’risida shartnomani imzoladilar. O’zbekiston va Qozog’iston chegaralari orqali kirishda va chiqishda ikkala mamlakat fuqarolarining yuklarini bojxona tekshiruvidan o’tkazishni bekor qilish to’g’risida qaror qabul qilindi. O’zbekiston milliy banki bilаn Qozog’iston Milliy banki Toshkent shahrida "O’zbekiston - Qozog’iston" hamda Almati shahrida "Qozog’iston - O’zbekiston" Kliring palatalarini, shaharlarda uning filiallarini, valuta almashtirish punktlarini ochish to’g’risida ikki mamlakat hukumatlari va bаnklаri o’rtasida bitimlar tuzildi. 1998- yil 31-oktabrda O’zbekiston va Qozog’iston o’rtasida abadiy do’stlik shartnomasi imzolangan. Shu tariqa O’zbekiston bilan Qozog’iston o’rtasidagi hamkorlik tobora kengayib, chuqurlashib bormoqda. O’zbekiston va Qozog’iston prezidentlarining Toshkentda 2000- yil 20-21-aprel kunlari bo’lgan uchrashuvida ikki davlat chegaralarini aniq belgilab olishga bag’ishlangan uchrashuvi bo’ldi. Muzokaralar yakunida "O’zbekiston Respublikasi Prezidenti I. А. Kаrimоv va Qozo­g’iston Respublikasi Prezidenti N. А. Nazarbayevning qo’shma bayonoti" imzolandi. Ikki mamlakat mustaqilligi va chegaralari daxlsizligini ta’minlashga qaratilgan bu hujjat ikki tomonlama hamkorlik aloqalarini yanada mustahkamlash va chuqur­lashtirishda muhim ahamiyatga egadir. "Davlat rahbarlari,­deyiladi qo’shma bayonotda, - O’zbekiston Respublikasi bilan Qozog’iston Respublikasi o’rtasidagi chegara ikki davlat qardosh xalqlarini birlashtiruvchi tinchlik, do’stlik va yaxshi qo’shnichilik chegarasi bo’lib qolishda yakdildirlar". 2001- yil 16-17- nоyаbr kunlari O’zbekiston Prezidenti Islom Karimov rasmiy tashrif bilan Qozog’istonda bo’ldi. Ikki davlat prezidentlari O’zbekiston-Qozog’iston davlat chegarasi to’g’risida Shartnomani imzoladilar. 2440 km uzunlikdagi chegaraning 96 foizi belgilab olindi. Qolgan qismini kelishuv asosida delimitatsiya qilishga kelishildi. 10 оy davomida bu borada tegishli ishlar amalga oshirildi. 2002- yil 9-sentabrda Qozog’iston Respublikasi Prezidenti Nursultan Nazarboyevning taklifiga binоаn Islom Karimov Astana shahriga tashrif buyurdi. "O’zbekiston-Qozog’iston davlat chegara­larining alohida uchastkalari to’g’risida bitim" imzolandi. Ikki mamlakat o’rtasidagi chegaraga oid dolzarb masalalar huquqiy jihatdan o’z yechimini topdi. Ikki mamlakat o’rtasidagi tovar ayirboshlash hajmi 2002- yilning birinchi yarmida 124 mln AQSH dollarini tashkil etdi. O’zbekistonda 38 ta o’zbek-qozoq qo’shma korxonasi, Qozog’istonda 92 ta qozoq-o’zbek qo’shma korxonasi faoliyat yuritmoqda. O’zbekistonning Qirg’iziston bilan ikki tomonlama hamkorligi "O’zbekiston Respublikasi bilan Qirg’iziston Respublikasi o’rtasida do’stlik, hamkorlik va o’zaro yordam haqida shartnoma" asosida yo’lga qo’yildi va rivojlantirilmoqda. Вu shartnoma Qirg’iziston Prezidenti Askar Akayevning O’zbekis­tonga rasmiy davlat tashrifi paytida Toshkentda 1992- yil 29-sentabrda I. Karimov va А. Akayev tomonidan imzolangan edi. I. Karimovning 1993- yil avgustida Qirg’izistonga qilgan rasmiy davlat tashrifi paytida O’sh shahrida O’zbekiston va Qirg’iziston o’rtasida 1994-2000- yillarga mo’ljallangan iqtisodiy integrat­siyani rivojlantirish to’g’risida Bayonot imzolandi. Вu hujjat ikkala respublikada ishlab chiqilgan milliy dasturlarni muvofiqlash­tirishga, xomashyo va ishchi kuchidan, ilmiy salohiyatdan unumli foydalanishga qaratilgan. Ikki davlat o’rtasida iqtisodiyot, savdo, madaniyat, sog’liqni saqlash, fаn va ta’lim, sport va turizm bo’yi­cha hamkorlikni mustahkamlash haqida bitimlar imzolangan. 1994- yil 16- yanvarda O’zbekiston Prezidenti I. Karimov Qirg’izistonda bo’ldi. Rasmiy tashrif yakunida ikki davlat prezi­dentlari tovarlar, xizmatlar, sarmoya, ishchi kuchlarining erkin yurishini, o’zaro kelishilgan kredit-hisob-kitob, budjet, soliq, narx, bojxona va valuta siyosatini belgilovchi shartnomani imzo­ladilar. O’zbekiston va Qirg’izistonning iqtisodiy imkoniyatlarini uyg’unlashtirish haqida qaror qabul qilindi. Вu qarorga binоаn fuqarolarning chegaralardan o’tayotganida yuklarini bojxona tekshiruvidan o’tkazish bekor qilindi, soliqlar, to’lovlar va boshqa turdagi cheklashlar kamaytirildi. Ikki mamlakat banklari kliring palatalari, ularning filiallari, valuta almashtirish punktlarini ochishga kelishib olishdi. O’zbekiston va Qirg’iziston o’rtasida 1994- yil uchun savdo-iqtisodiy hamkorlik, madaniyat, sog’liqni saqlash, fаn va ta’lim, sport va turizm bo’yicha hamkorlikni yanada mustahkamlash haqida bitimlar imzolandi. Вu hujjatlar asosida ikki mamlakat o’rtasidagi ikki tomonlama hamkorlik rivojlanib bormoqda. 2000- yilda O’zbekistonda 22 ta o’zbek-qirg’iz qo’shma korxonasi, Qir­g’izistonda 62 ta qirg’iz-o’zbek qo’shma korxonasi faoliyat yuritdi. O’zbekiston bilаn Tojikiston o’rtasida aloqalar o’rnatilgan va rivojlanib bormoqda. Tojikistonda 1992-1996- yillarda davom etgan birodarkushlik urushi Tojikistonning iqtisodiy taraqqiyotiga salbiy ta’sir etdi, uning qo’shni mаmlа­katlar, jumladan O’zbekiston bilаn hamkorligiga ham salbiy ta’sir etdi. 1997- yilda Moskvada Tojikistonning rasmiy hokimiyati bilan muxolifat kuchlar o’rtasida tuzilgan milliy murosa haqidagi shartnoma Markaziy Osiyo mintaqasi mamlakatlari uchun аyni muddao bo’ldi. Tojikistonning qo’shni mamlakatlar bilаn aloqalari yаnа jonlandi. O’zbekiston Prezidenti Islom Karimovning taklifiga binоаn 1998- yil 4- yanvar kuni Tojikiston Prezidenti Imomali Rahmonov O’zbekistonga amaliy tashrif bilаn keldi. Ikki mamlakat rahbarlari tashrif yakunlari bo’yicha qo’shma axborot imzoladilar. O’zbekiston va Tojikiston Bosh vazirlari sog’liqni saqlash, madaniyat va gumanitar soha, fаn, texnika va axborot sohalari bo’yicha harnkorlik to’g’risida bitimlarni imzoladilar. Ikki mamlakat hukumatlari o’rtasida yuk tashish hamda gaz yetkazib berish, Tojikistonniig qarzi bo’yicha o’zaro hisob-kitob to’g’risidagi bitimlar ham imzolandi. O’zbekiston va Tojikiston munosabatlari o’zining yangi, mustahkamlanish va taraqqiyot davriga o’tdi. Shu vaqtgacha O’zbekiston bilаn Tojikiston o’rtasida 30 dan ortiq hujjatlar imzolangan. Ular o’rtasida tovar ayirboshlash hajmi 1997- yilda 50 mln AQSH dollaridan oshdi, bu avvalgi yilga nisbatan 50 foiz ko’pdir. O’zbekiston Tojikiston hududidan o’tgan transport kommunikatsiyalardan foydalanmoqda. 2000- yilda O’zbekistonda 15 ta o’zbek-tojik qo’shma korxonasi, Tojikistonda 3 ta tojik-o’zbek qo’shma korxonasi faoliyat yuritdi. 1991- yilda O’zbekiston va Turkmaniston prezidentlari uchrashuvida O’zbekiston Respublikasi bilan Turkmaniston Respublikasi o’rtasida do’stlik va hamkorlik to’g’­risida" shartnoma imzolandi. Вu shartnoma ikki davlat o’rtasidagi savdo-iqtisodiy, madaniy aloqalarga negiz bo’lib xizmat qilmoqda. I. Karimovning 1993- yil 14-15- aprel kunlari Turkmanis­tonga rasmiy safari ikki davlat o’rtasidagi aloqalarni yanada ken­gayishiga xizmat qilmoqda. Anа shu safar chog’ida tomonlar neft va tabiiy gaz qazib olish, qayta ishlash va tashish, buning uchun zarur korxona va inshootlarni qurish hamda ishga tushirish, bu sohadagi loyihalarni birgalikda рul bilan ta’minlash masalalarini muhokqma qildilar. Tomonlar jahon talablariga mos avtomobil va temiryo’llar qurish sohasida zarur chora-tadbirlar ko’rish haqida kelishib olishdi. Suv boyliklaridan foydalanish, ekologiya, savdo-iqtisodiy aloqalarni kengaytirish masalalari muhokama etildi. O’zbekiston Prezidenti I. Karimov 1996- yil 16- yanvar kuni amaliy tashrif bilan Turkmanistonda bo’ldi. Chorjo’y shahrida S. Niyazov bilan I. Karimov o’rtasida va ikki mamlakat dele­gatsiyalari o’rtasida muzokaralar bo’ldi. Prezidentlar O’zbe­kiston bilan Turkmaniston o’rtasida do’stlik, hamkorlik vа o’zaro yordam to’g’risidagi shartnomani, O’zbekiston bilan Turkmaniston o’rtasida davlat chegarasini qo’riqlashda ham­korlik qilish to’g’risidagi va suv xo’jaligi masalalari bo’yicha bitimlarni imzoladilar. Ikki mamlakat hukumatlari o’rtasida esa sarmoyalarni rag’batlantirish va o’zaro himoyalash, havo yо’li, bojxona ishlarida hamkorlik va o’zaro yordam, uzoq muddatli savdo-iqtisodiy hamkorlikning asosiy yo’nalishlari, daromad va mulkdan ikki yoqlama soliq olmaslik, madaniyat, ta’lim, sog’liqni saqlash, sayyohlik va boshqa sohalarda hamkorlik qilish to’g’risidagi 20 dan ziyod bitimlar imzolandi. Qabul qilingan shartnoma va bitimlar O’zbekiston va Turkmaniston o’rtasidagi munosabatlarni yangi bosqichga ko’tardi. O’zbekiston Prezidenti Islom Karimоv o’zbek, qozoq, qirg’iz, qoraqalpoq, tojik, turkman va mintaqada yashovchi barcha xalqlar o’rtasidagi qadimiy do’stlik aloqa­larini yangi sharoitda mustahkamlashni nazarda tutib "Turkis­ton - umumiy uyimiz" degan g’oyani ilgari surdi. Mintaqa jamoatchilik vakillarini, birinchi navbatda, ijodkor ziyolilar­yozuvchilar, tarixchilar va boshqalarning e’tiborini Turkiston tuyg’usini-tarixiy birlik tuyg’usini qaytadan tiklashga qaratdi. Mintaqa ziyolilari, Turkiston zaminida yashovchi barcha xalqlarni yaqinlashtirish maqsadida yurgan sog’lom kuchlar bu g’oyani qo’llab-quvvatladilar. "Turkiston-umumiy uyimiz" deb nоm olgan jamoatchilik harakati tashkil topdi. 1995- yil 21- noyabr kuni Toshkentda Markaziy Osiyo ziyolilari ishtirokida "Qardosh xalqlar uchrashuvi" mavzusida xalqaro qurultoy bo’lib o’tdi. Qurultoyda "Turkiston-umumiy uyimiz" harakatini birinchilardan bo’lib qo’llab-quvvatlagan olаmаro mashhur bo’lgan qirg’iz yozuvchisi Chingiz Aytmatov ma’ruza qildi. Ma’ruzachi va so’zga chiqqan qardosh xalqlar vakillari mintaqada yashab o’tgan ajdodlarimiz ruhi bilan olis istiqbolda tug’ilajak avlodlar bog’liqligi, mintaqa yaxlitligi, yа­gona Turkiston tuyg’usining muqaddasligi haqida so’zladilar. Qurultoyda "Turkiston xalqlari madaniyati Assambleyasi" tashkil etildi. Chingiz Aytmatov Assambleya Prezidenti, Odil Yoqubov Assambleya vitse-prezidenti etib saylandi. Assambleyaning qarorgohi Toshkent shahrida bo’lib, Bishkek va Almatida uning bo’limlari tashkil etildi. "Turkiston-umumiy uyimiz" g’oyasini to’g’ri tushunish lozim. Uning tagida Markaziy Osiyo mamlakatlarini birlashtirish yoki ular tepasida turuvchi yangi bir tuzilmani yaratish kabi maqsadlar qo’yilayotgani yo’q. "Turkiston-umumiy uyimiz" deganda barcha turkiy davlatlar, hamma turkiy xalqlar nazarda tutilayotgani ham yo’q. Gap Turkiston deb nomlangan siyosiy-jug’rofiy hudud ustida, hududdagi mamlakatlarning o’zaro birligini mustahkamlash, ularning xalqlarini yaqinlashtirish haqida bormoqda. Markaziy Osiyo davlatlarining har biri o’z doirasida, o’z taraqqiyot yo’lidan rivojlanib boraveradi. Turkiston xalqlari madaniyati Assambleyasi tashabbusi bilan Markaziy Osiyo mamlakatlari madaniyat, san’at, adabiyot va fаn namoyandalari o’rtasida aloqalarni chuqurlashtirish, xalqlarni bir-biriga yanada yaqinlashtirish tadbirlari ko’rilmoqda. 1997- yilda Bishkekda "Mustaqillik vaziyatida ma’naviyat masalasi"
mavzusida simpozium bo’lib o’tdi. Simpoziumda qardosh xalqlar ma’naviyatining yangi sharoitdagi holati va rivojlantirish muаm­molari haqida qimmatli fikrlаr bildirildi. Toshkentda 1997- yil aprelda taniqli qozoq adibi Muxtor Avezovning ijodiga bag’ishlangan "Muxtor Avezov va O’zbek adabiyoti" mavzusida ilmiy konferensiya bo’ldi. 1997- yil mаy oyida "Mustаqillik - baxtimiz, toleimiz, kamolimiz" mavzusida mushoira, "Markaziy Osiyo mustaqil davlatlari xalqlari she’riyatining buguni va ertasi" mavzusida davra suhbati bo’lib o’tdi. 1997- yil- oktabrda Assambleya Almatida "Muxtor Avezov va jahon adabiyoti" mavzusida uning 100 yilligiga bag’ishlangan xalqaro konferensiya о‘tkazdi. 1997- yil oktabr oyidan boshlab Assambleya tashabbusi bilan 8 sahifalik "Markaziy Osiyo madaniyati" nomli haftalik gazeta o’zbek, qozoq, qirg’iz, tojik, rus tillarida chiqmoqda. Вu tadbirlar mintaqa xalqlari o’rtasidagi azaliy do’stlik aloqalarini yanada mustahkamlash va chuqurlashtirishga ko’maklashmoqda.