Chigitli paxtadan mayda iflosliklarni ajratish texnologiyasi va uskulari
2. Chigitli paxtani mayda iflosliklardan tozalash mashinasini ishchi qismlariga qo’yiladigan asosiy texnik va texnologik talablar. Chigitli paxtani mayda iflosliklardan tozalagichlar paxta tozalash korhonalarining quritish-tozalash sexlariga o’rnatiladi. Ularga quyidagi texnologik talablar qo’yiladi:
-chigitli paxtani mexanik ta’sir ostida tozalashda tozalagichning ishchi organlari tolada nuqsonlar bo’lishiga va chigit jarohatlanishiga yo’l qo’ymasligi kerak;
-tozalagich chigitli paxtadan mayda iflosliklarni to’liq ajratish zarur;
-chiqindiga ifloslik bilan birgalikda chigitli paxta bo’lakchalari chiqib ketmasligi kerak.
Chigitli paxtani mayda iflosliklardan tozalagichlar chigitli paxtani tozalagichlarning tarkibiy elementlariga kiradi.
Tozalagich konstruksiyalarida tozalagichning ish unumdorligini va tozalash samaradorligini rostlovchi va nazorat qiluvchi mexanizmlar va qurilmalar mavjud bo’lishi kerak.
Chigitli paxtani mayda iflosliklardan tozalash jarayoni ishchi qismlarining ishlash qobiliyatiga bog’liq.
Chigitli paxtadan aralashmalarni ajratish jarayoni chigitli paxtaning seleksion navi, sanoat navi, xususiyatlariga, uning namlik darajasiga, tolasining uzunligiga, aralashmaning paxtaga qo’shilish vaqtiga va tolalarga ilashish tasnifiga bog’liq.
Chigitli paxtani iflosliklardan tozalash samaradorligi mashina ishchi organlarining chigitli paxtaga ta’sir etish usuliga: to’rli sirt yoki kolosnik ustida chigitli paxtani silkitish, tozalash vaqtida havo oqimining aralashishi, qoziqchalar yoki plankalarning chigitli paxtaga dinamik ta’siri, arrchali barabanlarning chigitli paxta bo’lakchalarining qanday titkilashiga bog’liq.
Tozalash mashinalari ishchi organlarini chigitli paxtaga ta’siri o’z navbatida bir qator sabablarga: tozalash mashinasining ish unumiga, ishchi qismlarning aylanish tezligiga, ishchi qismlari orasidagi texnologik tirqishlarga, ularning konstruksiyasiga, chigitli paxtaning nechanchi marotaba tozalanishiga va hokazolarga bog’liq.
Mayda iflosliklarni tozalash mashinalari texnologik oqimda o’rnatilishi hisobiga qarab individual va batareyali, ishchi organlarining chigitli paxtaga ta’siri jihatidan bir ta’sirli va qayta ta’sirli, ishchi organlarining soniga qarab bir barabanli va ko’p barabanli, konstruksiyasi bo’yicha esa barabanli va shnekli xillariga bo’linadi.
