Pedagogika nazariyasi, Pedagogika tarixi) (Pedagogika oliy ta’lim muassasalarining barcha bakalavriat ta’lim yo’nalishlari uchun) Toshkent 2019

Jamoa rivojlanishining ikkinchi bosqichi. Ushbu bosqich jamoa faollarining pedagog talablarini qo’llab-quvvatlashi hamda o’z navbatida uning o’zi bu talablarni jamoa a’zolari zimmasiga qo’yishi bilan tavsiflanadi. Endilikda pedagogik jamoada paydo bo’lgan va u bilan bog’liq bo’lgan muammo, masalalarni yolg’iz o’zlari hal qilmaydilar. Jamoa faollari bilan maxsus tarbiyaviy ish olib borish orqali bu ishga ularni jalb etadi. Jamoa hayotini tashkil qilish usuli murakkablashib boradi, ya’ni jamoa o’z-o’zini boshqarishga o’tadi.
Tarbiyalanuvchilar amaliy faoliyatining doimiy ravishda murakkablashib borishi mazkur davrning muhim xususiyati sanaladi. Ikkinchi bosqichda jamoaning muhim ishlarini o’quvchilar tomonidan muttasil rejalashtirishi, tadbirlarni o’tkazishga tayyorgarlik, uni o’tkazish hamda faoliyat natijalarni muhokama qilish jamoa faoliyatining ijodiy xususiyatini ko’rsatuvchi omillar sanaladi.
Jamoaning ijobiy rivojlanishi uning a’zolarida faoliyat motivlari (rag’batlari)ning paydo bo’lishi, ijodiy hamkorlik va o’zaro yordam munosabatlarining tez sur’atlar bilan rivojlanishiga olib keladi. Jamoada mustaqil faoliyatning yuzaga kelishida jamoa faollarining roli beqiyosdir. Ammo jamoa faolining jamoa a’zolari orasida hurmat qozona olishi, namuna bo’lishi, o’z burchini aniq va puxta bajarishi hamda o’z mavqyelarini suiste’mol qilmasliklari juda muhimdir. Bu o’rinda A.S.Makarenkoning jamoa faoliga nisbatan «Jamoa vijdoni» deya bergan ta’rifini eslab o’tish joizdir. Jamoa faollari bir muncha imtiyozlar (huquqlar)ga ega bo’lsa-da, ayni paytda uning o’ziga oshirilgan talablarning qo’yilishi maqsadga muvofiqdir.
Jamoaning rivojlanishi bu bosqichda to’xtab qolishi mumkin emas, chunki faoliyat ko’rsatayotgan kuch jamoaning bir qismi xolos. Bordi-yu jamoaning rivojlanishi ushbu bosqichda to’xtatib qolinsa, jamoa faollari guruhning boshqa a’zolari bilan qarama-qarshi qo’yish xavfi tug’ilishi mumkin. Mazkur bosqichda jamoa moddiy va ma’naviy imkoniyatlarini to’plab, mustahkamlanib va boyib borar ekan, shaxsning har tomonlama ulg’ayishi uchun zarur bo’lgan shart-sharoitlarni sekin-asta yaratib beradi.
Bu esa ikkinchi bosqichni – jamoa Shaxsni har tomonlama kamolga yetkazishni obyektiv shakli asosida boshlashini taqozo etadi. Bunda boshlang’ich davr bekor ketmaydi, faqat salbiy jo’shqinlikka emas, balki ijobiy jo’shqinlikka ham ega bo’ladi. Bir tomondan, u qiyinchiliklarga tayyorlanish imkonini beradi, bolada o’z-o’zini anglash va o’zini idora qilishga intilishni tarbiyalaydi. Ikkinchi tomondan, bu bosqichni amalga oshirish kishini har tomonlama ulg’ayishi uchun zarur bo’lgan amaliy va ma’naviy munosabatlar tizimi vujudga keladi.