Pedagogika tariyxı pán sıpatında. Eń áyyemgi dáwirlerden b e. VII ásirge shekemgi tálim-tárbiya hám pedagogikalıq pikirler. VII ásirden XIV ásirdiń birinshi yarımına shekem Orta Aziyada tárbiya, mektep hám pedagogikalıq pikirler

Ózbekstan Respublikasında «Bilimlendiriw haqqında»ǵı Nızam 1997-jıldıń 29-avgust kúni qabıllandı. Bul Nızamnıń ulıwma mazmunı 5 bólim hám 34 stat’ya ishinde jámlengen.

Birinshi bólim «ulıwma qaǵıydalar» dep atalınıp, ol óz ishine segiz stat’yanı qamtıydı. Onıń 1-3-stat’yalarında usı Nızamnıń qabıl etiliwindegi maqset, basshılıqqa alınatuǵın bilimlendiriw haqqındaǵı Nızam hújjetleri, bilimlendiriw tarawındaǵı mámleketlik siyasattıń tiykarǵı principleri óz kórinislerin tabadı. Qalǵan stat’yalarında bilim alıw huquqı, pedagogikalıq kásip penen shuǵıllanıw huquqı, bilimlendiriw mákemesiniń huquqıy maqamı, mámleketlik bilimlendiriw standartı, bilim beriw tili haqqındaǵı máseleler sáwlelendiriledi.

Ekinshi bólim «Bilimlendiriw sisteması hám túrleri» dep ataladı. Bul bólimde mámleketlik standartlarǵa muwapıq bilimlendiriw baǵdarlamaların ámelge asırıwshı mámleketlik hám mámleketlik emes mákemeler, bilimlendiriw sistemasınıń xızmet kórsetiwin hám rawajlanıwın támiyinlew ushın zárúr bolǵan izertlew jumısların orınlawshı ilimiy-pedagogikalıq mákemeler, bilimlendiriw tarawındaǵı mámleketlik basqarıw organları, sonday-aq olarǵa qaraslı kárxanalar, mákemeler hám shólkemlerdi Ózbekistan Respublikası bilimlendiriw sisteması óz ishine alatuǵınlıǵı atap ótiledi. Sonday-aq, Ózbekistan Respublikası bilimlendiriw sistemasınıń bir pútinligin hám úzliksizligin támiyinlewshi bilimlendiriw túrleride óz kórinisine iye boladı.

Úshinshi bólim «Bilimlendiriw procesi qatnasıwshıların sociallıq qorǵaw» dep atalınıp, ol bilim alıwshılardı, bilimlendiriw mákemeleri xızmetkerlerin sociallıq qorǵaw máselelerin óz ishine aladı. Sonday-aq, bul bólimde, jetim balalardı hám ata-analarınan yamasa basqa nızamlı wákillerinen qarawısız qalǵan balalardı oqıtıw, fizikalıq hám ruxıy rawajlanıwda nuqsanı bolǵan balalar hám óspirimlerdi oqıtıw máseleleri menen sociallıq járdemge hám tikleniwge mútáj bolǵan shaxslar ushın belgilenetuǵın oqıw-tárbiya mákemeleri óz sáwleleniwlerin tabadı.

Nızamnıń tórtinshi bólimine «Bilimlendiriw sistemasın basqarıw» dep at berilgen. Bul bólimde Ózbekistan Respublikası Wázirler Mákemesiniń bilimlendiriw tarawındaǵı wákillikleri, bilimlendiriwdi basqarıw boyınsha arnawlı wákillik berilgen mámleketlik organlardıń huquq sheńberi, jergilikli mámleketlik hákimiyat organlarınıń bilimlendiriw tarawındaǵı wákillikleri, bilimlendiriw mákemelerin basqarıw, bilimlendiriw tarawındaǵı mámleketlik basqarıw organları menen mámleketlik emes mákemeler ortasındaǵı qatnaslar óz kórinisin tapqan.

Besinshi juwmaqlawshı bólimde, ata-analar yamasa nızamlı wákillerdiń wazıypaları, bilimlendiriwdi qarjılandırıw, bilimlendiriwdi rawajlandırıw fondları, xalıq aralıq birge islesiw hám bilimlendiriw haqqındaǵı nızam hújjetlerin buzǵanlıǵı ushın juwapkershilik máselelerine de orın beriledi.