Pul hám bankler oqıw qollanba

Pul aylanısın shólkemlestiriw hám tártipke salıwda Kommerciyalıq bankler tómendegi islerdi ámelge asıradı:

1. 
   Fizikalıq táreplerdiń bos pul qarjıların amanatlarǵa tartıwǵa, fizikalıq táreplerdiń pul dáramatların naq pulsız tártipte amanatlarǵa ótkiziliwin keńeytiriwge, tovar hám xizmetler ushın naq pulsız esap–kitaplardı, bank kartalarınan paydalanǵan halda rawajlandırıwǵa qaratılǵan ilajlar kóredi;
   
2. 
   Yuridikalıq tárepler menen kelisilgen halda olardıń kassalarındaǵı naq pul qaldıǵı limitleri, pul túsimlerin bankke tapsırıw tártibi hám múddetlerin belgileydi;
   
3. 
   Naq pul qarjılarınıń hár kúni kelip túsiwi ústinen úzliksiz monıtoringti ámelge asıradı;
   
4. 
   Túsken túsimler hám berilgen naq pullardıń kassa aylanbalarınıń prognozdan parq qılıw sebeplerin talqılaydı hámde naq pul túsimleriniń kóbeyiwin támiyinlew ilajların kóredi;
   

Oraylıq Banktiń aymaqlıq bas basqarmasına (OB ABB) pul aylanısı boyınsha islerdi shólkemlestiriw, Qaraqalpaqstan Respublikası, wálayatlar hám Tashkent qalasındaǵı Kommerciyalıq banklerdiń is-háreketin muwapıqlastırıw hám onıń monıtoringi júkletiledi. OB ABBları tómendegi islerdi ámelge asıradı:

1. 
   Pul aylanısınıń jaǵdayın úyrenedi, banklerdiń kassa aylanbaların analiz qıladı, pul aylanısınıń jaǵdayın xarekterlewshi kórsetkishlerdi jámleydi hám tártipke saladı;
   
2. 
   Pul aylanısın bekkemlewge qaratılǵan usınıslardı tayarlap, Qaraqalpaqstan Respublikası, wálayatlar hám Tashkent qalasınıń mámleket Basqarıw organları dodalawına qoyadı;
   
3. 
   Naq pulǵa bolǵan talaptı úzliksiz támiyinlewdi názerde tutıp, aymaqlıq hám Kommerciyalıq bankler filialları ortasında naq pul qarjıların tez qayta bólistiriwdi ámelge asıradı;
   
4. 
   Kommerciyalıq bankler menen birgelikte naq pul qorları kóleminiń eń kem muǵdarın tastıyıqlaydı;
   
5. 
   Banklerdiń pul aylanısı boyınsha islerin analiz qıladı hám úyrenedi.
   

Xojalıq júritiwshi subyektler "Yuridikalıq tárepler tárepinen kassa operaciyaların ámelge asırıw qaǵıydaları"na (1998-jıl 17-dekabrde 565–san menen dizimge alınǵan) muwapıq óz kassalarında naq pul qaldıqları boyınsha belgilengen limitler dógereginde naq pulǵa iye bolıwı múmkin.
Yuridikalıq tárepler kassadaǵı belgilengen naq pul qaldıǵınıń limitten artıqsha bólegin bank penen kelisilgen tártipte hám múddetlerde esapbetine kirgizip qoyıw ushın bankke tapsırıwı shárt.