Sərraf Şiruyə
134
BU DAĞLARIN QOYNUNDA
Aman Allah, aylar, illər xoş gələ,
Bir kam alam bu dağların qoynunda.
Yada salıb ilk istəyi, ilk eşqi,
Fikrə dalam bu dağların qoynunda.
Könlümcə olaydı taleyin payı,
Sevgilim başında ağ kalağayı.
Birgə qarşılayıb baharı, yayı,
Qonaq qalam bu dağların qoynunda.
Güllər aça, xəbər çata bülbülə,
Baxça gülə, bülbül ötə, gül-gülə.
Tərif yazam mən də saçı sünbülə,
Xoşhal olam bu dağların qoynunda.
Sevinc ilə qarşılaya gün-günü,
Silinə qəlbimin amanı-ünü.
Şiruyəyəm, telli sazda “Cəngi”ni,
Bir də çalam bu dağların qoynunda.
Dostları ilə paylaş: 
