I
GÖYÇƏ İLƏ DƏRDLƏŞMƏ
Anam Göyçə, mən dərdimi söylədim,
Gəlişindən səni halı eylədim.
Xəyal köhlənimi yordum, teylədim,
Köhlənim də sənə tutdu üzünü,
Bir nişan ver mənə təzdən özünü.
Anam Göyçə, tarixinə əl atdım,
Neçə-neçə əsrlərə say atdım,
Onilliklər, minilliklər oyatdım,
Dilə gəldi daşlardakı izlərin,
Kimlər görüb, nələr görüb gözlərin.
Sən olmusan əhli-beytin məskəni,
Məkkə billəm, Kəbə billəm mən səni.
Söylə bizə babalarımız deyəni,
İmamların əl izi var daşında,
Tarix yatır yaddaşında, yaşında.
Dostları ilə paylaş: |
