Suv tanqisligini oldini oluvchi potensial imkoniyatlar. Qattiq suvni samarali taqsimlash

Suv bilan birgalikda ozuqa moddalar (oqsil, uglevodlar, yog‘lar, mineral tuzlar) oshqozonga va ichakka so‘riladi va qon tarkibiga o‘tadi. Qon bilan esa organizm bo‘ylab teng tarqaladi. Insonda 1 % suv yo‘qotilishi chanqoqni qo‘zg‘atadi; 2 %i bardoshlilikni pasaytiradi; 3 %i kuchni kamaytiradi; 5 %i so‘lak va siydik ajralib chiqishini kamaytiradi, nafas olishni tezlashtiradi, loqaydlik, mushak zaifligi, ko‘ngil aynishini keltirib chiqaradi.

Buyuk tibbiyot ulamosi Buqrot (Gippokrat) ko‘p miqdorda suv ichib, siydik hajmini ko‘paytirish va bu bilan siydik yo‘lida toshlar paydo bo‘lishining oldini olishni tavsiya etgan. Bugungi kunda taxminan 12-15 % aholining buyragida tosh hosil bo‘lmoqda. Inson tanasi og‘irligining 6-8 % namligi yo‘qolsa, insonning tana harorati ko‘tariladi, terisi qizaradi, yurak urishi tezlashadi, nafas olishi susayadi, bo‘g‘inlar kuchsizlanadi, bosh aylanadi, bosh og‘riydi, hushini yo‘qotsa, odam o‘ladi.
Dunyoda 1 mlrd. aholi sanitar me’yorlariga binoan xavfsiz ichimlik suviga ega emas. Har kuni dunyoda 5000 kishi ifloslangan ichimlik suvidan foydalanish oqibatida olamdan ko‘z yumadi.
2025-yilga qadar suv tanqisligidan 2 mlrd. aholi aziyat chekishi ehtimoli bor. Yer yuzida ishlatiladigan suvning 70 %i qishloq xo‘jaligi hissasiga to‘g‘ri keladi. 1 kg kartoshkani yetishtirish uchun 100 litr suv ishlatiladi. 1 kg guruch uchun 4000 litr, 1 kg mol go‘shti yetishtirish uchun 3000 litr suv sarflanadi.
7.3. Suv bo‘yicha islohotlar va huquqiy himoya
Suv resurslari. Amudaryo va Sirdaryo havzalaridagi o‘rtacha ko‘p yillik suv resurslari hajmi 133,6 km kubni tashkil etadi.
Ko‘rsatilgan hajmdan O‘zbekistonga to‘g‘ri keladigani 72,4 km kub, shundan 61,1 km kub sug‘orishga va 11,3 km kub boshqa iste’molchilarga sarflanmoqda. O‘zbekiston Respublikasining bor suv resurslari qayta tiklanadigan tabiiy yerosti va yerusti hamda antropogen asosli qaytib keluvchi suvlardan iborat.
Suv resurslari ikki guruhga bo‘linadi:
– milliy suv resurslari;
– transchegaraviy suvlar.
Milliy suv resurslari o‘z ichiga mahalliy daryo suvlari, yerosti va qaytib keladigan suvlardan, shuningdek, bir mamlakat chegarasida paydo bo‘ladigan suvlardan iborat.
Transchegaraviy suv resurslari ikki va undan ortiq davlatlar chegaralarini kesib o‘tadigan yoki shunday chegaralarda joylashgan har qanday yerusti yoki yerosti suvlaridir.
Transchegaraviy suv obyektlari ikki va undan ortiq davlatlar chegaralarini kesib o‘tadigan yoki shunday chegaralarda joylashgan suv obyektlaridir.
Transchegaraviy suv obyektlarining (Amudaryo, Sirdaryo, Zarafshon daryolari, Orol dengizi va boshqa transchegaraviy suv obyektlarining) suvlaridan foydalanish huquqi O‘zbekiston Respublikasining xalqaro shartnomalarida belgilanadi.
Suv O‘zbekiston Respublikasining davlat mulki – umummilliy boylik hisoblanadi, suvdan oqilona foydalanish lozim bo‘lib, u davlat tomonidan qo‘riqlanadi.
Yagona davlat suv fondi:
– jilg‘alar, soylar, daryolar, suv omborlari, ko‘llar, dengizlar, kanallar, kollektor-drenaj tarmoqlari, buloqlar, hovuzlarning suvlari va boshqa yerusti suvlaridan;
– yerosti suvlari, qor zahiralari va muzliklardan iboratdir.
Orol dengizi havzasi Markaziy Osiyo davlatlari o‘rtasida sxemalarda 1983-84-yillarda belgilangan davlatlararo suvni bo‘lish limiti, 1996-yili Davlatlararo muvofiqlashtirish suv xo‘jaligi komissiyasi tomonidan Chorjo‘y shahridagi yig‘ilishda tasdiqlangan.
Daryolar suvlari yil mobaynida bo‘ladigan va ko‘p yillik notekislik bilan tavsiflanadi: suv kam yilda (90 % ta’minot) suv hajmi o‘rtacha suvlik yillikka qaraganda 23 km kubga kam.
Hozirgi kunda Amudaryo havzasida suv hajmi mavsumiy tozalashda 90 % kafolatda 60,7 km kub suv hajmi ta’minlanadi.
Suv resurslarini ishlatish strategiyasida asosiy qiziqishni bor suv resurslari uyg‘otadi, ular nafaqat tabiiy, suv omborida saqlangan suv, balki qaytib keladigan va yerosti suvlarini ham hisobga oladi.
Suv kam yillari suv resurslari tanqisligi keskin ko‘tariladi. Bu eng katta hududiy mohiyatga ega gidroenergetik uzellarni energetik tartibga solish bilan (ayniqsa, Sirdaryo havzasida) bog‘liq, shu bilan birga, ma’lum ma’noda mavjud sug‘orish tizimlarini yangilashning yo‘qligi, suvni tejash texnologiyasi yechimlarining hamda boshqa texnik va texnologik yechimlarning yuqorida qayd etilgan sxemalarda ko‘zda tutilmaganligi oqibatidir.
Kuzatuvlar davridagi daryo suvlarining o‘rtacha ko‘p yillik tabiiy hajmi 123 km kubni tashkil etadi, shundan 81,5 km kub –Amudaryo havzasida, 41,6 km kub – Sirdaryo havzasida.
Jami respublika bo‘yicha 17 mingdan ortiq tabiiy suv oqimi mavjud. Amudaryo havzasida ular – 9,9, Sirdaryo havzasida – 4,9 va ushbu daryolar oralig‘ida – 2,9 mingta. Biroq asosiy qismi kichik soylar 10 km dan ortiq bo‘lmagan uzunlikdagi suv oqimlaridir, bu, ayniqsa, Amudaryo va Sirdaryo oralig‘iga taalluqli, bu yerda, asosan, yil davomida quriydigan daryochalar mavjud va hatto 10 km dan uzun bo‘lgan suv oqimlarida ham har yili oqim bo‘lavermaydi.
Hozirgi paytda respublikada, asosan, irrigatsiya maqsadida 51 ta suv omboridan foydalaniladi. Ularning to‘liq loyihaviy hajmi 18,8 km3, foydali hajmi 14,8 km3 ni tashkil etadi. Eng yiriklari Tuyamuyun, Chorvoq, To‘dako‘l, Kattaqo‘rg‘on suv omborlaridir. O‘zbekistonning eng yirik suv omborlari kompleks ishlatiladi va asosan, irrigatsiya, energetika va sanoat maqsadlariga mo‘ljallangan. Suv omborlaridan uzoq muddat foydalanish va ular tarkibida ro‘y bergan o‘zgarishlar keskin loyqalanishga olib keldi.
Hozirgi paytda 11 ta milliy suv ombori loyqalanishdan tozalanishga muhtoj, 5 ta suv omborida loyqa darajasi chiqish chegarasiga yetib qoldi.
Gidrosfera shartli ravishda yerusti va yerosti suvlariga bo‘linadi. Yerusti suvlariga okean, dengiz, daryo suvlari kirsa, yerosti suvlariga buloq suvlari, termal suvlar, minerallashgan yerosti suvlari kiradi. Bunday chuchuk yerosti suvlarining 1 litri tarkibida 1 grammdan kam bo‘lgan turli erigan moddalar bo‘lishi mumkin. Bu suvlar yer sathidan o‘rtacha 10-50 metr, ba’zan 200-500 metrgacha, juda kam hollarda ichimlik suvi sifatida ham sug‘orish ishlari uchun foydalaniladi.
Termal yerosti suvlarining harorati 40-60 OC gacha bo‘ladi. Ba’zan 60-100 OC gacha bo‘lishi ham mumkin. Bunday suvlardan inshootlar, issiqxonalar, uylarni isitishda foydalaniladi. Bunday suvlar, odatda, 1000 metrdan chuqurda, chuchuk suvli qatlamlar orasida joylashgan bo‘ladi. Masalan, Kuril orollari va Kamchatka yarimorolidagi suvlar gidrotermal suvlar hisoblanadi.
Yerosti minerallashgan suvlari sanoat suvlari deb ham yuritiladi. Ularning tarkibida ba’zi bir foydali kimyoviy elementlar yoki ularning birikmalari mavjud bo‘ladi. Minerallashgan suvlar turli chuqurliklarda joylashgan bo‘lishi mumkin. Ba’zan ular turli gazlar bilan to‘yingan hamda yuqori haroratga ega bo‘lishi ham mumkin. Bunday suvlarning aksariyati 200-300 metrdan 1500-2000 metrgacha chuqurlikda joylashgan. Odatda minerallashgan yerosti suvlari topilgan hududlarda sog‘lomlashtirish maskanlari qurilgan. Chunki bunday suvlar shifobaxsh suvlar hisoblanadi.
Bizning respublikamiz hududida ham bunday suvlar keng tarqalgan. Siz suvni atrofingizda har kuni ko‘l, daryo, muz, qor yoki yomg‘ir shaklida ko‘rasiz. Shu bilan bir vaqtda suvning juda katta hajmi borki, u ko‘zga ko‘rinmaydi, bu yerostida mavjud bo‘lgan va yerda harakatlanayotgan suv. Odamlar ming yillar mobaynida yerosti suvlaridan, asosan, ichimlik maqsadida hamda sug‘orish uchun foydalanib kelganlar va hozir ham foydalanishmoqda.
Yerdagi hayot uchun yerusti suvi qanchalik muhim bo‘lsa, yerosti suvi ham shunchalik muhim.
Yerustiga tushuvchi yog‘inning bir qismi tuproqqa infiltratsiyalanib, yerosti suviga aylanadi. Tuproq ichidagi bu suvning bir qismi yer sirtiga yaqinlashib, tezda o‘zanlardagi suvga qo‘shilsa, asosiy qismi gravitatsiya hisobiga pastga chuqurroq singib borishda davom etadi.
Mahalliy daryolar irmog‘ida tabiiy qayir va delta ko‘llari joylashgan. Tog‘li ko‘llar, odatda, qor uyumi yoki muzliklardan hosil bo‘ladi, suv zahirasi taxminan 50 km3. O‘zbekistonda 500 dan sal ko‘proq ko‘l bo‘lib, asosan, 1 km2 dan kam maydonli kichik suv havzalari va 10 km2 dan ortiq maydonli 32 ta ko‘l mavjud. O‘zbekiston hududidagi botqoqliklar, asosan, yalanglik hududlarda uchraydi. Ular yirik daryolar qayirlari, suv chiqishi konusi atrofi, relyef pastlagan yerlarda joylashgan. Ko‘pincha botqoqlikni ko‘ldan ajratish mushkul, chunki yilning quruq davrida ba’zi ko‘llar botqoq uchastkalariga aylanadi. Botqoqliklar o‘lchami turlicha bo‘lib, bir necha yuz kvadrat kilometrgacha boradi. Tog‘li hududlarda botqoqliklar kam uchraydi, ularning maydoni ham katta emas. Ular aksariyat hollarda yerosti suvlari olinadigan hududlarda bo‘lib, sozlar deb nomlanadi.
O‘zbekiston Respublikasi hududida (Surxondaryo, Qashqadaryo, Pskom kabi) qator daryolarning yuqori qismida 525 metr balandlikda tog‘li muzliklar mavjud, ularning umumiy muzlanish maydoni – 54,2 km2, ya’ni muzliklar, asosan, kichik shaklga ega, bitta muzlikning o‘rtacha maydoni atigi – 0,293 km2.
Suv resurslarining tanqisligi va ifloslanishi atrof-muhit muammolari orasida eng muhimlari qatoriga kiradi. Respublikamiz har yili o‘rtacha 60 kub km suv sarflaydi, bu suvga bo‘lgan ehtiyojning 80 %ini tashkil etadi.
Sug‘orishda suvdan tejab foydalanmaslik oqibatida suvning 40%i sug‘orish tarmoqlarida va 20%i sug‘orish jarayonida yo‘qotiladi. Hozirda 60%dan ortiq irrigatsiya tizimi qayta tiklanishi talab etiladi. Sug‘oriladigan maydonlar mamlakat hududining 10 foizini (4,3 mln. ga) tashkil etadi.
Suvlar turli xil moddalar va mikroorganizmlar bilan ifloslanishi mumkin. Natijada uning sifati yomonlashadi, ichish va foydalanish uchun yaroqsiz holga kelishi mumkin. Ochiq suv havzalari, kommunal xo‘jaliklari, sanoat korxonalari va qishloq xo‘jaligida ishlatilgan suvlar hisobiga ifloslanadi. Hisob-kitoblar shuni ko‘rsatmoqdaki, shaharlarda bir kecha-kunduzda 600 ming metr kub toza suv ishlatilsa, uning 500 ming metr kubi oqova suv holatiga kelar ekan.
Mineral va mahalliy o‘g‘itlarning qoldig‘i, zaharli ximikatlar, sanoat korxonalarining texnologik jarayonlarida ishlatilib ifloslangan suvlar, kommunal xo‘jaliklarining chiqindi suvlari oqova suvlar deb ataladi. Oqova suvlar suvning tarkibiga ko‘ra mineralli, organik, bakterial va boshqa turlarga bo‘linadi.
Mineralli oqova suvlar tarkibida qum, tuproq, shlak, mineral tuzlar, kislota va ishqorlar mavjud bo‘ladi. Organik oqova suvlar tarkibida o‘simlik qoldiqlari (meva, poliz mahsulotlari, o‘simlik yog‘lari va h.k.) hamda hayvon chiqindilari mavjud bo‘ladi.
Suv resurslarining antropogen ifloslanishini quyidagi tarzda ajratish mumkin:
– qishloq xo‘jaligi faoliyati natijasidagi ifloslanish;
– sanoat faoliyati natijasidagi ifloslanish;
– shahar va qishloq tumanlaridagi maishiy ifloslanish manbalari.
Atrof-muhitni muhofaza qilish nuqtayi nazaridan qishloq xo‘jaligi dalalaridan mineral o‘g‘itlarning va o‘simliklarni kimyoviy himoyalash vositalarining sug‘oriladigan suvlar bilan chiqishi, shuningdek, chorvachilik komplekslaridan ifloslangan oqovalarning yerusti va grunt suvlariga tushishi alohida xatar uyg‘otadi. Kichik daryolar va Amudaryo pastki qismlarida kollektor-drenaj suvlari bilan eng ko‘p ifloslanganlik kuzatiladi.
Tanlab o‘tkazilgan tadqiqotlar ko‘rsatishicha, tashlanadigan toksik moddalar umumiy miqdori bo‘yicha suvning ifloslanishiga Qashqadaryo, Farg‘ona va Xorazm viloyatlaridagi xo‘jaliklar eng katta hissa qo‘shmoqda.
Qishloq xo‘jaligi faoliyati natijasidagi ifloslantirish o‘simliklar, tuproq, suv va havo namunalarini pestitsid, azot va fosfatlarga tahlil qilish yo‘li bilan aniqlanadi.
Maishiy ifloslantiruvchilar (kanalizatsiyalanmagan aholi qismi) fekal va maishiy oqovalarni, ariq va kollektor-drenaj tarmoqlari yoki qoldiqlar o‘ralariga tashlashadi, bu esa grunt suvlari sifatiga ta’sir qiladi.
Kanalizatsiyalangan aholi qismi kommunal tozalash qurilmalari orqali tozalangan oqova suvlarini suv obyektlari va qumlarga to‘kadi. Tozalash qurilmalarining samarasiz ishlashi, ularning ish bilan haddan ziyod ta’minlangani oqovalar yetarlicha tozalanmasligi va atrof-muhit ifloslanishiga olib keladi.
Tog‘lardagi shakllanish hududlaridan keladigan daryo suvlarining sifati (O‘zbekiston Respublikasi doirasida) juda yuqori – bu suvlar deyarli hech narsa bilan ifloslanmagan va ularning minerallashuvi juda kam. Biroq pastga yo‘nalgani sari suvning sifati keskin yomonlashadi. Mintaqaning aksariyat daryolariga suvning o‘rtacha oqimda 1-1,5 g/l, pastki oqimda 2 g/l va undan yuqori minerallashuvi xosdir.
Sanoatda suv erituvchi xom ashyo, issiqlik tashuvchi, sovituvchi va boshqa maqsadlarda ishlatiladi.
Masalan, metallni qayta ishlash, mashinasozlik, koks kimyosi, IESlarda suv sovituvchi vosita sifatida ishlatiladi. Oqova suvlarni yog‘ mahsulotlaridan tozalashda yog‘ mahsulotlarining tarkibi va miqdoriga qarab tindirish va filtrlash kabi usullardan foydalaniladi.
Suv tarkibidagi qattiq zarrachalar va yog‘ mahsulotlarini markazdan qochuvchi kuch hosil qilish usulida, bosimli gidrotsiklon asbobi yordamida ham tozalanadi. Suv havzalaridagi suvlar sifatini me’yorlashda ular ikki kategoriyaga bo‘linadi: birinchi kategoriyaga ichish va madaniy maishiy maqsadlar uchun ishlatiladigan suv havzalari, ikkinchi kategoriyaga esa baliqchilik xo‘jaliklari uchun suv havzalari kiradi. Suv havzalari sifati quyidagi parametrlar orqali aniqlanadi: tarkibida suzib yuruvchi va muallaq moddalar saqlashi, hidi, mazasi, rangi, harorati, pH ko‘rsatkichi, mineral qo‘shimchalar tarkibi va miqdori, suvning kislorodga bo‘lgan biologik talabi, zaharli va zararli moddalarning hamda kasallik keltirib chiqaruvchi bakteriyalarning soni.