Azərbaycan ordusunun silah arsenalına yeni daxil edilən zenit-raket divizionu kompleksi sınaqdan çıxarılıb
01.10.2015
Hava Hücumundan Müdafiə Qoşunlarının silah arsenalına yeni daxil edilən “Buk-MB” zenit-raket divizionu komplekslərindən döyüş-sınaq atışları icra edilib. Sentyabrın 30-da müdafiə naziri Zakir Həsənovun rəhbərliyi ilə keçirilən atışlarda baş nazirin birinci müavini Yaqub Eyyubov da iştirak edib.
Müdafiə Nazirliyinin mətbuat xidməti bildirir ki, mütəxəssislər zenit-raket kompleksinin döyüş düzülüşü, tərkibi, təyinatı, taktiki-texniki xüsusiyyətləri, məhv etmə zonası, digər parametrləri, eləcə də döyüş atışlarının keçirilməsinə ayrılmış güc və vasitələr, şəxsi heyət barədə məlumat verib.
Sonra praktiki atışlar yerinə yetirilib. Şərti düşmənin intensiv radioelektron və atəş təsiri şəraitində ballistik raketləri, alçaqdan uçan və aerodinamik hədəfləri imitasiya edən “Saman” tipli hədəflərin aşkarlanması, avtomatik izlənməyə götürülməsi, qərar qəbul edilməsi, onlara qarşı atəş açılması və idarə olunan zenit raketləri ilə hədəfin məhv edilməsi tapşırıqları həyata keçirilib.
Dostları ilə paylaş: |