Xeste-qasim

               Yoxdur  
 
Ay qəsrdə duran gözəl, 
Niyə təksən, elin yoxdur? 
Niyə pozğundu tellərin, 
Əl şanada, telin yoxdur? 
 
Mən gəlirdim dağdan-daşdan, 
Sinəm yanır qəm-ataşdan. 
Ayrılmasın yaşıl başdan, 
Tək sonasan, gölün yoxdur? 
 
Gəl dərdin Qasıma söylə, 
Bağrımın başını teylə. 
Qonağa xoş gəldin eylə, 
Yoxsa, lalsan, dilin yoxdur? 
 
 
                                    Çıxarır 
 
İsfahanda bir dəllək var, 
Baş qırxanda zol çıxarır. 
Ətindən az-az götürür, 
Dərisini bol çıxarır. 
 
Ayağını qoyur qoşa, 
Ülgücünü çəkir daşa. 

---

 
193
Zərbi elə gəlir başa, 
Tikmədaşa yol çıxarır. 
 
Bir fitəsi vardır bezdən, 
Durub gəlir səhər tezdən. 
Yarı haqqın alıb bizdən, 
Yenə acı dil çıxarır. 
 
Ülgücünü çapışdırır, 
Suyu tastan qapışdırır. 
Kəsir pambıq yapışdırır, 
Başımızdan kol çıxarır. 
 
Bu usta necə ustadı? 
Həmişə gözü tasdadı. 
Xəstə Qasım can üstədi, 
Elə bilir pul çıxarır.