ZəLİmxan yaqub seçİLMİŞ

HAQDAN NEMƏT İSTƏDİM
Haqdan nemət istədim,
Göy çəməndə təravət,
Gur bulaqlar su verdi.
Haqdan nemət istədim,
Arıdan bal ayırdı,
Sürüdən quzu verdi.
Haqdan nemət istədim,
Yerlər gülü, gülşəni,
Göylər ulduzu verdi.
Haqdan nemət istədim,
İlahi sevgisindən
Tükənməz ruzi verdi.
27 sentyabr 2004
HAQQI DİNLƏMƏK GÖZƏL
Yerdəki çaxnaşmadan
Göydəki şimşək gözəl.
Dibçəkdə göyərəndən
Çöldəki çiçək gözəl.
Bağrımız zədan-zədan,
Uçar ruh, köçər bədən.
Min şirin əfsanədən
Bir acı gerçək gözəl.
Doyduq yalan yeməkdən,
Üzüldük inləməkdən.
İnsanı dinləməkdən
Haqqı dinləmək gözəl.
29 sentyabr 2004

---

___________________Milli Kitabxana__________________
216
QOY YATIM, YUXUDAN QALDIRMA MƏNİ
Qışda doğulmağım bəs elər mənə,
Məni öldürəndə, yaz öldür, Allah!
Dilim hansı gündü gedəcəyim gün,
Ölüm tariximi yaz, öldür, Allah!
Qoy yatım, yuxudan qaldırma məni,
Əcəlin cəngindən saldırma məni.
Zarıya-zarıya öldürmə məni,
Öldürə bilirsən, saz öldür, Allah!
Acı gülüşlərin ürəyimdə xal,
Dodağım qıfıllı, baxışlarım lal.
Alırsan, canımı birdəfəlik al,
Bu qədər ağrıyla az öldür, Allah!
29 sentyabr 2004
ALLAHA YAXINLIQ
Hamı görmək, götürmək,
hamı duymaq istəyir,
Harda varsa gözəllik
ora bir axın olur.
İnsan oğlu Tanrını
təbiətlə dərk edir,
Təbiəti duyanlar
Allaha yaxın olur.
5 oktyabrın

---

___________________Milli Kitabxana__________________
217
İKİ QAPI
İtaliyanın Assizi şəhərində bir evə iki qapı qoyulur. Qapının biri hər bir evdə
olduğu kimi giriş-çıxış qapısıdır. O biri qapını isə ancaq evdə adam öləndə açırlar
və cənazəni həmin qapıdan çıxarırlar.
Anar müəllimin dediklərindən
Burda belə qurulur,
belə yapılır yapı,
Bir mənzilə iki yol,
bir evdə iki qapı.
Biri qurub yaratmaq,
coşub-çağlamaq üçün,
Biri vida çağında
yanıb, ağlamaq üçün.
Durub dayanmağı yox,
biri hər gün işdədir,
Hey açılar, örtülər,
əbədi vərdişdədir.
Biri ölü sükutda,
Qaş-qabağı buludda,
meyli qəmdə, yasdadı.
Biri Ayla, ulduzla,
Günəşlə təmasdadı.
Birindən gülüş axır
içəriyə, bayıra,
O biri fürsət gəzir
Səni səndən ayıra.
Ucu biz xəncər kimi
biri qəlbə saplanır,
Biri nura, işığa,
həyata hesablanır.
Birində toy çalınar,
gəlin gələr içəri,
Biri bizə pıçıldar,
"köçərisən, köçəri".

---

___________________Milli Kitabxana__________________
218
Biri ömrün baharı,
biri ömrün şaxtası,
Biri beşik laylası,
biri tabut taxtası.
Biri qəmə, həsrətə,
dərdə, yasa açılır,
Biri eşqə, sevgiyə,
ehtirasa açılır.
Baş əyməmək olarmı
bu bölgüyə, bölümə,
Biri həyata açıq,
biri gora, ölümə!
7 oktyabr 2004
AYAQ SAXLAYAN OLSUN
Bir tabut aparırlar,
saxla maşını, saxla,
Qoy bizim diqqətimiz
dərdliyə həyan olsun.
Bu qəmli səhnəyə bax,
öz ömrünü varaqla,
Elə yaşa, dünyadan
Sabah sən də köçəndə,
ayaq saxlayan olsun!
8 oktyabr 2004
MƏN NƏYİNƏ LAZIMAM
Bəzən acığım tutur,
hirs dağıdır qafamı.
Kar olmaq istəyirəm
Səs-küyünə dünyanın.

---

___________________Milli Kitabxana__________________
219
Kor olmaq istəyirəm
hər şeyinə dünyanın.
Dirsək dizdə, əl üzdə,
can odda, baş qovğada,
Boylanmaq istəmirəm
yer-göyünə dünyanın.
Sındırmaq istəyirəm
çaldığım sazı belə,
Nə sazına baxıram,
nə neyinə dünyanın.
Aciz qalıb əlində
insanlar aça bilmir,
İşlərini kim salıb
sərt düyünə dünyanın.
Əlim sağ, ayağım sağ,
Min düyündən birini
aça bilməmişəmsə,
Mən nəyinə lazımam,
de, nəyinə dünyanın?!
8 oktyabr 2004
QARDAŞ KİMİ
Sən üyüdən dəyirman,
biz üyünən dən olduq,
Dünya, sənin əlində
biz oyuncaq, biz oyun.
Zəlzələdə, tufanda,
leysanda, qasırğada
Kimi tülkü, kimi şir,
kimi qoç, kimi qoyun.
İlk nöqtəsi doğumdu
dünyaya gələnlərin,
Son nöqtəsi ölümdü
hər kökün, əslin, soyun.

---

___________________Milli Kitabxana__________________
220
Bizə tarix yazan kəs
bizdən xəbərsiz yazır,
Hər sevincin sonu qəm,
sonu yasdı hər toyun.
Arada ölən də biz,
ortada qalan da biz,
Həyat - ölüm həmişə
qardaş kimi qolboyun!
10 oktyabr 2004
CAN DEYİR, CAN EŞİDİR
Ruhumun təbiətlə
yaman tutur söhbəti,
Hara uçub qonursa,
can deyib, can eşidir.
Səsi eşidilməyən
qarışqa səsini də
Ürəkdə tellər duyur,
damarda qan eşidir.
Bu böcək, bu kəpənək,
bu qarışqa, bu arı,
Kövrək duyğularımın
yaxın sirdaşı, yarı.
Gecələr dodağımda
gəzən pıçıltıları
Qaranlıq əzbər bilir,
sökülən dan eşidir.
Azaldır ağrısını
qovğalar çəkən başın,
Təbiətdi məlhəmi
ağlın, huşun, yaddaşın.
Ruhum hopur canına
dağın, qayanın, daşın,
Bir Zəlimxan can deyir,
min Zəlimxan eşidir.
11 oktyabr 2004

---

___________________Milli Kitabxana__________________
221
ÖZÜN YAZDIN HƏR QİSMƏTİ
Bu öy mənim öyüm deyil,
Özünsən öyün sahibi.
Tikən də sən, yıxan da sən,
Bu kəndin, köyün sahibi.
Oddan eşqin, nurdan üzün,
Tərəfisən haqqın, düzün.
Quranın, kitabın, sözün,
Əlifin, beyin sahibi.
Sümüyə bürüdün əti,
Özün yazdın hər qisməti.
Dizimdən alma qüvvəti,
Dizimdə heyin sahibi.
Qara bəxtim, qaraçuxam,
Sənin əlin, mənim yaxam.
Mən kiməm ki, şərik çıxam?
Sənsən hər şeyin sahibi.
Gecə-gündüz çəkər ahı,
Zəlimxandır dərdin şahı.
Bağışla, varsa günahı,
Ey yerin-göyün sahibi!
30 iyul 2004
ÖLDÜRÜR
Bəxtinə yazılıb insan oğlunun,
Hərəni bir həsrət, bir ah öldürür.
Açıb-bükə bilmir günahlarını,
Çoxunu batdığı günah öldürür.

---

___________________Milli Kitabxana__________________
222
Üzülür piltəsi, əriyir şamı,
Sökülür sarayı, yıxılır damı.
Səssiz güllələrdi yıxan adamı,
Silahsız olanı silah öldürür.
Harınlar qarındı, qarınlar harın,
Onəlli yapışıb kökündən varın.
Gözü bu dünyadan doymayanların
İçini kin yeyir, tamah öldürür.
Yerdən də, göydən də silinir izi,
Dizli kişilərin qırılır dizi.
Qıran özümüzük bir-birimizi,
Kim deyir adamı Allah öldürür?!
31 iyul 2004
RAHAT ÖLÜM
Bu gün bir xəstə gördüm, xəstəlik, nə xəstəlik,
İynələrin ucunda bədəni dəlik-dəlik.
Durmaq olmur yanında fəryadından, ahından,
Asan ölüm istəyir ölümsüz Allahından.
Ölüm hələ yoldadır, dərə keçir, düz gəlir,
Əcəl istəyən kəsə əcəl könülsüz gəlir.
Gözəl olan şeyləri bir-bir salıram yada,
Rahat ölümdən gözəl heç nə yoxdu dünyada!
DÜŞDÜ
Gülə döndüm, güllər kimi açım, dedim,
Yaz olmamış payız gəldi, sazaq düşdü.
Ağac oldum, yeri-göyü qucaqladım,
Budağımdan gündə neçə yarpaq düşdü.
Kitab kimi öz ömrümü varaqladım,

---

___________________Milli Kitabxana__________________
223
Kötüyündən silkələndi, varaq düşdü.
Dedim, durum saçlarıma sığal çəkim,
Telim getdi, əllərimdən daraq düşdü.
Mən dünyaya gör, nə qədər yaxın oldum,
Dünya məndən gör, nə qədər uzaq düşdü!
HƏYƏCAN
Ürək yazıq neyləsin!
Əbədi yükə dönür bir anın həyəcanı.
Dərin dərələr salır, qara yarğanlar açır,
Zəlzələnin, zərbənin, tufanın həyəcanı.
Dərddən betər öldürür xəstənin ümidini
Gəzdikcə tapılmayan dərmanın həyəcanı.
Ağrı külək, ömür şam, əsən kimi söndürür,
Zamanlara sığışmır zamanın həyəcanı.
Qanlı təpə, qanlı düz, qanlı meydan görmüşük,
Getməz gözdən, könüldən bu qanın həyəcanı.
Bitib tükənən deyil ömrün sonuna qədər
Duyan, görən, düşünən insanın həyəcanı!
SƏN DEMƏ
Yüyürürəm arxasından,
Sallanıram çuxasından,
Yapışıram yaxasından,
Zamanı saxlamaq olmur,
Vaxt axar suymuş, sən demə!
Göz açmağa aman verməz,
Addımbaşı ağrı-azar.
İki daşın arasında,
Yazdığını fələk yazar.
Baha alar, ucuz satar
Öz başına dəysin bazar.

---

___________________Milli Kitabxana__________________
224
Aç gözünü, yum gözünü,
Bu gün beşik, sabah məzar.
Gördüm illər əldən çıxıb,
Ömür yuxuymuş, sən demə!
Ömür birlə yüz arası,
Qayğı dağla düz arası.
Ortada bir oğlan durar,
Eşq oğlanla qız arası.
Qızılgüllər solub getdi,
Bir də çətin qızarası.
Zaman mənə "yığış", - deyir,
Göz də vurur sözarası.
Nə yatdım, nə yuxu görəm?
Yaşamaq buymuş, sən demə!!!