1. Budjet tashkilotlarida smetalari tarkibi va ularni shakllantirishning xususiyatlari. 2. Budjet mablag’lari bo’yicha xarajatlar smetasini tuzish tartibi va ularni ijrosi hisobi. 3. Budjetdan tashqari mablag’lar bo’yicha daromadlar va xarajatlar smetasini tuzish va ular ijrosi hisobining hususiyatlari. 4. Budjet tashkilotlari smetalar hamda shtatlar jadvalini tasdiqlash, ro’yxatdan o’tkazish.
1. Budjet tashkilotlarida smetalari tarkibi va ularni shakllantirishning xususiyatlari.
Xarajatlar smetasi – tashkilotlar tomonidan joriy moliya yili uchun tuziladigan va tasdiqlanadigan hujjat bo’lib, unda tashkilotlar uchun xarajatlar moddalari bo’yicha ko’zda tutilgan budjetdan ajratilgan mablag’lar (xarajatlar rejasi) aks ettiriladi. Budjet tashkilotlari tomonidan belgilangan tartibda budjet va budjetdan tashqari mablag’lar daromadlari va xarajatlari bo’yicha smetalari tuziladi va tasdiqlanib ijrosi ta’minlanadi. Bunda O’zbekiston Respublikasi va Qoraqalpog’iston Respublikasining respublika budjetlarida hamda mahalliy budjetlarda turuvchi tashkilotlarni moliyalashtirish, ular uchun tasdiqlangan xarajatlar smetalari asosida amalga oshiriladi.
Budjet tashkilotlari O’zbekiston Respublikasi Vazirlar Mahkamasining 1999 yil 3 sentyabrdagi 414-sonli “Budjet tashkilotlarini mablag’ bilan ta’minlash tartibini takomillashtirish to’g’risida”gi qaroriga muvofiq xarajatlarning quyidagi guruhlari Davlat budjetidan mablag’ bilan ta’minlanadi: I. Ish haqi va unga tenglashtirilgan to’lovlar (bolali oilalarga nafaqalar va kam ta’minlangan oilalarga moddiy yordam, stipendiyalar va boshqalar);
II. Ish haqiga qo’shimchalar;
III. Kapital qo’yilmalar (Davlat investitsiya dasturida nazarda tutilgan aniq ro’yxatlarga muvofiq);
IV. Boshqa xarajatlar.
Yuqorida keltirilgan xarajat guruhlari asosida budjet tashkilotlari budjet mablag’lari bo’yicha xarajatlar smetalarini shakllantiradi.
Budjet tashkilotlari tomonidan moliya yili boshida xarajatlar smetasi tasdiqlangunga va ro’yxatdan o’tgunga qadar vaqtinchalik xarajatlar smetasini tuzadi.
