Qazların mayelərdə həll olması. Bu və ya digər qazla təmasda olan hər hansı maye onun bir hissəsini özündə həll edir. Qazın mayedə həll olması həlledicinin və həll olan qazın təbiətindən,həmçinin temperatur və təzyiqdən asılıdır.Qazların suda həll olma qabiliyyəti müxtəlifdir. Məsələn, 0 temperatur və 1 atmosfer təzyiq şəraitində 1 l suda 1000 l NH3 , 500 l HCl , 20ml H2 , 40ml O2 və 21ml N2 həll olur.NH3 yaxşı həll olmasına səbəb onun su ilə qarşılıqlı təsirdə olaraq, birləşmə əmələ gətirməsidir:
NH3 + H2O ⇆ NH4OH
Temperaturun artması qazların mayelərdə həll olmasına mənfi, təzyiqin artması isə müsbət təsir göstərir.
Qazların mayelərdə həll olmasının təzyiqdən asılılığı Henri-Dalton qanunu (1803-cü ildə) ilə müəyyən edilir.Qazın qatılığı təzyiqlə düz mütənasib olduğundan,Henri qanununun tərifi aşağıdakı kimi verilmişdir:
Sabit temperaturda qazın mayedə həllolma qabiliyyəti onun məhlul üzərindəki təzyiqi ilə düz mütənasibdir.
C = kP
Burada: C – qazın məhluldakı qatılığı, P – qazın təzyiqi, K isə mütənasiblik əmsalıdır.
