5-tema. Hújjet túrleri hám ózgeshelikleri

Shártnama dúziw qaǵıydaları
Shártnamanıǹ ulıwma tártipte dúziliwi eki dáwir menen belgilenedi. Birinshi dáwir - shártnama dúziwge usınıs etiw dáwiri bul oferta, al shártnama dúziwge usınıs etiwshi bolsa offerent dep ataladı.
Ekinshi dáwir - shártnama dúziw haqqındaǵı usınıstı qabıl etiw dáwiri bolıp, bul aktsept, usınıstı qabıl etiwshi aktseptant dep aytıladı.
Shártnama dúziliwi ushın táreplerdiǹ óz ara kelisiminiǹ ózi jeterli emes. Bul kelisim tiyisli formada rásmiylestirilgen bolıwı shárt. Shártnamalardıǹ forması Puqaralıq kodekstiǹ 366-statyasında belgilengen qaǵıydalarǵa muwapıq bolıwı shárt. Oǵan tiykarınan, eger nızamda belgili túrdegi shártnamalar ushın belgili bir forma belgilep qoyılmaǵan bolsa, shártnama pitimler dúziw ushın názerde tutılǵan hár qanday formada dúziliwi múmkin.
Notarial tastıyıqlanıwı yaki mámleketlik dizimnen ótkeriliwi shárt bolǵan shártnama notarial tastıyıqlanǵan yaki dizimnen ótkerilgen waqıttan baslap, notarial tastıyıqlanıwı hám dizimnen ótkeriliwi zárúr bolǵanda bolsa, shártnama dizimnen ótkerilgen waqıttan baslap shártnama dúzilgen esaplanadı.


Shártnamalardı ózgertiw hám biykarlaw
Ulıwma qaǵıyda boyınsha, shártnama táreplerdiǹ kelisimine muwapıq ózgertiriliwi hám biykar etiliwi múmkin.
Táreplerden biriniǹ talabı menen shártnama sud tárepinen tómendegi halatlarda ǵana ózgertiliwi yaki biykar etiliwi múmkin:
- ekinshi tárep shártnamanı qataǹ ráwishte buzsa;
- Puqaralıq kodeksi, basqa nızamlar hám shártnamada dúzilgen ózge halatlarda.
Táreplerden biriniǹ shártnama buzıwı ekinshi tárepke ol shártnama dúziwge úmit etiwge haqlı bolǵan nárseden kóp dárejede ayrılatuǵın etip zıyan jetkeriwi shártnamanı qataǹ buzıw esaplanadı.
Bir tárep shártnamanı orınlawda tolıq yaki málim dárejede bas tartıp, nızam yamasa táreplerdiǹ kelisiminde buǵan jol qoysa, shártnama tolıq biykar etilgen hám ózgertilgen esaplanadı.
Eger nızamda yaki táreplerdiǹ kelisiminde basqasha tártip belgilep qoyılmaǵan bolsa, tárepler shártnama ózgertilgenshe yaki biykarlanǵansha májbúriyat boyınsha ózleri orınlaǵan nárselerdi qaytarıp beriwdi talap etiwge haqlı emes.