Erkin dars jadvali. Har bir kurs vaqt bilan cheklangan boʻlib, oʻquvchi oʻziga qulay dars jadvalini tuzib olishi mumkin. Videodarslarni keyinroq koʻrish yoki tushunish qiyin boʻlgan darslarni qayta koʻrib chiqish mumkin. Uy vazifasi ham ixtiyoriy vaqt oralig‘ida va ixtiyoriy sur’atda bajarilishi mumkin.
Interfaollik. Juda koʻp onlayn kurslarda oʻquvchilar bilan teskari aloqa oʻrnatishning imkoni boʻlmaydi. Ulardan farqli ravishda, MOOC platformalari kurs oʻqituvchisi hamda boshqa oʻquvchilar bilan aloqa qilish uchun koʻplab aloqa kanallarini taqdim etadi.
Foydali aloqalar. Oʻquvchilar oʻz kurslarida hamkorlikni yoʻlga qoʻyish imkoniyatiga ham ega. Ular bilimlarini oʻrtoqlashibgina qolmay, bir-birlarini tekshiruvchi sifatida ham ishtirok etishlari mumkin. Odatda, masofaviy ta’lim kursining har bir oʻquvchisi bir necha kursdoshlari ishlarini tekshirishi lozim. Oʻz navbatida, uning ishi ham bir necha kursdoshi tomonidan sinovdan oʻtkaziladi. Shu tariqa, kursga qiziquvchilar va belgilangan yoʻnalish boʻyicha oʻz malakasini oshirishni xohlovchilar orasidan guruh shakllantiriladi. Har bir ishtirokchi tanlagan kursi boʻyicha oʻz bilimlarini kengaytirish, foydali va qiziqarli aloqalar oʻrnatish kabi imkoniyatlarga ega boʻladi.
Tezkor teskari aloqa va baholash. Har bir oʻquvchi topshiriqlarni bajarib boʻlgach, olgan bilimlari qanday baholanganligini deyarli biladi. Shu bilan birga, har bir onlayn ta’lim oluvchiga imtihonni qayta topshirish yoki testni qayta yechish imkoniyati beriladi.
MOOCning kamchiliklar MOOC platformalarida bilim olish faqat oʻquvchi tashabbusi bilan amalga oshiriladi va bunda yuqori darajadagi motivatsiya va oʻz-oʻzini boshqarish ustuvorlik qilishi lozim. Shu sababdan, ta’limning bu turida quyidagi kamchiliklar kuzatilishi mumkin:
oʻquv materiallarini mustaqil va yakka holda oʻrganish. Masofaviy ta’lim kursining vazifasi — oʻquvchi mustaqil ta’lim olishi uchun unga barcha zarur ma’lumotlarni taqdim etish. Kunduzgi oʻqish sharoitida oʻquvchi ma’ruzadan keyin yoki ma’ruza vaqtida oʻqituvchiga bevosita murojaat qilishi mumkin, MOOC doirasida esa bunday imkoniyat mavjud emas. Yakka oʻqituvchi minglab oʻquvchilarning savollariga birdan javob bera olmaydi, shu sababli berilgan savolga oʻz vaqtida javob olishning imkoni boʻlmaydi;
