Avtomobillarning axborot-diagnostik tizimiga ta'luqli asboblarni tuzilishi va ishlashi

6.3. Temperatura o‘lchash asboblari

Dvigatellarning issiqlik rejimini nazorat qilish uchun temperatura o‘lchash asboblari va avariya temperaturasi to‘g‘risida xabar beruvchi yorug‘lik darakchilari o‘rnatiladi. Ba’zi avtomobillarda gidrotransmissiya va moylash tizimidagi suyuqlik, akkumulyatordagi elektrolit haroratini nazorat qilish uchun ham termometrlardan foydalaniladi.
Hozirgi vaqtda avtomobillarda ikki turdagi termometrlar ishlatilmoqda: termobimetall impulsli va termorezistorli magnitoelektr (logometrik).
Termobimetall impulsli termometr. Termobimetall impulsli termometr datchik va strelkali ko‘rsatkichdan iborat. Datchik (6.1-rasm) konusli rezbaga ega bo‘lgan metall qobiq 6 ga mahkamlangan yupqa devorli jez ballon 9 dan iborat. Datchikning termobitall plastinasi 3 asos izolyatori 8 ga mahkamlangan. Termobimetall plastina umumiy qalinligi 0,25 mm bo‘lgan ikki qatlamdan iborat bo‘lib, ustki qatlam issiqlikdan kengayish koeffitsienti nisbatan past bo‘lgan invardan (36% nikel + 63% temir va boshqa metallar), pastki qatlami esa issiqlikdan kengayish koeffitsienti yuqori bo‘lgan kam magnitli po‘latdan tayyorlangan. Bimetall plastinaga konstantan yoki manganin simdan tayyorlangan qizdiruvchi chulg‘am 4 o‘ralgan. Bu chulg‘amning bir uchi bimetall plastina uchidagi qo‘zg‘aluvchi kontakt 2 bilan ulangan, ikkinchi uchi kontakt sim 5 orqali chiqish qisqichi 7 ga biriktirilgan. Qo‘zg‘almas kontakt 1 datchik qobig‘i, ya’ni massa bilan tutashtirilgan.
Termometrning ko‘rsatkichi  simon termobimetall plastina 10 dan iborat bo‘lib, uning ishchi elkasiga qizdiruvchi chulg‘am 13 o‘ralgan. Bimetall plastinaning ishchi elkasi strelka 12 ga sharnirli biriktirilgan, termokompensatsiya yelkasi esa rostlanadigan sektor 11 ga mahkamlangan. Rostlash zarur bo‘lganda sektor 11 o‘z o‘qi 14 ga nisbatan harakatlanishi mumkin.
Sektor 16 elastik plastinasi 15 yordamida strelkani bimetall plastina uchidagi ilmoqqa tirab, unga sharnirli asos hosil qiladi. Bu sektor rostlash tishchalariga ega.
Datchik va ko‘rsatkich chulg‘amlari tok manbaiga ketma-ket ulanadi (6.1-rasm).
Termometr tok manbaiga ulanmagan holda datchik kontaktlari tutash, ko‘rsatkich bimetall plastinasining ishchi yelkasi 13 egilmagan va strelka 12 shkalaning chap chekkasida, ya’ni 110⁰C belgi tomonda bo‘ladi. O‘t oldirish kaliti ulanganda datchik va ko‘rsatkich termobimetall plastinalaridagi qizdiruvchi chulg‘amlardan tok o‘ta boshlaydi. Datchik plastinalari qiziydi, yuqori tomonga egiladi va kontaktlarni uzadi. Bir necha daqiqadan keyin plastina soviydi va yana o‘z holiga qaytib kontaktlarni tutashtiradi va tok yana qizdiruvchi chulg‘amlardan o‘ta boshlaydi. Atrof-muhit harorati o‘zgarmas bo‘lganda, datchik kontaktlar ham bir xil chastota bilan uzilib-tutashib turadi. Kontaktlar tutashib turish vaqtining, tutashib-uzilish davrining umumiy vaqtiga nisbati atrof-muhit haroratiga bevosita bog‘liq. Termobimetall plastina atrofidagi muhit harorati qanchalik baland bo‘lsa, uning egilib kontaktlarni uzgandan keyin sovushi shunchalik qiyin bo‘ladi, kontaktlar tutashgandan keyin esa tez qizib ketadi.
O‘t oldirish kaliti ulanib, termometr chulg‘amlariga tok berilganda, dvigatelning sovitish tizimidagi, demak datchik atrofidagi harorat ham past bo‘ladi. Bu holda datchik kontaktlarining tutashib-uzilish chastotasi katta (40⁰C da minutiga taxminan 80-120 marta) va demak, I_eff qiymati ham katta bo‘ladi. Bu ko‘rsatkichdagi bimetall plastinani ko‘proq egilishiga va strelka shkalaning o‘ng tomoniga, ya’ni past temperaturalar tomonga og‘ishiga olib keladi.
Dvigatelning ish jarayonida uning sovutish tizimidagi suyuqlik isiy boshlaydi va bu, albatta shu muhitga joylashtirilgan datchikning termobimetall plastinasiga ta’sir qiladi. Natijada, kontaktlar uzilgandan keyin plastinaning sovush tezligi sekinlashadi, kontaktlarning tutashib-uzulish chastotasi ham kamayadi. (110⁰C da minutiga taxminan 8-10 marta). Bu ko‘rsatkich bimetall plastinasi chulg‘amidan o‘tayotgan I_eff tokning kamayishiga, plastina sovub, egilgan holdan sekin-asta to‘g‘rilanishiga va strelkani shkalaning chap tomoniga, ya’ni yuqori temperaturalar tomoniga og‘ishiga olib keladi.

Ko‘rsatkichdagi termobimetall plastinaning qizishi nafaqat uning chulg‘amidan o‘tayotgan I_eff tokka , balki ko‘rsatkich joylashtirilgan asboblar paneli atrofidagi muhit haroratiga ham bog‘liq. Atrof-muhit haroratini termometrning o‘lchash aniqligiga ta’sirini istisno qilish maqsadida ko‘rsatkichning termobimetall plastinasida termokompensatsiya yelka mavjud (6.1-rasmda u sektor 11 ga mahkamlangan). Asboblar paneli atrofidagi harorat o‘zgarganda, masalan ortganda, bimetall plastinaning har ikkala yelkasi baravar egiladi va strelkaning shkalaga nisbatan holati o‘zgarmaydi.
Termobimetall impulsli termometrlarning tuzilishi sodda va tannarxi past. Lekin termometrning ishonchli ishlashini pasaytiradigan, radioqabulga xalaqit beradigan kontaktlarning mavjudligi bu turdagi termometrlarning jiddiy kamchiligi hisoblanadi. Bundan tashqari, termobimetall impulsli termometrlarning o‘lchash aniqligi tok manbaining barqarorligiga bevosita bog‘liq. Agar tok manbaining kuchlanishi biror sababga ko‘ra o‘zgarsa, termometrning o‘lchash aniqligi keskin kamayadi.
Xozirgi vaqtda avtomobillarda yuqorida keltirilgan kamchiliklardan ko‘p jihatdan holi bo‘lgan magnitoelektr (logometrik) termometrlar keng tatbiq topmoqda.