«Azərbaycan Respublikası Fövqəladə Hallar Nazirliyinin hərbi qulluqçularının hərbi geyim forması və xüsusi rütbəsi olan əməkdaşlarının geyim forması və fərqləndirmə nişanları haqqında Əsasnamə»

Azərbaycan Respublikasının Prezidenti

İlham ƏLİYEV

Bakı şəhəri, 27 avqust 2007-ci il

№ 623

---

Azərbaycan Respublikası Prezidentinin
2007-ci il 27 avqust tarixli
623 nömrəli fərmanı ilə
təsdiq edilmişdir

Azərbaycan Respublikası Fövqəladə Hallar Nazirliyinin hərbi qulluqçularının hərbi geyim forması və xüsusi rütbəsi olan əməkdaşlarının geyim forması və fərqləndirmə nişanları haqqında

Əsasnamə

I fəsil. Ümumi müddəalar

1. Azərbaycan Respublikası Fövqəladə Hallar Nazirliyinin (bundan sonra—FHN) hərbi qulluqçularının hərbi geyim forması və xüsusi rütbəsi olan əməkdaşlarının geyim forması (bundan sonra—geyim forması) hərbi qulluqçuların və xüsusi rütbəsi olan əməkdaşların geyim əşyaları, nişanları və ləvazimatlarının dəstidir.

2. Geyim əşyalarına:

• 
  üst geyimləri—qış paltosu, demisezon palto, demisezon gödəkcə, tujurka, kombinezon, xalat, kitel, şalvar və s.;
  
• 
  baş geyimləri—papaq, furajka, pilotka, şlyapa və s.;
  
• 
  ayaqqabılar—tufli, botinka, uzunboğaz çəkmə və s.;
  
• 
  digər geyim əşyaları—köynəklər, yun köynəklər, şərflər, əlcəklər və s. aiddir.
  

3. Hərbi qulluqçuların və xüsusi rütbəsi olan əməkdaşların fərqləndirmə nişanları (bundan sonra—fərqləndirmə nişanları)—geyim formasında rəmzlərlə şərti təsvir olunaraq dövlət mənsubiyyətini, FHN-ə, ixtisasına, hərbi (xüsusi) rütbəyə, hərbi qulluqçuların (xüsusi rütbəsi olan əməkdaşlarının) heyətinə və struktur bölmə vahidinə mənsubiyyəti göstərir.

Fərqləndirmə nişanları (rütbəyə, hərbi qulluqçuların və xüsusi rütbəsi olan əməkdaşların heyətinə görə fərqləndirmə nişanlarından başqa)—Azərbaycan Respublikasının fövqəladə hallar naziri (bundan sonra—fövqəladə hallar naziri) tərəfindən təsis edilir, bu nişanlar haqqında əsasnamələr və onların təsvirləri fövqəladə hallar naziri tərəfindən təsdiq edilir.

Hərbi (xüsusi) rütbəyə görə və hərbi qulluqçuların və xüsusi rütbəsi olan əməkdaşların heyətinə görə fərqləndirmə nişanları və onların təsvirləri bu Əsasnamə ilə müəyyən edilir.

4. Fərqləndirmə nişanlarına—paqonlar, yaxa nişanları, döş və qol nişanları (jetonlar, tikmələr), baş geyimlərindəki nişanlar (kokardalar), paqon və yaxalıqlardakı nişanlar (emblemlər, ulduzlar və s.), kantlar və lampaslar aiddir. Bundan əlavə, hərbi (xüsusi) geyim formasındakı rəng, biçim, geyimin komplektliyi, düymələr və geyimin başqa detalları kimi digər xarici fərqləndirmə əlamətlərindən də həmin məqsədlərlə istifadə edilir.

5. Ləvazimat dəsti—şəxsi silah və əmlakı gəzdirmək üçün nəzərdə tutulmuş əşyalar dəstidir. Ona—bel kəməri, aşırma kəmər, səhra jileti, əşya torbası, qumquma və bel üçün üzlüklər, səhra çantası, qobur və s. aiddir.

6. Geyim forması—mərasim, gündəlik, səhra geyim formalarına və xüsusi geyimlərə, onlardan hər biri isə, öz növbəsində, yay və qış geyimlərinə bölünür.

Xüsusi geyimlər—xüsusi mərasim, xüsusi xidmət formaları, xüsusi texniki, xüsusi peşə, xüsusi iş, istiləşdirilmiş xüsusi, xüsusi yay, xüsusi hospital və xüsusi mülki paltarlara bölünür.

Yay geyim forması tikilərkən nazik parçalardan istifadə edilir.

7. Mərasim geyim forması dövlət, hökumət rəhbərlərinin iştirak etdikləri rəsmi tədbirlərdə, xüsusilə təntənəli hallarda, istirahət və ya bayram günlərində, habelə xidmətdən kənar vaxtda geyinmək üçün nəzərdə tutulur.

8. Səhra geyim forması döyüş şəraitində, sutkalıq naryadlarda (qərargahlarda, idarələrdə və müəssisələrdə növbətçiliklərdən başqa), təlimlərdə, manevrlərdə, döyüş növbələrində və təlim mərkəzlərindəki məşğələlərdə geyinmək üçün nəzərdə tutulur.

9. Gündəlik geyim forması qalan bütün hallarda geyilir.

10. FHN-də xidmətkeçmə xüsusiyyətlərindən asılı olaraq hərbi qulluqçulara və xüsusi rütbəsi olan əməkdaşlara geyim formalarının əvəzinə pul kompensasiyası verilə bilər. Pul kompensasiyasının verilmə qaydaları Azərbaycan Respublikasının Maliyyə Nazirliyi ilə razılaşdırılmaqla FHN tərəfindən müəyyən edilir.

11. Xüsusi xidmət geyim formasını növbə çəkən, komendant xidməti, qarovul xidməti, naryadda daxili xidmət çəkmək üçün təyin edilən və digər xidməti fəaliyyətdə olan hərbi qulluqçular və xüsusi rütbəsi olan əməkdaşları geyinirlər.

12. Xüsusi peşə paltarını xidməti fəaliyyətləri yerinə yetirdikləri ixtisaslara xas olan vəzifələrlə əlaqədar hərbi qulluqçular və xüsusi rütbəsi olan əməkdaşları geyinirlər.

13. Xüsusi texniki paltarları xidməti silahların, hərbi və xüsusi texnikanın istismarı, onlara qulluq edilməsi və təmiri ilə əlaqədar hərbi qulluqçular və xüsusi rütbəsi olan əməkdaşları (zirehli texnika və onların bazası əsasında yaradılmış maşınların, bilavasitə silahların və hərbi texnikanın təmiri ilə məşğul olan təmir bölmələrinin və hərbi hissələrin hərbi qulluqçuları, təyyarələrə və vertolyotlara, gəmilərin güc qurğularına qulluq edən hərbi qulluqçular və başqaları) geyinirlər.

14. Xüsusi iş paltarını hərbi qulluqçular və xüsusi rütbəsi olan əməkdaşları təsərrüfat, inşaat işlərini yerinə yetirdikdə, müalicə müəssisələrində, yeməkxanalarda işlədikdə, texnika və silahlara qulluq etdikdə geyinirlər.

15. İstiləşdirilmiş xüsusi paltarları (yarımkürklər, gödəkcələr, şalvarlar, xəz əlcəklər, sviterlər, keçə çəkmələr və s.) hərbi qulluqçular və xüsusi rütbəsi olan əməkdaşları qış vaxtı, havanın temperaturu aşağı olan şəraitdə keçirilən məşğələlərdə, təlimlərdə və işlərdə, xüsusilə soyuq iqlimli, havanın temperaturu daha aşağı olan və güclü külək əsən rayonlarda isə hər gün geyinirlər.

16. Xüsusi yay paltarını (qısaqol gödəkcələr və s.) hərbi qulluqçular və xüsusi rütbəsi olan əməkdaşları yay vaxtı, havanın temperaturu yuxarı olan şəraitdə keçirilən məşğələlərdə, təlimlərdə və işlərdə xüsusilə isti iqlimli, havanın temperaturu daha yuxarı olan rayonlarda isə hər gün geyinirlər.

17. Xüsusi hospital paltarını müalicə müəssisələrində müalicə edilən hərbi qulluqçular və xüsusi rütbəsi olan əməkdaşlar geyinirlər.

18. Xüsusi mülki paltarları yeməkxanada işləmək üçün təyin edilmiş hərbi qulluqçular, xüsusi rütbəsi olan əməkdaşlar və mülki şəxslər xidmət vaxtı, eləcə də xidməti zərurətlə bağlı digər hallarda geyinirlər.

19. Keçirilən tədbirlərdə (sıra baxışlarında, sıra düzümlərində, müşavirələrdə və s.) iştirak etmək üçün geyim forması, tapşırıqların xarakteri və yerinə yetirilməsi şəraiti nəzərə alınmaqla həmin tədbirləri keçirən rəislər (komandirlər) tərəfindən müəyyən edilir.

20. FHN-də həqiqi hərbi xidmət keçən bütün hərbi qulluqçular və xidmət keçən xüsusi rütbəsi olan əməkdaşlar, o cümlədən toplanışlara çağırılmış hərbi vəzifəlilər, habelə ehtiyata, yaxud istefaya buraxılarkən geyim forması daşımaq hüququ olan şəxslər həmin geyim formasını daşımaq hüququna malikdirlər.

Geyim formasını daşımaq hüququ olmayan şəxslərə hərbi qulluqçuların və xüsusi rütbəsi olan əməkdaşların fərqləndirmə nişanları olan geyim formasını geymək qadağandır.

21. FHN-nin hərbi qulluqçuları geyim formasını fövqəladə hallar naziri tərəfindən təsdiq edilmiş qaydalara uyğun olaraq daşıyırlar.

22. Hərbi qulluqçular və xüsusi rütbəsi olan əməkdaşlar üçün geyim formasının və fərqləndirmə nişanlarının təchizat norması Azərbaycan Respublikasının Nazirlər Kabineti, geyim forması ilə təmin edilmə qaydası isə fövqəladə hallar naziri tərəfindən müəyyən edilir.

23. Xüsusi geyim və ləvazimat dəstinin tərkibi, təsviri, təminat və daşımaq qaydaları fövqəladə hallar naziri tərəfindən müəyyən edilir.